Xatuane Jë La Itre Xane Troa Atrune La Atre Xupi Së
1 Hapeu, hne së kö hna mekune tune la hna qaja ngöne la tusi Salamo kola hape: “Iehova fe, . . . ke thei enëtilai la qeqe ne mel”? (Sal. 36:5, 9) Tuneka la aqane tro së a xatuane la itre xane troa hane kapa madrine me atrunyi Iehova, ceitu me Atre xupi së? Tro së a trofë trongëne la itus La vie: comment est-elle apparue? Evolution ou création?, e treu june. Ketre itusi lai ka nyipiewekë catr, pine laka, ej’a amamane hnyawane la enyipicine laka, hetre Akötresie, nge kola amamane fe ka hape ame la evolisio, ke ini ka thoi. Ej’a xupe the së la mejiune kowe la Tusi Hmitrötr, laka wesi ula i Akötresie. Ejehi laka, easë a ajane tro la nöjei atr a atre ka hape kola atrunyi Iehova jëne la hna xupe la nöjei ewekë asëjëihë, ngo tha jëne kö la evolisio.
2 Hane la ketre aqane nyiqaane ithahnata ka tha jole me ka tro meköt.
Thupene la hna ibozu memine lai atr, ke, amamane ju lo iatr ngöne la götrane 6, nge hnyingëne ju ka hape:
◼ “Tuneka la aqane traqa la mele e celë fen? Itre xan’a qaja ka hape kola xulu xan. Tusi Hmitrötr’a köjane koi së laka Akötresie la qaane la nöjei mel’asë. Hapeue la mekune i nyipë? [Nue pi troa sa.] Kola sa hnene la itusi celë, nge ka ihmeku memine la Tusi Hmitrötre memine la itre hna öhne hnene la itre siatifik. Eni a ajane troa hamë nyipë la itus, matre tro pë hë nyipëti a goeëne la enyipicine me ketre sipu axeciën.”
3 Thupene la hnei epuni hna qaja la ëje i epun, ke, ijije tro epuni a qaja ka hape:
◼ “Hapeu, ngöne la itre hnedrai ne inamacane enehila, hmaloi kö koi së troa lapaune kowe la mekune laka hna xupi së, maine pena hapeue la mekune i nyipë, easë kö a traqa xan? [Nue pi troa sa.] Pane drenge hnyawane ju la mekune ne la Tusi Hmitrötre ngöne la götrane cili. [E jë Heberu 3:4.] Hapeu, eje kö laka am’asë la itre uma, ke, hetre atr ka xup? Hawe, ijije kö tro la hnengödrai a traqa xan? ” Amamane jë la iatr ngöne la götrane 114 ne la itus Création, nge thupene lai, ke, köjane ju la mekune hna cinyihane ngöne la paragarafe 2 ne la götrane 115. Hamëne jë cememine la madrine la itus, nge qaja ju fe lai thupen, nge qaja ju fe koi angeice ka hape ame la epuni a bëeke hmaca, ke, tro epuni a ce ithahnataane la hnyinge ka hape, Nemene la pune kowe la atr memine la fene hnengödrai?
4 Maine pena thupene la hna ibozu memine la atr, ke, qaja ju ka hape:
◼ “Hapeue la mekune i nyipë, ka tuneka la qëmekene la itre xötrapane së? [Nue pi tra sa.] Ceitu kö angatre memine lo hna hape ‘atr-mage?’ [Fe jë la itus Création ngöne la götrane 83.] Pane goeëne ju la hna qaja hnei Tusi Hmitrötre ngöne la tusi Ite Huliwa 17:26. [E jë.] Hawe, nemene la qaane la itre iatr ne la ‘atr-mage’?” Köjane ju la hna cinyihane fene la iatr ne la götrane 89. Qaja ju kowe lai atr ka hape tro angeic’a kepe thangane la hna e lai itus, me atrepengöne la aqane sa lo hnying.
5 Ame la ketre aqane kuca, ke, ene la troa amamane la hune la itus “Création” me qaja ka hape:
◼ “Ame enehila, ke, eahuni a hnyinge kowe la itre ka lapa ezi huni ka hape, hnene la atr hna traqa xane maine qa ngöne la hna xup? Nemene la mekune i nyipë? [Nue pi troa sa.] Ngacama alanyimu la itre atr ka inamacane ka kapa la evolisio, laka ketre ewekë ka nyipici, ngo ame pe, ke, hetre itre xane ka inamacane fe ka tha lapaune kö kowe lai. Pane goeëne ju la pune la hna traqa kow, hnene ketre astoronot. [Amamane jë la itre mekune ne la götrane 122-3.] Nyipiewekë tro së isa alacasi a wange hnyawane la itre enyipicine matre qa ngöne lai, easë a lapaune kowe la evolisio maine pena kowe la hna xupi së.” Maine kola kapa la itusi hnene lai atr, ke, hamëne ju la ketre hnyinge nyine tro së a sa e ketre iwaihmaca.
6 Ajane kö së troa xatuane la itre xan, troa atrepengöne la itre nyipici ka mingöming, göne la Atre xupi së memine la aja i nyidrë thatraqane la itre hnei nyidrëti hna xup? Tro la itus Création a xatua së ngöne la götrane cili. Ej’a atrune la Atre ixup ka draië, Joxu Iehova, me qaja amamane la itre huliwa i nyidrë, nge kolo fe a amamane la aja i nyidrë ka mingöming, ene la troa ahmitrötrëne la atresia i nyidrë, nge troa amanathithine la nöjei atr’asë jëne la Baselaia i Keriso.