Catre Jë Së Amamane La Hni Ne Ole Së Troa Atrune La Drai Ne Amekunën e Drai 17 Eiperem
1. Nemene la aliene hni ne la atre cinyihane la salamo ka ihmeku hnyawa ngöne la hneijine ne la Drai Ne Amekunën?
1 Hnene la etrune la hni ne ole ne la atre cinyihane la salamo, kowe la nöjei hatrene la ihnimi ipitö i Iehova me aqane iamele Nyidrë, ene pe angeic a thel, ka hape: “Tro ni a të hnei nemene koi Iehova la ite loi asë i nyidëti koi ni?” (Sal. 116:12) Celë mina fe la sipu kepin matre eje thene la itre hlue i Akötresie enehila la hni ne ole. Ame ngöne lo itre hadredr lao macatre thupene la hna cinyihane la trenge ewekë celë, hnei Iehova hna hamëne kowe la nöjei atr asë la ketre ahnahna ka tru, ene la thupene mel. Pine laka easa hnëkë troa atrune la meci Iesu e 17 Eiperem, haawe, hetrenyi së la sipu kepin matre tro sa amamane la hni ne ole së.—Kol. 3:15.
2. Nemene la itre xaa kepin matre nyipi ewekë tro sa hetre hni ne ole kowe la thupene mel?
2 Itre Manathithi Qa Ngöne La Thupene Mel: Hnene la thupene mel, ene pe ijije hi troa “nue tije la nöjei ngazo” së. (Kol. 1:13, 14) Eje mina fe a aijijë së troa hmi koi Iehova cememine la mekuthethew ka wië. (Heb. 9:13, 14) Easë mina fe a madrine troa hni ka nyipici koi Iehova ngöne la easa thithi koi Nyidrë. (Heb. 4:14-16) Ketre, ame la itre atr ka lapaune kowe la thupene mel, tre, hetrenyi angatr la mejiune troa kapa la mele ka thaa ase palua kö!—Ioane 3:16.
3. Tro sa amamane tune kaa la hni ne ole së koi Iehova Atre hamëne la thupene mel?
3 Aqane Troa Sa Amamane La Hni Ne Ole Së: Ame la ketre aqane tro sa amamane la ejuine la hni ne ole së, tre, ene la troa e o drai lo itre xötre ne la Tusi Hmitrötr thatraqane la Drai Ne Amekunën, me hane sine thele itre ej. Eje ngöne La Tour de Garde ne 1 Febuare 2011, la ketre hna cinyihan ka troa xatua së troa ujë tune lai; ame la taan, tre, “Êtes-vous prêt pour le jour le plus important de l’année ?” (Nyipunieti kö a lapa treqene la drai ka nyipi ewekë ngöne la macatrqe.) Ketre, ijije fe hi tro sa thithi koi Iehova cememine la hni ka pexej, me qaja koi Nyidrë la enyipiewekëne koi së la thupene mel. (1 Thes. 5:17, 18) Easë mina fe a amamane la hni ne ole së hnene la hna sine la Drai Ne Amekunën, tune lo hna amekötine koi së hnei Iesu. (1 Kor. 11:24, 25) Ketre, easa nyitipune la ihnimi ka tru i Iehova, me hane könëne la ka ala nyim matre troa hane ce sine me easë la drai cili.—Is. 55:1-3.
4. Nemene la nyine tro sa catre kuca?
4 Ame la itre hlue i Iehova ka hetre hni ne ole, tre, thaa angatre kö a wanga acone la Drai Ne Amekunën. Celë hi ketre icasikeu ka sisitria catr ngöne la macatre! Pine laka easenyi hë la Drai Ne Amekunën, epi tro sa catre ujë tune la atre cinyihane la salamo, kola hape: “Unge fe, ole Iehova jë, nge the thëthëhmine kö la ite ihnimi nyidë.”—Sal. 103:2.