Loi e Tro Sa Drenge Hnyawa La Itre Trenge Ewekë Ka Hmitrötr
1 Thaa hne së kö hna wangatrune catrëne la nöjei ewekë hna qaja hnei ketre atr. Ngo, nyine iamele la tro sa drenge hnyawa me wangatrune la Akötresieti a ithahnata. (Deut. 28:1, 2) Eloine pe, hna cinyihane “la wesi ula i Akötesie” hnene la itre atr hna upe hnei uati hmitrötr. (Rom. 3:2) Tro la kovasio ne distrik ka troa xulu a aijijë së troa drenge la itre trenge ewekë cili, maine hna e maine hna ce ithahnatane itre ej. Tro sa drenge hnyawa tune kaa?
2 Loi e Troa Canga Traqa e Nöjei Hmakany: Drei kö la madrinene la itretre Isaraela, ngöne la kola thuemacanyi angatre troa itronyi me Iehova ngöne la wetr e Sinai, troa drenge la Trenge Wathebo i Nyidrë! (Eso. 19:10, 11, 16-19) Maine atraqatre fe la madrine së troa kapa la ini qaathei Iehova ngöne la kovasio ne distrik, haawe, tro hë së a hnëkë hnyawa matre troa canga traqa e nöjei drai. Thatreine kö tro sa drenge asë la porogarame e hne së hna traqa hmitr, nge easë fe a ajolëne la itre xane troa dreng, ngöne la easë a thele göhnë. Troa fe la itre qëhnelö ne hnë kovasio e 8 h, nge troa nyiqaane la porogarame e 9 h 30 ngöne la nöjei drai.
3 Hetre ithuemacanyi fe kowe lo itre ka canga traqa ngo ka pine cile agö troa porotrike qëmekene troa nyiqaane la porogaram. Pine nemene lai? Hna majemine troa treqene tro la perezida ne la kovasio a nyiqaane hnene la nyima, nge thupene lai angatre a thupa ju la porotrik, me isa tro koi göhnen. Loi e tro sa mekune hnyawa laka, qëmekene troa thinge la nyima ne nyiqaan, itre menetre ne itreqe hë la perezida ngöne la ita hmitrötr, a kola treqene matre fenesi pi lo lai miuzik ne nyiqaan. Celë hi lo hatrene lai ka upi së tro sa isa lapa göhnen! Haawe, ame hë la kola könë së troa nyima, ke, loi e easë hë ngöne isa göhnë së, matre ijije koi së troa hane ce cile memine la itre trejine me easë troa atrunyi Iehova.
4 Drenge Hnyawa Ju Tune La Ketre Fami Ka Caas: Ame la kola e la itre trenge ewekë ka hmitrötre kowe la icasikeu i angetre Isaraela, ke kola drenge me ini hnene la itre hnepe lapa, tune fe la itre “nekönat.” (Deut. 31:12) Haawe, thaa loi kö e troa “nue” la itre nekönatr. (Ite edomë 29:15) Itre keme me thine fe—hnëkë hnyawa jë matre tro asë hi la fami a ce lapa, me itre thöthi fe. Hnene la itre xaa keme me thine hna majemine treqene la kola nyiqaane thinge la nyima, matre troa tro fë la itre nekö i angatre kowe la hnë saze i itre medreng. Ngo, thaa aqane tro kö lai a amamane kowe la itre nekönatr, laka, nyipi ewekë la itre nyima me itre thithi ngöne la itre icasikeu së. Drei lai eloine e troa canga kuca la itre hne së hna ajane ngöne la hnë saze itre medreng, qëmekene troa nyiqaane la porogaram!
5 Thaa tro kö a jole koi së troa drenge hnyawa e hne së hna canga meköle e nöjei jidr, me thupëne la aqane xeni ngöne la drai. Catre jë troa drenge hnyawa, la hna qaja hnene la atre cile fë cainöj. Thipetrije pi la itre mekune ka ananyi së qa ngöne la cainöj. Xome jë la itre mekene tusi ngöne la kola e itre ej. Xomi note jë. Thupene la nöjei cainöj, ke, pane mekune hmaca ju la itre hna qaja hnene lai ka cile fë cainöj, nge wange ju la aqane troa trongëne la ini hna hamën. Ame hë e hej, ke, ce ithahnatane jë me fami la hna drenge ngöne la drai. Nemene la itre mekune ka tru, hna isa kapa madrine hne së isa ala caas? Tro la fami së a kepe thangane tune kaa, la itre ini cili?
6 Metrötrëne Jë La Wesi Ula i Akötresie: Hna nyijë së hnene la itre kovasio troa iöhnyi me porotrike memine la itre enehmu së, me acatrene la aqane imelekeu së me angatr. Maine tro sa canga traqa, ke troa hetre ijine tro sa pane porotrike me angatr, qëmekene troa nyiqaan. Itre xane a mekune menune laka, loi e tro angatre a ithahnata ananyine la hnë icasikeu, ke wanga ajolëne jë la itre atr troa dreng. Ngo, ngacama itre icasikeu la hna kuca ngöne la gaa tru atr, ngo ame pe, ke, ketre ijine tro fe së lai a hane drenge hnyawa, ceitune memine lo easë a sine lo itre icasikeu ngöne la Uma ne Baselaia. Thaa loi kö e troa traqa fë la itre telefon, maine ikaho, maine kamera, maine xomi foto pena, wanga troa thaa drenge hnyawa la itre atrene la icasikeu lo itre cainöj.
7 Ngöne lo ijine Mose a kapa la Trenge Wathebo qaathei Iehova, ke, “tha xeni kö angeic, nge kete tha iji kö.” (Eso. 34:28) Ketre ceitune mina fe memine la itre kovasio, laka, thaa loi kö e troa xeni me iji ngöne la ijine kola cile fë la itre cainöj. Maine thaa ka wezipo kö së, haawe, ma loi e troa treqene la sipu “ijine” thatraqane lai.—Ate Cai. 3:1.
8 Ame ngöne la itre xaa kovasio, ke, kolo pala hi a öhne la itre trejine trahmanyi me föe, me itre thöthi a cile agö ngöne la itre kuloar, nge nyipi ngöne hë la porogaram. Ase hë amekötine kowe la itre atrekë hnëqane la troa ikep, troa sipo angatre troa isa lapa göhnen. Tro la itre ka voloter ka huliwa ngöne la nöjei serevis, a canga isa lapa göhnene e ase hë la huliwa i angatr. Thaa nyipi ewekë kö troa aqeane ju pë hë ngöne la itre serevis, maine tro pena a itrokeu ngöne la ijine kola icasikeu; hetrenyi kö la itre nyipi kepine matre itre xaa trejine petre kö ngöne la serevisi angatr.
9 Thaa ajane kö së troa “xetie e tro sa dreng” la Wesi ula i Akötresie. (Heb. 5:11) Qa ngöne lai, catre pi së troa amamane la metrötre së, jëne la aqane drenge hnyawa së la itre trenge ewekë ka hmitrötre i Iehova, ngöne la kovasio ne distrik ka troa xulu.