Amamai Tulu Jë Ngöne La Aqane Nyihnyawane Së La Ngönetrei Së Memine La Itre Huliwa Ka Loi Hna Kuca
1. Tune kaa la aqane tro sa amaman la ole së ngöne la ijine kovasio ne distrik laka calemi hë?
1 Easenyi hë matre könë së jë hnei Iehova kowe la Kovasio Ne Distrik ne 2003, hna hape, “Atrunyi Akötresieti Jë.” Easë a olene atraqatr la hnei Iehova hna könë së kowe lai pui ne xeni ne la ua! Jëne la aqane heetre së me aqane iseji së, easë hi lai a amaman la metrötre së memine la ole së kowe la itre ewekë ngöne la götrane la ua hna hnëkëne thatraqa së.—Sal. 116:12, 17.
2. Pine nemen matre nyipi ewekë tro sa nyihnyawan la ngönetrei së me heetr me iseji hnyawa?
2 Loi e Troa Porop Me Cepunekë: Loi e troa mama la itre hna amekötine hnei Akötresie, ngöne la aqane nyihnyawane së la ngönetrei së, laka porop nge cepunekë. (1 Kor. 14:33; 2 Kor. 7:1) Loi e troa nyihnyawane la ngönetrei së, ihe së, me itre itine wanakoim, nge loi e tro sa porop. Ngazo catr la aqane heetr hnene la itre atr enehila me aqane nyihnyawan la ngönetrei i angatr. Ngo thaa hnene kö laka ka hlemu la aqane heetr me isej ne la ketre ka elo film ngöne sinema, maine ka isosonyi pena la aqane heetre me isej ne la ketre atr ka hlemu ka elo, ke tro fe hë la itre Keresiano a hane kuca tune lai. Maine tro sa xötrethenge la itre mood enehila, troa jole kowe la itre atr troa wangatrehmekune la eisapengönen la itre atr ka nyihluene la nyipi Akötresie qa ngöne la itre atr ka thaa nyihluei Nyidrëti kö.—Mal. 3:18.
3. Tune kaa la aqane troa xecie hnyawa koi së laka ame la aqane heetre së me iseji së, tre ka ihmeku memine la eamo hna hamën ngöne 1 Timoteo 2:9, 10?
3 Iheetr Ka Ijije Kowe La Itre Hlue Keresiano: Ame ngöne lo Paulo aposetolo a cinyanyi koi Timoteo ketre atre thup, hnei nyidrë hna ithuecatre me hape tro la “ite fö’ a thaipine la ixete ne wesiwes, loi pe tro qahmihmi me metöt ; . . . loi la nöjei huliwa ka loi, kowe la ite föe hna hape, (celë hi ijiji angete thina ka ijiji Akötesie.)” (1 Tim. 2:9, 10) Nyipi ewekë tro sa thupëne la itre mekune së, maine easë a ajan troa xecie hnyawa laka lolo la aqane heetre së. Loi e troa heetre hnyawa, me porop, me qahmihmi—thaa tro kö a hmelele menu pala ha la hnaheetre së maine heetre ne wesiwes.—1 Pet. 3:3.
4, 5. Nemen la itre ewekë nyine troa hmekëne hnyawa hnene la itre Keresiano trahmanyi me föe?
4 Hnei Paulo fe hna hmekën la itre keresiano me hape thaa tro kö a “eli nyiatëne la ihe, me xetëne la ixete ka tru thupen, me gole me penina.” (1 Tim. 2:9) Ka inamacan la itre föe Keresiano ka tuluth la aqane troa feni cein, me nyi ha, me itre xaa aqane troa thaipi ju kö.—Ite edomë 11:2.
5 Ka loi mina fe tro la itre Keresiano trahmany a hane trongën la itre trepene meköti hna hamën hnei Paulo kowe la itre föe Keresiano. Loi e tro la itre trejine trahmany a thipetrij la itre mood ka xulu qaa cahu fen. (1 Ioane 2:16) Hanawang la ketre ceitun, ame ngöne la itre xaa nöje ka tru tre, ka hlemu la troa hlupahlupa la hnaheetr, ngo ame kowe la hlue i Akötresieti ke thaa aqane heetre kö ka loi.
6, 7. Tune kaa la aqane troa atrunyi Iehova hnene la itre nekönatr, nge nemene la hnëqa ne la itre keme me thin?
6 Itre Huliwa Ka Loi Ne La Itre Keme Me Thin Me Itre Nekönatr: Nyimutre la itre thöth enehila ngöne la fene celë ka ngazo thiina, nge ketre pengöne pe kö la itre nekö së, matre kösë kola atrunyi Iehova hnei nyudren memine la organizasio i Nyidrë. Ngo ame ngöne la itre xaa ijin, kola traqa la itre jol qa ngöne laka thaa hna thupëne hnyawa kö la itre kuku. (Ite edomë 29:15) Thaa loi kö tro la itre keme me thine a nue la itre nekö i angatr troa lapa caas ngöne la itre otel, me sië pisin, me tro caas kowe la hnë kovasio.
7 Qëmekene la ijine kovasio, kola öhne hnene la itre keme thine laka, nyipi ewekë troa ce wange hmaca memine la itre nekö i angatr la itre thiina ka lolo nyine tro angatr a eën. (Efe. 6:4) Angatr a xatuan la itre nekö i angatr troa trotrohnine laka ame la ihnimi ne la itre Keresiano, ke “tha thina ka qali kö” maine “tha ate thele ewekë i nyëne kö.” (1 Kor. 13:5) Ame la kovasio ne distrik, tre, celë hi ketre ijine easë a pane nue la itre huliwa së matre troa drenge la ini qaathei Iehova, nge tro la itre nekönatr memine la itre ka tru a amaman la metrötre i angatr kowe lai hna amekötine cili, hnene la aqane ujë i angatr ngöne la hna kovasio me e kuhu fe e trön.—Is. 54:13.
8. Nemen la thangan la eloin la aqane ujë së thene la itre xaa atr?
8 Atreine hi tro la thiina së ka loi a jelethoin lo itre trengathoi hna atë hu së, ketre, tro fe ej a hule la itre atr kowe la nyipi hmi. (Mat. 5:16; 1 Pet. 2:12) Epi tro asë hi la itre atr ka traqa kowe la kovasio ne distrik a qaja aloinyi së hnene la aqane ujë së memine la aqane kepe angatr hne së. Qa ngöne lai tro hë së ‘a amaman la tulu ne thiina ka loi’ me atrunyi Iehova.—Tito 2:7.