Ketre Huliwa Ka Hamë Madrin
1. Nemene enehila la huliwa ka aloine la meci ne la itre atr ngöne la götrane la ua?
1 Kola elitrauje la madrine ne la itre atr ka sine ekö la kola aloine la meci ne la ketre atr. (Luka 5:24-26) Ame ngöne la hneijine së, easë mina fe a madrin troa hane xome la ketre huliwa ka xatuane la itre xaa atr troa hane atre Iehova. (Hna ama. 22:1, 2, 17) Drei la madrine së ngöne la easa e la itre hna melën ka amamane la aqane saze la mele ne la itre atr, angatr isa ala cas, hnene la Wesi Ula i Iehova me uati hmitrötre i Nyidrë! Ngo eje hi laka sisitria catre kö la madrine së ngöne la easa xome la huliwa cili, hnene la hna xomiujine la ini Tusi Hmitrötr ne la ketre atr ka kökötre hnyawa.
2. Nemene la madrin hne së hna melën ngöne la easa xatuane la ketre atr troa atre la nyipici?
2 Drei la ëje i Akötresie? Pine nemen matre Nyidrëti a nue la itre akötr? Nemene la hna troa kuca elany hnene la Baselaia i Akötresie thatraqane la itre atr asë? Nyipici laka easa madrine troa sa la itre hnyinge celë, ngo atraqatre catre kö la madrine së ngöne la kola atre la nyipici hnene la ketre hnainin. (Ite edomë 15:23; Luka 24:32) Hnene laka kola kökötre hnyawa la hnainin, ene pe tro hë angeic a nyiqaane xome la ëje i Iehova, me saze la aqane heetre me iseji angeic, me thipetrije la itre huliwa ka ngazo hnei angeice hna kuca ekö, me nyiqaane cainöje kowe la itre xaa atr. Maine tro angeic a kökötr uti hë la troa sa xepu me xomi bapataiso, eje hi lai laka, tro hë angeic a ketre trejine me easë me ketre atr ka ce huliwa me easë. Itre ewekë lai ka amadrinë së.—1 Thes. 2:19, 20.
3. Nemene la itre nyine troa kuca matre tro sa nyiqaane inine la Tusi Hmitrötr memine la ketre atr?
3 Ijiji Epuni Fe Kö Troa Hane Xome La Huliwa Cili? Maine epuni a ajane troa hane xome la huliwa ka lolo cili, sipone jë koi Iehova troa aijijë epuni troa xomiujine la ketre ini Tusi Hmitrötr memine la ketre atr, nge catre jë troa ujë thenge la itre thithi epun. (1 Ioane 5:14) Cainöje jë ngöne la itre götran me ngöne la itre ijin ka aijijë epuni troa öhne la itre atr. Thele jë troa nyiqaane inine la Tusi Hmitrötr memine la itre atr, ngöne la nöjei ijine ka ijij. (Ate cai. 11:6) Maine hnei epuni hna traane la ketre itine feja ne nyipici e kuhu hni ne la ketre atr ka hetre hni ne ajan, haawe, bëeke hmaca jë troa fie lai itine feja.—1 Kor. 3:6-9.
4. Pine nemene matre nyipi ewekë tro sa thele matre tro la itre atr a inine la Tusi Hmitrötr qëmekene troa nyipune la huliwa?
4 Nyimutre pala kö la itre atr ka pi xen me pi iji la thiina ka meköt. Drei la ka troa xatua angatr troa sajuëne la aja ka eje thei angatr troa atre Iehova, ene la troa inine la Tusi Hmitrötr me angatr? (Mat. 5:3, 6) Epi tro sa nue asë la mele së matre troa apexejene la huliwa ne cainöj me inine la itre atr, qëmekene troa nyipune la huliwa ne menu.—Is. 6:8.