Kola Sa La Itre Hnyinge i Nyipunie
◼ Nemene la nyine tro la nöjei atr a kuca, matre thaa jol e troa kapa la ini ngöne la itre icasikeu ne la ekalesia? (Deu. 31:12)
Maine eje the së la hni ne metrötr koi Iehova me kowe la itre icasikeu ne la ekalesia hnei Nyidrëti hna hnëkën, haawe, loi e tro asë hi së a canga traqa me isa hnëkë hnyawa troa kapa la ini qaathei Nyidrë. Tro ha xatua së e hne së hna lapaane la itre göhnë ngöne la qëmeken, me nue pë hë la itre göhnë ngöne la pun thatraqane la itre ka trene nekönatr ka co maine pena kowe la itre ka traqa hmitr. Qëmekene troa nyiqaane la itre icasikeu, loi e thaa tro kö a ajolëne la itre atrene la icasikeu hnene la itre telefone së me itre xaa ewekë ju kö. Tro ha co la itre mejene ilu, e atraqatre la metrötre ne la itre atr ngöne la itre ijine icasikeu.—Ate Cai. 5:1; Fil. 2:4.
Maine hetre itre atr ka xötrei sine la itre icasikeu, maine jë tro la ketre trejine ne la ekalesia ka atre angatr, a sipon troa lapa ezi angatr. Tro ha ketre ixatua lai, e ala nyimu la itre nekönatr ka co nyine troa inin. Maine jë ketre ewekë ka hnyipixe lai kowe la fami troa sine la itre icasikeu. Maine ka trene nekönatre angatr, haawe, loi e tro angatr a lapaane la itre göhnë ngöne la pun matre thaa tro kö a ajolëne la itre xan, nge hmaloi koi angatr troa lö fë la itre nekö i angatre ka co qa hnine la hna icasikeu. (Ite edomë 22:6, 15) Thaa tro kö la itre keme me thine a ce lapa memine la itre nekö i angatr ka co ngöne la ketre hnahag, me nue angatr troa ilu maine elo pena. Ka lolo catr e tro la keme maine thine a lö fë la nekö i nyidro qa hnine la hna icasikeu matre troa hajin me kuca la itre ejolene la itre nekönatr, nge thupene lai troa isa lapa göhnene hmaca.
Kola thele hnene la itre ka ikep matre troa tro loi la aqane trongene la icasikeu memine la hnë hmi koi Akötresie. Angatr a xatuane la itre fami, memine lo itre ka traqa hmitr troa isa hetre göhnen. Angatr a ithanata amenyikeny me ithanata aconyi ngöne la kola xatuane la itre xaa atr troa thele göhnë, matre thaa tro kö a ajolëne menune la itre atrene la icasikeu. Hetrenyi thei angatr la atreine waiewekë me inamacane ngöne la aqane troa cile kowe la ketre ewekë ka troa ajolëne la icasikeu. Maine kola ajolëne la itre ka dreng hnene la aqane ujë ne la ketre nekönatr, loi e tro la itre ka ikep a hamëne la ixatua i angatr cememine la thiina ka menyik.
Loi e tro la nöjei atr asë ka icasikeu troa hmi koi Akötresie, a kuca matre thaa tro kö a jol e troa kapa la ini göi Iehova me aja i Nyidrë, ene la troa acile la ketre fen ka hnyipixe ka tingeting me ka meköt.—Heb. 10:24, 25.