Iehova La Atre Xupi Së
1 Itre milio lao atr a lapaune ka hape Akötresieti la ka xupe la nöjei ka mel. Nyimutre mina fe la ka lapaune ka hape, ka xulu xane la mel; kolo hna qaja ka hape la evolisio. Nge ame itre xan, pëkö hnei angatre hna lapaune kow. Celëhi matre tro la itus La vie: comment-elle apparue? Évolution ou création? a ewekë koi së asë. E hnine la itusi celë la itre hna qejepengöne ka jui, ene la pengöne la aqane traqane la mele memine la alien’eje thatraqai së ngöne la itre drai ka calemi. Troa trofë e treu juune la itusi ka sisitria celë.
2 Hnene mina fe la itre ka mama e angetre traqa kowe la itre ini ka tru ne la sias (lo angetre inine troa atre la pengöne la nöjei ka mel) hna öhne laka, ka meköti hnyawa la aqane cinyihane la itus. Hanawange la hna qaja hnene la ketre siatifik qa Peiba: “Pëkö ketre itusi ka tune la. Ame la aqane amë xötrëne la itre mekene la itus, memine la itre aceitun, ke, ceitu me itre ewekë hna amë ngöne la hna ihone la sias, timek la atr ka troa jele thoin.” Hnene la ketre atr ka icilëgöli tiribinal, hna hëne ka hape avoka hna qaja hape: “A foa hë lao e eje ni, nge eni palahi a hain’ej, hnene la ejuine la itre ewekë hna sinethel, memine la aqane hnëkën’ej, wene ne la inamacane me atrein.” Hawe, ka xeci koi së laka tro fe la itre xaa atr a hane kapa madrine la itusi cili.
3 Tupathe jë la aqane trofë celë:
◼ Fe jë la itusi kowe la götrane 6, nge qaja jë ka hape: “Alanyimu la itre atr ka mekune laka ame la fene së ka mingöming, memine la mele ka eje hnin’ej, ke, ka traqa xan, pëkö ka xup. Hapeu, tha ka jole kö koi epuni troa kapa la mekune celë? [Nue pi troa sa.] Nyimutre la itre ewekë ka sajuëne la hna qaja hnene la Tusi Hmitrötr, göne la ketre Atre ixup ka hetrenyi la mene ka tru, nge ka tru ihnimin. Nyidrëti hi la nyipi Akötresie, nge ame la atresiwa i Nyidrë, ke, Iehova.” E jë la Salamo 83:18, nge qejepengöne jë, ngo tha tro pe aqean, laka ame la trepene mekune i Akötresie, ke, ene la troa paradraisone la fen’asë.
4 E maine easë ajane troa canga traqa kowe la hne së hna mekun, ke, ijije tro së a qaja ka hape:
◼ “Eje fe kö thei epuni la itre hnyinge celë? ” Amamane ju la taane lai itus, nge fe jë kowe la götrane 7, e ju fe la itre hnyinge hna amejëne ngöne la paragarafe 2, nge qaja ju ka hape ame la itusi celë, ke, ej’a hamëne la itre mekune ka ijije qa hnine la Tusi Hmitrötre nyine troa sa la itre hnyinge celë.
5 Maine pena, ijije tro së a qaja ka hape:
◼ “Hane fe kö epuni thele la aqane traqa ne la fen? Catre la mekune i itre xane ka hape, thupene la hna kuca la ewekë e hnengödrai tune la hedrenge ka mala, traqa pi hi la fen. Tuneka fe la mekune i epun? [Nue pi troa sa.] Tusi Hmitrötr’a ini së laka, Akötresieti la ka xupe la fene göi tro së a lapaane palua. Tha ka ceitu kö eje me itre xaa wëtresiji ka cile xötreithe la jö. Qa ngöne la atrehmekune së, fene hnengödrai hmekujehi la götrane ne la hnengödrai ka hetrenyi la itre ewekë thatraqane la mel.” Fe jë la itusi kowe la götrane 130, nge ce wange ju la paragarafe 5, nge qejepengöne ju la kepine matre ijije tro la itre ewekë celë a ketre thangane la huliwa i ketre Atre xup ka tru.
6 Ame la ketre aqane trofë, ke, ene la troa qaja ka hape:
◼ “Itre xaa atr a mekune laka, easë a traqa qa ngöne la itre atr-mage. Angatr’a mekune laka ame la itre xötrapane së, ke, ceitui angatre memine la iatr celë. [Amamane jë la iatr ne la götrane 89]. Hapeue la mekune i epun? ” Nue pi troa sa. Amamane hnyawaane ju la hna qaja ngöne la paragarafe 20, nge e jë la Ite Huliwa 4:24, ka amamai Iehova tune la Atre ixup, me ka thue mel. “Hna waipengöne hnyawaane la ini ne la evolisio hnene la itusi celë thenge la hna qaja hnei Tusi Hmitrötr.” Fe jë kowe la itre taane mekune hna cinyihane ngöne la götrane 5, nge qaja ju la xalaithe hi la itre taane mekun, tune la itre mekene 1, 7, 15 me 19.
7 Ame la itre atr ka hni ka loi, ke, tro angatr’a öhnyi loi qa ngöne la itus Création, pine laka hna thoi koi angatre hnene la itre ka tha lapaune kö koi Iehova, nge itre ka tha hni pena kö kowe la Wesiula i Nyidrë. Ame la itre mekune hna sajuëne hnene la itre ewekë nyine anyipicin, ke, tro itr’ej’a xatuane la itre atr celë, troa akökötrene la ole i angatre kowe la Atre xupi së, nge ka thupë së hnyawa.