Nyine Troa Acatren Hnyawa La Enyipiewekën La Tusi Hmitrötr!
1. Ame ekö ngöne la qaan, tre, hna kuca thatraqai drei la zonal La Tour de Garde, nge koi drei la zonal L’Âge d’Or?
1 Ame ngöne 1 Okotropa 1919, macatre ne kolo hi lai a mama la pane numero ne la itus hna cinyihan qene papale, hna hape L’Âge d’Or. Pine nemen matre nyipi ewekë catr la jiane huliwa cili thatraqane la huliwa ne cainöj? Pine laka, hna cinyihane ej thatraqane la itre atr ka alanyim. Thaa tune kö la zonal La Tour de Garde laka, laka, hna cinyihane ej thatraqane hmekuje hi la “hnënge mamoe ka xalaith.” (Luka 12:32) Hnene la itretre cainöj hna kapa madrin la itus L’Âge d’Or, ene pe nyimu macatre nge draië catre kö la etrun la hna hamën ej hune la zonal La Tour de Garde.
2. Nemene pena ha la ëjen enehila lo lai zonal hna hape L’Âge d’Or nge nemene la aliene la zonale cili ngöne la qaan?
2 Ame la kepin matre kola cinyihan lai zonale ka hnyipixe cili, tre, matre troa amamane kowe la itre ka e ka hape, ame la Musi Keriso Ka Caa Thauzane Macatre, tre, eje a troa acil la ketre hneijine gool, ene la ketre hneijin ne tingeting me madrin kowe la itre atr; nge celë hi musi lai ka nyin la itre nöjei jol ne la atr. Ame ngöne la itre macatre, hetrenyi la itre ewekë hna saze thenge la hna ajan hnene la itre atr ne la itre ijine cili. Hna saze la ëj ngöne la macatre 1937, matre Consolation pena ha. Ame hë ngöne la macatre 1946, tre, kola hëne ju pena ka hape Réveillez-vous ! uti hë enehila.
3. Nemene la ewekë hna perofetan a hna catre eatrën hnene la zonal Réveillez-vous !
3 Ame la kola kapa la itre pane zonal, Réveillez-vous ! hetre thangane catre ej qaane lo 1919. (Mat. 24:14) Ngo, qa ngöne la enyipiewekën la hneijine së, loi e troa pane saze la itre xaa hnepe ewekë ngöne la zonale celë.
4. (a) Nemene la nyine troa kuca hnene la ketre atr ka ajan troa juetrë angeic ngöne la “drai ne elëhni i Iehova”? (b) Thenge la hna qaja ngöne Hna Amamane 14:6, 7, nemene la hna upi së asë troa kuca hnene la “angela [ka] sheshë e caha nyipine la hengödrai”?
4 Nyimutre la itre atr, itre milio la etrun ka madrine troa e zonal Réveillez-vous ! pine laka, ej a ithanatane hnyawa la nöjei mekun ka thaa qeje hmi kö. Eje hi lai laka, ame la itre atr ka sin la Drai Ne Amekunën ngöne la nöjei macatre, tre, ka e pala hi la zonal Réveillez-vous ! Haawe, maine kola ajan hnene la ketre atr troa juetrë angeic ngöne la “drai ne elëhni Iehova,” thaa tro hmekuje kö së a e ju hi la itre itusi së.—Zef. 2:3; Hna ama. 14:6, 7.
5. (a) Qaane la Réveillez-vous ! ne Januare 2006, nemene la hnene la zonale cili hna troa amamane hnyawa? (b) Nemene la hna troa thele troa kuca hnene la itre atr ka ala nyim, nemene la hna perofetan ka eatre jëne lai?
5 Qa ngöne lai, qaane e Januare 2006, tro la zonal Réveillez-vous ! a amamane hnyawa la enyipiewekën la Baselaia i Akötresie. Ej a troa ithuecatr kowe la itre ka e, troa ujë kowe la Tusi Hmitrötr matre troa thele nyin la itre jole i angatr, me amamane hnyawa la aqane qejepengöne la Tusi Hmitrötr la itre ewekë ka traqa koi së enehila. Tro hë la itre ka e la Réveillez-vous ! a trotrohnine hnyawa la alien la itre ewekë cili ka traqa, ene pe troa upi angatr troa hane thele troa atre Iehova hnyawa.—Zak. 8:23.
6, 7. (a) Nemene la aqane tro Réveillez-vous ! a xatuane la itre atr ka ala nyim troa trongën la 1 Thesalonika 2:13? (b) Aija troa mama la Réveillez-vous !, nge ije qene hlapa hna troa ketr hnene la itre ewekë ka saze ngöne la zonale cili?
6 Tro pala hi la zonal Réveillez-vous ! a hamën la itre topik hna pi atre hnene la itre atr. Ngo tro fe hë a hane qaja atrune fe la Tusi Hmitrötr. (1 Thes. 2:13) Pine laka, kola hamën hnene la zonal La Tour de Garde la itre ini qa hnine la Tusi Hmitrötr, nge Réveillez-vous ! a troa hane hamën la itre topik hna nyitrepen hnei Tusi Hmitrötr, haawe, thaa nyipi ewekë hmaca kö troa alua kapa la Réveillez-vous ! ngöne la treu. Qa ngöne lai, qaane e Januare 2006, tro pe hi a kapa la caas, thaa lue Réveillez-vous ! hmaca kö ngöne la treu. Kolo hi lai a troa ahmaloeën la itre huliwa göi troa hnëkën, me ujën, me iupi fë.
7 Kola e la 40 koi 100 lao qene hlapa ka ujën la zonal Réveillez-vous ! Nyimutre hë la itre ka ujën caasi ngöne la treu la zonale cili, ame itre xan tre, ngöne la nöjei köni treu. Ame koi zonal La Tour de Garde, tre, thaa saze kö.
8. Tune kaa la aqane troa xome la zonal Réveillez-vous ! me Tour de Garde?
8 Ijije hi troa ce hamën ngöne la treu la zonal Réveillez-vous ! memine la lue zonal La Tour de Garde ne lai treu cili. Ame itretre cainöj ka tro fë la zonal Réveillez-vous ! tre, ijije hi tro angatr a xome la zonale ka caas ngöne la treu ka pexej, nge thaa tro kö a saze la aqane troa nyiqaane ithanata ngöne la kola tro fë ej.
9. Nemene la ewekë ka tru hna troa kuca jëne la zonal Réveillez-vous ! ?
9 Qaane lo kola mama la pane zonale cili ngöne la macatre 1919, ngöne la kola pane hën ka hape, L’Âge d’Or, Consolation, nge enehila tre Réveillez-vous !, sisitria la huliwa ne cainöj hna kuca jëne zonale celë. Easë a thithi koi Iehova matre tro pala hi Nyidrëti a amanathithin la aqane tro fë la zonale hna saze, me xatuane la itre atr ka ala nyim qa ngöne la “ite xöte nöj’ asë, me ite tribu, me nöjei ate, me ite qene hlapa” matre troa xome la Baselaia i Akötresie ceitune me mejiune ka caas koi angatr.—Hna ama. 7:9.1.