“ Viens, suis-moi ”
1. Nemene la hna aijijë së hnene la Ini Tusi Hmitrötr Ne La Ekalesia ngöne la itre treu ka troa xulu?
1 Kola qeje pengöne hnyawa la mele i Iesu e celë fen, ene la Hupuna i Akötresie hnene lo foa lao Evangelia. Hnene laka nyipi ewekë tro la itre Keresiano a “xöte thenge la ite thupa ca i nyidë,” haawe, loi e tro sa hnëkëne hnyawa me wanga atrune la itus “ Viens, suis-moi ” hna troa ithanatan ngöne la Ini Tusi Hmitrötr Ne La Ekalesia qaane e drai 1 Maac me wiike cili. (1 Pet. 2:21; Mar. 10:21) Nyipi ewekë catre tro sa wanga atrune la itre götran ne la mele i Iesu, ke, tro itre ej a ithuecatre koi së ngöne la huliwa ne cainöj.
2. Tro sa kepe thangane tune kaa qa ngöne la tulu i Iesu, ene la troa xomihni ahoeany?
2 Tulu Hna Amë Hnei Iesu: Hapeu, hane kö epuni ixelë memine la ketre atr ka ujë angazonyi koi epun ngöne la epuni a cainöje ngöne itre hnalapa trootro? Maine epuni a cile kowe la jole cili, haawe, epuni hi lai a melëne la hna qaja hnei Iesu, ka hape: “Maine ase hë angat’ axösisi ni, tro angat’ a axösisi nyipunieti fe.” (Ioane 15:20) Nyipici laka, thaa ketre aqane iaxösisi kö la nöjei aqane sa angazon ne la itre atr. Ngo hnene la madrin ka eje qëmeke i Iesu hna aijijë nyidrë troa xomihni ahoean ngöne la nöjei pengöne itupathi me jol. Ketre, loi e tro mina fe sa wanga atrune la aqane troa kepe së hnei Iehova me kapa la itre manathithi qa ngöne la hne së hna mele nyipici. Tro lai a sewe së troa ‘kucakuca me menumenu ngöne la itre hni së.’ (Heb. 12:2, 3; Ite edomë 27:11) Pine laka easa catre cainöj, haawe, ijije tro sa mejiune kowe la ixatua i Iesu Keriso.—Mat. 28:20.
3. Tro sa xome tune kaa la aqane waiewekë i Iesu ngöne la huliwa ne cainöj?
3 “Hna Upi Ni Thatraqane Lai”: Hnei Iesu pala hi hna amë panën ngöne la mele i nyidrë la huliwa ne cainöjëne la Baselaia. (Luka 4:43) Hnei nyidrëti hna nue la mele i nyidrë matre troa cainöj. Nyidrëti a goeëne la huliwa cili ceitu me ketre huliwa ka sisitria, ene pe nyidrëti a thele la nöjei ijin matre troa cainöjëne la Baselaia. Pine laka itre ka xome së la tulu i Iesu, nemene la thangane koi së e troa trongëne la itre thupa ca i nyidrë? Ame ngöne la easa kuca la itre huliwa së ngöne la nöjei drai, tre, easë kö a thele troa cainöjëne la maca ka loi kowe la itre atr hne së hna ixelë memin? Epi tro la ihnimi ka eje thei Keriso, a uku së troa cainöjëne la maca ka loi kowe la ka ala nyim e cailo fen asë!—2 Kor. 5:14.
4. Nemene la itre aqane tro sa maca hnyawa ngöne la huliwa ne cainöje së?
4 “Pëkö Ate Ewekë Tune Lai”: Nyimutre la itre atr ka drei Iesu ka haine la aqane hamë ini i nyidrë. (Ioane 7:46; Mat. 7:28, 29) Nemene la isapengöi nyidrë memine la itre xaa atre hamë ini? Hnei nyidrëti hna hnine la itre nyipici hna hamën, me hnime la itre atr hna inin, nge nyimu aqane hamëne nyidrë la itre ini. Maine easa ajane troa nyitipune la Atre Hamë Ini Ka Sisitria, loi e tro sa thele troa maca hnyawa ngöne la huliwa ne cainöje së.—Luka 6:40.
5. Nemene la aja hne së hna thele troa eatrën, ngöne la easa inine la itus “ Viens, suis-moi ”?
5 Celë hi la itre xaa mo ka sisitria ka mama ngöne la mele i Iesu. Nemene la itre xaa trenga mo hnei epuni hna troa öhn? Ame ngöne la epuni a inine la mele i Iesu ngöne la ijine Ini Tusi Hmitrötr Ne La Ekalesia, catre jë troa eatrëne la aja celë, ene la troa “ate la ihnimi Keriso” hnene la hna nyitipune la aqane ithanata me aqane ujë i nyidrë.—Efe. 3:19.