Cainöjëne Jë Së La Maca Ka Loi Ne La Ewekë Ka Sisitria
1 Enehila, 117 hë lao macatre ne isigöline hnene La Tour de Garde la nyipici ka eje e hnine la Tusi Hmitrötr. Kola e pala hi la 18 950 000 lao zonal e ca numero, nge hna ujëne kowe la 125 lao qene hlapa. Ame Réveillez-vous! ke, eje a sajuëne la wesiula i Akötresie, matre enehila, 15 730 000 hë lao zonale hna fejan, ngöne la 80 lao qene hlapa.—Wange ju la Kolose 1:23.
2 Itre Zonale a Aejëne La Itre Aja Ne La Ua: Hetre thangane catre La Tour de Garde me Réveillez-vous! kowe la itre milio lao atr ka hni ka menyik, ngöne laka, hetre ixatua hna kapa matre troa aejëne la itre aja i angatre ngöne la ua. Hna amamane la itre hna cinyihane nyine eköthe la lapaune ne la atr. Hanawange la ketre ceitun, ngöne La Tour de Garde ne 1 febuare, 1996, hne së hna inine la taane mekune ka qaja la enyipiewekëne la troa mejiune koi Iehova, memine la Wesiula i Nyidrë. Ketre, hna xatua së ngöne La Tour de Garde ne 1 maac, 1996, troa catre huliwa i Iehova, me mejiune koi Nyidrë. Drei la ithuecatre hne së hna kapa ngöne la easë a ithahnatane la ewekë hna perofetane hnei Zefania! Nge ngöne La Tour de Garde ne 15 maac, 1996, hetrenyi la itre mekune ngöne la aqane mele nyipici ne la Keresiano, celë hi itre xaa tane mekune lai nyine ithuecatre koi së. Ngöne La Tour de Garde ne treu Mei drai 15, hetrenyi la ketre hna cinyihane ka amamane hnyawa la enyipiewekëne la troa e pala hi la Wesiula i Akötresie, memine la troa inine lapaane ej. Itre hna cinyihane la, nyine troa ajuine la trotrohnine së göne la Wesiula i Akötresie, memine la aqane akökötrene la trenge ajane së kowe la Baselaia.
3 Ketre, hetrenyi e hnine la itre zonale celë la itre ixatua ka lolo göi aqane troa ujë thenge la aja i Akötresie, maine ngöne la thiina ne keresiano, ka hetre thangane nge thatraqane la hneijine së, me ngöne fe la itre xaa mekune ka nyipiewekë catre kowe la mele ne la atr. Itre eje a qeje pengöne hnyawa la itre la itre jole ka tru ka akötrëne la mele së. Celë hi matre, easë a madrine la edraiëne memine la enyipiewekëne la mele së enehila, me mejiune laka, troa eatre elanyi lo itre hna thingehnaeane hnei Akötresie, ene la ewekë ka sisitria thatraqai së.—Isa. 48:17; 1 Tim. 6:19.
4 Maine tro së a pane acaa goeëne hmaca, lo hna qaja ngöne la götrane 4 ne la nöjei Réveillez-vous! tro hë së a hetrenyi la sipu kepine matre troa hamëne la zonale celë, kösë itre itusi ka sisitria nyine troa e asë hnene la nöjei atr, itre thöthi me itre qatr. Hna qaja e cili ka hape: “Réveillez-vous! a ithahnata kowe la nöjei atrene la fami. Eje a amamane la aqane troa cile kowe la itre jole ne la hneijine së. Eje a ithuemacany, me qaja la isa aqane mele ne la nöjei atr ngöne la itre götrane ne la fen, nge kolo fe a ithahnatane la itre mekune göi hmi me göi sias. Ngo thaa eje hmekuje kö a e ju hi la itre ewekë cili. Eje fe a qeje pengöne hnyawa itre ej, me qaja amamane la nyipi aliene la itre ewekë ka traqa enehila, ngo thaa eje fe kö a hane kuci politik, maine atrune pena la ketre nöje hune la ketre. Nge ame la ewekë ka sisitria catr, ke, ene laka, kola eköthe hnene la zonale celë, la lapaune kowe la itre hna thingehnaeane hnene la Atre ixup, ene la fene ka hnyipixe gaa tingetinge me lapa xetietë, ka troa nyihnane la fene celë ka ngazo nge ka pë drengethenge.”
5 Hamëne Jë Fe La Itre Zonale Kowe La Itre Xan: Loi e tro së a hetre ajane troa hamëne La Tour de Garde me Réveillez-vous! (Wange ju la 1 Timoteo 6:18.) Canga xome jë la itre zonal, matre atreine epuni troa hamëne kowe la itre atr hna troa ixelë memin. (Ate cai. 11:6) Loi e tro asë hi së itretre cainöj, tune fe la itre thöthi memine la itre ka xötrei cainöj, a hane sine la hamë zonale trootro ngöne la treu celë, nge loi e troa huliwane lo itre xaa mekune hnine lo lai itre hna cinyihane ngöne la itre zonal, matre nyijëne troa nyiqaane ithahnata. Loi e troa atrepengöne hnyawa la aliene itre ej, nge hamëne ju itre eje hnene la hni ka menyik, me mejiune ka tru.
6 Hetrenyi hnine La Tour de Garde me Réveillez-vous! la ithuemacanyi hna ajane hnene la nöjei atr asë. Maine hne së hna hane hamë angatre la itre zonal, celë hi aqane lai ka sisitria, ka troa xatua angatre troa hane atre la maca ka loi, ene laka easenyi hë troa traqa la ewekë ka lolo!