Loi e Troa Metrötr La Aqane Troa Heetr Me Isej
1 “Hna hnö kala asë hi la itre trahmany, ketre tune mina fe la itre nekönatr trahmany. Ame asë hi la itre föe memine la itre nekö jajiny, memine la itre thöth me itre nekönatr jajiny, angatr asë hi a heetrë kimonu maine xötrë ijip. Pëkö ka xötrë itrauzizi jin e angatr, maine amamai hune imano pena. Atraqatr la madrine i angatr asë.” Celë hi hna qaja lai hnene la ketre zonal. Drei lai hna qaja hnene la zonale cili? Hapeu, ketre icasikeu göi troa qeje politik? Kola wai elo? Kola drei miuzik? Ohea, thaa celë pi fe kö lai itre ewekë cili! Kolo lai a qejepengöne la ketre gurup, itre trejine trahmanyi me föe, ngöne la ketre kovasio ne distrik ka tru lo hneijine cia drön la itre isinöe.
2 Atre easë catr hnene la itre atr e cailo fen, qa ngöne laka, ka isa pengöne kö së hnene la aqane nyihnyawane së la ngönetrei së. (Mal. 3:18) Pine nemen? Pine laka, easë a xötrethenge la eamo qa hnine la Tusi Hmitrötr, hna hape, thaa tro kö a “thaipine [hne së] la ixete ne wesiwes, loi pe troa qahmihmi me metrötr, . . . celë ijiji angete thina ka ijiji Akötesie.”—1 Tim. 2:9, 10.
3 Nemen La Hne Së Hna Amaman Hnene La Aqane Heetre Me Iseji Së? Kola amaman la pengö së hnene la iheetr hne së hna iën, memine la aqane heetrën ej hne së, ene la itre hne së hna mejiune kow, me aqane ujë së, me itre mekuna së. Kola qeje së me nyi trenge ewekë së, hnene la itre mood hne së hna iën. Thaa tro pi kö së a sajuën la itre mekun ka iathixötrë, memine la itre aqane ujë ka hlemu e cailo fene hnengödrai. Ame la ka nyipi ewekë, tre thaa ene kö la troa atre maine ka hlemu la ketre mood, ngo tro pe a thel maine ijije troa hane xom la itre mood cili hnene la atr ka qaja ka hape, hlue i Akötresieti angeic. (Rom. 12:2) Ame la aja së, tre, ene la troa amaman ka hape, easë a “atrunyi Akötresie” hnene la hni ka nyipici, ngo thaa tro kö a iën la itre aqane heetr me isej, wene ne la pi mele caas, maine ka sajuën la mele ne kuci ngazo.—1 Pet. 2:12.
4 Ame itre xaa ijin, kola kapa hnene la itre xaa atr ka xötrei atre la nyipici, maine ka nango nanazij ngöne la götrane la ua, la itre iajojezin la fen, göi heetr, me isej, nge thaa pane hane kö mekun la thangane lai kowe la ëje i Iehova, memine la organizasio i Nyidrë. Loi e tro asë hi së a isa catr waipengö së, matre tro sa atre maine hna löthi së hnene la itre mekune ne la fen. Loi e tro së a easenyin la ketre trejin trahmanyi maine föe hna metrötrën nge ka macaj ngöne la götrane la ua, me sipon matre tro angeic a goeën la pengöne la iheetr me aqane iseji së, nge thupene lai, thaa tro kö a wang ahmalohmaloeën la itre mekun nyine ixatua hna hamën.
5 Loi e tro asë hi së a kuca la hne së hna atrein ngöne la ijine kovasio ne la macatre celë, hna hape, “Itretre Catr Cainöjën La Baselaia,” matre tro sa anyipicin, ka hape, easë la “nöje ka hmitrötre koi Iehova Akötresi [së].” Kola nyixan la “atrun, me ëjen, me lolo” i Iehova, hnene laka, kola qaja aloinyi së hnene la itre atr.—Deu. 26:19.