Nöj Ka Madrin e Celë Fen
1 “Manathithi la nöj’ e Iehova la Akötesi angat.” (Sal. 144:15) Itre trenge ewekë la ka amaman, la aqane madrin ne la Itretre Anyipici Iehova e celë fen. Pëkö madrin ka sisitria hune la troa nyihluen la nyipi Akötresie ka caas, nge ka mel, ene Iehova. Pine laka, ame “Akötesie tene manathith,” ngöne laka, ka madrin Nyidrë, haawe, kolo mina fe a mama la madrine cili thene la itretre thili koi nyidrë. (1 Tim. 1:11) Nemen la itre götran la hmi së ka troa hamë madrin kowe la mele së?
2 Itre Kepin Ka Hamë Madrin: Thaa ka thoi kö la mekun hna qaja koi së hnei Iesu, ene laka, troa eje the së la madrin, e hne së hna atrehmekun ka hape, “ite ka pë ewekë [së] ngöne la [“ua,” MN].” (Mat. 5:3) Troa ej the së la madrin cili, e hne së hna catre inin la Tusi Hmitrötr, me sin la itre icasikeu asë ne la ekalesia. Kola thepe së mina fe qa ngöne la itre iaö ne la hmi ka thoi me itre ini ne ej, qa ngöne laka, hne së hna inin la nyipici ne la Wesi Ula i Akötresie. (Ioane 8:32) Hna ini së mina fe hnei Tusi Hmitrötr la aqane mel ka sisitria. (Is. 48:17) Celë hi matre easë a madrin troa ce mel memin la itre Keresiano, sine ce huliwa së ka lolo thiina, e hnine la nöje ka madrin ne la itre trejine me easë.—1 Thes. 2:19, 20; 1 Pet. 2:17.
3 Troa atraqatr la madrine the së qa ngön la hne së hna xötrethenge la itre trenge wathebo i Akötresie ka draië, ke atre hi së laka, itre ej a thupë së me amadrinë Iehova. (Ite edomë 27:11) Hna qaja hnene la ketre ka ithuemacany jëne zonal, ka hape: “Ngacama tru catr la itre hna amekötin, ngo thaa mama kö ka hape hleuhleu la mele ne la Itretre Anyipici Iehova. Ohea, kolo jë pe ka hape, madrine jë angatr. Kola mama thene la thöth uti hë thene la qatr [ala nyimu e angatr] laka, hetre madrin thei angatr, nge lolo la aqane mel.” Nemen la aqane tro së a xatuan la itre xan matre troa hane ce thawa me angatr la madrin ka eje the së?
4 Xatuane Jë La Itre Xan Troa Hetreny La Madrin: Tiqa hnyawa la fen hnene la hleuhleu, nge ame kowe la itre atr ka ala nyim, troa itre drai ka ngazo la itre drai elany. Loi pe ame koi së, tre, troa lolo la itre drai elany, ke atre hi së laka, troa traqa la ijin troa paatr la itre ewekë ka ahleuhleun la mele ne la atr enehila. (Hna ama. 21:3, 4) Qa ngöne lai, loi e tro së a catr ngöne la huliwa ne cainöje trootro, me thel la itre atr ka hetre hni ne ajan, matre troa hane ce thawa me angatr la mejiun ka eje the së, memine la ini hne së hna kapa göi Iehova.—Ezek. 9:4.
5 Hna qaja hnene la ketre trejin föe ka pionie, ka hape: “Pëkö ewekë ka sisitria, nge ka hamë madrin hune la troa xatuan la itre atr troa atre Iehova, memin la nyipici Nyidrë.” Loi e tro asë hi së a kuca la hne së hna atrein, troa xatuan la itre atr ka nyimutre troa hane inin la Tusi Hmitrötr. Maine tro së a nyihlue Iehova me nue la mele së troa xatuan la itre xan troa hane nyihlue i Nyidrë, eje hi lai laka, tro ha hetrenyi the së la madrin atraqatr.—Ite Huliwa 20:35.