Kola Sa La Itre Hnyinge i Nyipunie

◼ Hapeu Hne Së Kö Hna Hnëkë e Traqa Ju La Ketre Jole Koi Së?

Ame ngöne la hneijine së enehila, hetrenyi la “ijin, me ewekë ka xulu” xane koi së, ene pe easë a canga thele nyin la jole ka tru ka traqa koi së, tune la kola upe iele së troa xomi madra. (Ate Cai. 9:11) Qa ngöne lai, loi e xecie koi së laka, ka hnëkë hnyawa së kowe la jole cili; hnei Iehova hna hamëne la nyimu aqane troa xatua së, jëne la organizasio i Nyidrë, ngo Nyidrëti pe a ajane tro së a kuca la hne së hna atrein. Hanawange cahu itre mekune nyine troa xatua së.

• Loi e tro pala hi së a xome trongëne lo pepa Instructions médicales/Pas de sang.

• Loi e troa xecie koi së laka, hetrenyi pala hi thene la itre nekö së la ketre pepa göi Document d’identité médical.

• Wange hmaca ju la sinetrongene lo Huliwa Ne Baselaia ne Semitrepa 1992, matre amekunëne hmaca la aqane troa ce ithahnatane memine la itre droketre me itre ka cilëne la itre hna kootr, lo drösinöe hna troa hamëne kowe la nekö së ka co.

• Wange hmaca ju la itre mekune hna cinyihane ngöne la pengöne la madra me itre aliene ej, nge itre ewekë ka ijije troa nyihnane ej. (Hna upi së troa xome la zonal: La Tour de Garde ne 1 Okotropa 1994, götrane 31; 1 Juun 1990, götrane 30-1; 1 Maac 1989 götrane 30-1; Réveillez-vous! ne 8 Diseba 1994 götrane 23-7; 8 Ogas 1993 götrane 22-5; 22 Nofeba 1991 götrane 10; me itre sinecetrone la itre Huliwa Ne Baselaia ne Semitrepa 1992 me Nofeba 1990. Loi e troa ami göhnene hnyawa itre ej, matre hmaloi troa xome elanyi e traqa ju la itre jole göi madra.)

• Loi e tro së a axeciëne hnyawa e kuhu itre hni së, maine ijije troa hane anenine e tröne la ngönetrei la madra së jëne la itre machines , matre troa pane trije la itre sine mecin, thupene lai kola nyi jëne hmaca troa alöne hnine la ngönetrei së; ketre tune mina fe la troa kapa la itre drösinöe ka nyihnane la madra.

• Qëmekene tro së a tro pital, maine ijije troa pane wange la itre qatre thup, matre tro angatre a atre la pengö së, ene pe hamëne ju angatre la ixatua koi së me thuemacane la Comité de liaison hospitalier (C.L.H.) e traqa jë elany la ketre jole ka tru. Maine jole ka traqa kowe la ketre nekönatr, haawe, loi e troa canga thuemacane la itre qatre thup.

Thaa Tro Kö a Luelue Ngöne La Kola Xele Ma Xome La Madra: Kola mama laka, hetrenyi la itre trejine trahmanyi me föe ka thaa canga tro kö troa wange la droketre, matre troa qaja la aja i angatr, laka, pëkö troa hamë madra koi angatr. Thaa loi kö troa nue la itre ka huliwa i pital troa hamë madra. Maine troa canga atre hnene la itre droketre la itre ewekë hne së hna hni kow, me trotrohnine la aja së tro angatre a saene la itre pepa ka qaja mekötine la itre mekune së, haawe, pëkö ejolene koi angatre troa canga xöji së ke, pexeje asë hë la itre pepa, nge kolo fe a aijijë angatre troa iëne la itre drösinöe ka pëkö madra.

Qa ngöne laka, atreine hi troa asesëkötrë së hnene la ketre meci ka tru, haawe, canga wange jë enehila la itre ewekë nyine tro sa hmekëne memine la itre nekö së, matre troa neëne elanyi la itre jole göi xomi madra.—Ite edomë 16:20; 22:3.