Kola Thupë Së Hnene La Atre Xupi Së!
1 Ame ngöne la Iehova a thele troa ahmacanyi angetre Isaraela qa ngöne la thaa idrei i angatr, hnei Nyidrëti hna hnyinge ka hape: “Hape u, tha’te kö eö? tha denge kö eö? Iehova la Akötesie ka epine palua, ate xupe la ite cane la fene hnengödrai.” (Is. 40:28) Atrepengöi Iehova hnyawa së, Atre Xupi së, nge thaa sihngödre kö la aqane hnimi së me thupë së hnei Nyidrë. Ngo ala nyimu catre pala kö la itre atr, itre milio la etrun, ka thaa lapaune kö angatre laka, ka mele Nyidrë, maine pena isazikeu kö la mekune i angatre memine la aqane qeje pengöi Nyidrë hnei Tusi Hmitrötr. Nemene la aqane tro së a xatua angatr?
2 Thatraqane hi la itre atr ka hnyinge tune lai, la itus ka hnyipixe hna hape, Y a-t-il un Créateur qui se soucie de vous? Eje a hamëne la itre mekune nyine troa xatuane la itre atr troa atrepengöne la nyipi aliene la itre ewekë hna xup. Itre mekune lai hna mejiune kow, nge ka troa amejëne la aja thene la itre atr ka e la itusi cili.
3 Loi e Tro Së a Atrepengöne Hnyawa La Itus, Créateur: Loi e troa hnehene la itre mekune ka tru ka eje hnine la itus. Wange ju ngöne la mekene 2 koi 5, la aqane traqa la hnengödrai me fen, memine la mel, memine la atr, nge troa atre fe la atre xupe itre ej. Ame ngöne mekene 6 koi 9, kola qaja la Tusi Hmitrötre memine la Atrekë ewekëne lai, memine fe la enyipicine la tusi Genese, lo kola qeje pengöne la aqane xupe la hnengödrai me fene hnei Akötresie. Kola hamëne fe ngöne la mekene 10, la itre mekune ka lolo, ka sa la ketre hnyinge e hnine la itre xane hna lapa fë hnene la itre atr, hna hape: “Maine nyipici laka, Akötresieti a thupë së, hnauëne kö la kola tru pala hi la akötr?”
4 Tupathe Jë Troa Xatuane La Itre Ka Thaa Lapaune Kö Koi Akötresie: Ame ngöne la itre götrane 78-9, ke, kola amamane hnene la itusi Créateur la ketre jëne mekune nyine troa xome matre troa xatuane la itre xaa atr troa hane atre la nyipici göi Akötresie. Hnyingë angatre jë ka hape: “Hetre qaane kö la hnengödrai memine la fen?” Ala nyimu la itre atr ka troa kapa la mekune laka, ka hetre qaane la hnengödrai me fen. Nge maine troa hnyinge ka hape: “Hapeue la fene me hnengödrai, ka hetre qaane kö?” Ala nyimu la itre atr ka kapa la mekune cili. Celë hi matre öni angatre jë hi ka hape: “Hapeu, hetre kepine kö matre fetra pi la fen me hnengödrai, maine ka xulu xan?” Ala nyimu la itre ka wangatrehmekune laka hetre kepin. Kolo lai a thuejëne la hnyinge hnapin, kola hape: hapeu, ka fetra la hnengödrai me fene qa ngöne la itre ewekë hna xupe ka epine palua, maine qa thene la Atre ka epine palua?” Celë hi aqane tro lai a xatuane la itre atr matre hane jë fe angatre traqa kowe la mekun, ene laka, thatreine kö troa pë ka xupe la hnengödrai me fen.
5 Troa nyipi ewekë catre la itus Créateur kowe la itre atr ka nyimutre. Loi e tro së a thele troa hane hamëne kowe la itre sinee së, me itre sine huliwa së, me itre sine ce ini me easë, me itre xaa hne së ju kö hna atre. Xome trongëne jë eje ngöne la hna cainöje trootro, matre troa hane tro fë kowe la itre atr hnei epuni hna ithahnata memin, ka mekune ka hape, pëkö Akötresie. Maine tro së a atrepengöne hnyawa la itusi cili, eje hi laka, tro ha kökötre catre pala hi la ihnimi së kowe la Atre Xupi së, nge celë hi ka troa upi së lai troa xötre thenge hnyawa pala hi la itre trepene meköti Nyidrë ka draië catr.—Efe. 5:1; Hna ama. 4:11.