Xupe Jë Thene La Itre Atr La Lapaune Kowe La Atre Xupi Së
1 Alanyimu la itre atr ka hetre sipu mekune ngöne la qaane la mel. Jole pi hë koi së troa wange laka, alanyimu la ka kapa la evolisio, kola hape qaane la mel. Kola amamane hnyawane hnene la itus Création la lue mekune ka icilekeu, nge ej’a hamëne la itre enyipicine ka catr göi Tusi Hmitrötr. Nemene la aqane tro së a xatuane la itre atr ka hetre hni ka nyipici, me ka ajane troa drei së? Tro së a bëeke hmaca troa wai angatr. Ngöne la easë a bëek, ke, loi e tro palahi së a pane mekune hnyawane la itre hne së hna troa qaja, matre xupe thei angatre la lapaune koi Iehova, la Atre xupi së.
2 Maine kola lapaune hnene lai atr kowe la Tusi Hmitrötr, ke, ijije troa nyiqaane ithahnata ka hape:
◼ “Isaia 45:18 a hamëne la ketre mekune ka tru nyine amamane la qaane la itre hnengödrai asë; eni a pi atre la mekune i nyipë. [E jë, nge nue pi troa sa.] Iehova a ketre sipu amamane ka hape nyidrëti la Atre xupe la hnengödai memine la fene hnengödrai. Nge tune ka fe ngöne la mel, e celë fen? Isaia 42:5 a olene fe la hna mano hna hamëne hnei Iehova kowe la nöjei ka mel. [E jë.] E maine ame la hna qaja hnene la Tusi Hmitrötr, ke, ka nyipici, kola hape ka thoi la evolisio. Hapeue la mekune i epun, mejiune kö epuni kowe la Tusi Hmitrötr?” Amamane jë la mekene 17 ne itus Création, nge qaja jë la itre hna ewekë ka amamane laka, nyipici ka hape Iehova, la Atre xupi së.
3 Ijije tro epuni a nyiqaane la ithahnata tune la:
◼ “Ame lo pane traqa ni, ke, qëmekene lo tro ni a tro, hnenge hna hnyinge koi nyipë ka hape, nemene la pune kowe la atr memine la fene hnengödrai? Nge, pane goeëne ju la aqane sa la hnyinge celë hnene la itus, lo hnenge hna amë pe.” Fe jë la itus Création, ujëne jë kowe la itre götrane 234-5, nge upi nyidrëti jë troa hane e la itre paragarafe 6 me 7. Maine kola mama la aja i nyidrë, ke, ijije troa hnyinge ka hape: “Hapeue la mekune i nyipë, nemene la itre ewekë ka tru, nge ka ijije troa iamamanyine ka troa traqa e celë fen?” Maine ijije hi, ke, loi e troa ce ithahnataane la mekune celë, maine pena ce wange jë e ketre iwaihmaca, me sisedrëne jë memine la itre xaa paragarafe ngöne palahi la mekene celë ne la itus Création.
4 Maine pëkö aja ne la atr kowe la hmi, ke, ijije tro epuni a hnyinge ka hape:
◼ “Hane fe kö nyipëti öhne laka alanyimu la itre atr enehila ka thithi kowe la ketre ewekë, ngo tha ketre atr kö, maine pena kola atrune lo itre hna qaja kola hape Neköne la Dro? [Nue pi troa sa.] Tha hnei Tusi Hmitrötre kö hna nue së matre thatre, tune fe la Atre xupi së ka nyipici.” E jë lai Hna amaman 4:11. Thupene la hna e la xötr, ke, nue pi tro lai atr a qaja la mekune i angeic. Loi e tro epuni a amamane la casi maine lue mekune ka ijije qa hnine la mekene 11 ne la itus Création, nge maine ijij, ke, amamane ju fe la aja ne la Atre xupi së troa aketrepengönëne la fene hnengödrai, troa paradraiso, fene la Baselaia i Keriso.
5 Ame la ketre aqane kuca, ke, troa nyiqaane la iwaihmaca tune la:
◼ “Tru la itre akötre me hace ka traqa kowe la itre atr, hnene la ngazo memine la thina ka ngazo. Hnei Iehova, la Atre xupe la fene hne ngödrai hna thingehnaeane ka hape easenyi hë la pune la aqane mele ne la itre atr enehila? [Fe jë la götrane 196, nge e jë la Ite Edomë 2:21, 22.] Ame la itre ka wangatrunyi Iehova, kösë Atre xupi së, nge ka kuca la aja i nyidrë, ke, tro angatr’a treqene madrine la itre manathithi ka mingömingö qa thei nyidrë.” Maine ijije hi, ke, sisedrëne jë la porotrike jëne la tusi Hna amaman 21:4, 5 ngöne la götrane 197-8.
6 Atre hnyawa ha la itretre cainöje ka atreine ka hape, ka loi la troa hnëkëne la ketre ijine thatraqane la itre iwaihmaca. E hne së hna hnëkëne la ketre porogarame ka cile huti thatraqane la huliwa cili, ke, tha jole kö koi së troa xomexatuane la aja. Kaloi la troa iëne la ketre ijine ka ijije koi epun, me kowe la itre atr ne la teritoar. E hne së hna bëeke troa wange palahi la itre atr, ke, troa tru la madrine së troa kuca la hnëqa së, ene la troa “inine la itre atr.” — Mata. 28:19, 20.