Kola Sa La Itre Hnyinge i Nyipunie

◼ Pine nemen matre loi e tro së a wange hnyawa la aqane heetre së me aqane iseji së, maine easë a tro troa hane ihamë ngöne la Bethela me itre xaa iuma i Sasaiatri?

Ame ngöne la easë a ihamë ngöne la Bethela, maine easë a tro troa hane wang la itre iuma ne huliwa i Sasaiatri, maine troa wange pena la itre atren la Bethela, nyipi ewekë tro sa “heetr, me isej, tune la easë a troa hmi me sin la itre icasikeu hnine la Uma Ne Baselaia.” (om 131) Ngo hna wangatrehmekune laka, hetrenyi la itre xaa trejin trahmanyi me föe ka vizitën la itre iuma i Sasaiatri, ka wangacon la hnë cili, me sasaithi tulu la aqane heetre i angatr. Thaa ijije kö troa heetr tune lai ngöne la easë a ihamë hnine la itre iuma i Sasaiatri memine la Bethela. Loi e tro sa amamai tulu me nyihnyawan la ngönetrei së me qahmihmi la aqane heetre së, aqane tro hi së lai a amaman laka ka atreine së troa ce mel, nge hetrenyi së la hni ne metrötr, thiina ka eje thene la itre hlue i Iehova Akötresie.—1 Tim. 2:9, 10.

Ka nyipi ewekë catr troa kuca tune lai ngöne la easë a vizitën la Bethela memine la itre iuma i Sasaiatri, pine laka, kola goeën la itre atr ka traqa troa vizit, hnene la itre atr ka thaa ce hmi kö me easë. Ame la itre xaa ka goeë së, tre, angatre hi a hamë mekun me qaja la itre atr, memine la organizasio, qa ngöne la hnei angatr hna goeën. Loi tro fe së a ce ithanatan la itre mekune cili memine la itre ka etid me easë, me itre xane ju kö ka troa hane ihamë, matre troa amekunë angatr, la enyipiewekën la troa thupën la aqane heetre së me aqane iseji së. Tro hë la itre atren la Bethela, a madrin me olen la aqane metrötrëne së la uma i Akötresie.

Loi e tro mina fe së itre hlue Keresiano, a thupën la aqane nyihnyawane së la ngönetrei së, matre thaa tro kö a athixötrën la itre xan. (2 Kor. 6:3, 4) Maine tro së a ujë tune lai, eje hi lai laka, tro pala pë hë së a “alolone ngöne la nöjei ewekë asëjëihë la ini i Akötresie Ate amele shë.”—Tito 2:10.