Itre Keme Me Thine Fe—Amë Jë e Kuhu Hni Ne La Itre Nekö i Nyipunie La Itre Hna Majemine Ka Nyipi Ewekë
1 Thaa ka eje kö e kuhu hni angatre la itre hna majemine ka loi, nge ketre thaa ka traqa xane kö itre eje thei angatr. Ketre, troa ami ijine göi troa amë thene la itre nekönatre la itre hna majemine ka loi. Ame la hnaewekë hna hape “Amë” ke kola hape “tro pala hi a nango hamëne” maine pena “troa nango alöne trongëne.” Hna thele thene la itre keme me thine troa “hiane [la itre nekö i angatr] ngöne la ini me ihaji [“Iehova,” MN ].—Efe. 6:4.
2 Troa Nyiqaane e Nekönatre Petre Kö: Hna haine la aqane canga trotrohnine la itre nekönatre ka co la itre ewekë ka hnyipixe, me kuca kuca itre ej. Ngacama jole catre kowe la itre thupëtresije troa inine la ketre qene lapa ka hnyipixe, atreine la itre nekönatre ka co troa acaa tro inine me ithahnatane la luetre maine köni qene lapa. Thaa tro pi kö sa mekune ka hape, coco catre pala kö la nekö së, troa haneakökötrene thei nyudrene la itre hna majemine ka loi. Maine troa canga nyiqaane me sisedrëne la nyipici qa hnine la Tusi Hmitrötr, e itre hnepe macatre ne petre hi la nekönatr, tro ha nyialiene la mekune i nyëne hnene la atrehmekune ka troa “ainamacanë ne kowe la mel.”—2 Tim. 3:15.
3 Loi e Troa Majemine Troa Cainöj: Ame la ketre ewekë hna majemine kuca ka loi, nyine troa inine la nekönatre e co petre kö angatr, ke ene la troa cainöjëne la maca ka loi ne la Baselaia i Akötresie. Nyimutre la itre keme me thine ka ce nyiqaane cainöje ngöne itre hnalapa trootro memine la itre nekö i angatr, nge co catre petre kö nyudren. Kola xatuane la itre nekönatre hnene la itre keme me thine ka cainöje lapaa, troa hetrenyi la ajan, me hane catre fe troa cainöj. Loi e tro fe la itre keme me thine a amamane koi nyudrene la aqane troa xome la nöjei götrane ne la huliwa ne cainöje trootro.
4 Kola xatua nyudrene fe, e tro sa hane kuca la itre xötreqa ngöne la Ini Ne Cainöje Trootro Qaathei Akötresie. Celë hi ketre jëne troa ini angatre la itre hna majemine kuca ka loi göi aqane troa isa inine la Tusi Hmitrötr, me trotrohnine la itre hna e. Angatre fe a inine troa ce ithahnatane la Tusi Hmitrötr, me iwai hmaca, me xomiujine la ketre etid. Celë hi itre ini lai ka troa upi angatre troa pionie, me hane fedre kowe la itre hnëqa thatraqane la huliwa i Akötresie. Nyimutre la itre ka huliwa ngöne Bethela, me itre mesinare ka mekune hnyawa lo angatre a kuca la itre xötreqa nge co petre kö angatr, nge kola öhne laka, ketre hna amekötine lai ka xatua angatre ekö troa kuca la itre hna majemine ka loi.
5 Ceitu së asë hi memine la dro ka fedr ngöne la lue ihnatrapaime ne la Atre xupe la inege, ene Iehova. (Is. 64:8) Eje hi laka, troa hmaloi e troa loone ej, e ka hmuhmu pala kö. Ngo e nango qea ha la hne së hna nue, ke canga weliwele hi eje me catr. Ceitune hi lai memine la itre atr laka, ame ngöne la angatre a co, angatre a drenge thenge, nge kola hetre thangane ka loi fe ngöne la ijine thöthi nyudren. Ame la ijine angatre a co, celë hi itre ijine ne troa ini angatre hnyawa lai, ke hetre ajane i angatre troa kapa la ini, nge hneijine kola troa ami trepene maine kowe la loi, maine kowe la ngazo. Haawe, maine keme me thine së ka ihnim, canga nyiqaane jë së troa inine la itre nekö së troa melëne la itre ewekë hna majemine kuca ka loi, ngöne la huliwa ne cainöje ne la keresiano.