‘Epi Troa Ahmitrötrëne La Atresiwa i Akötresie’
1. Nemene la tan la asabele ne sirkoskripsio ne la macatre ne huliwa ne 2012, nge hna xome qa ka la tan cili?
1 Drei la ketre manathithi ka tru hne së hna kapa, ene la troa xome la ëje i Iehova lo Atre musi cile e Koho Hnengödrai me e Celë Fen. Nyidrëti kö la ka upi së troa xome la ëje cili; hawe, qane lo macatre 1931, hna ati ëjene la nöje i Iehova ka hape, Itretre Anyipicine i Iehova. (Is. 43:10) Hnei Iesu lo Hupuna i Akötresie ka cas hna wangatrune hnyawa la ëje i Akötresie, me amë panëne ej ngöne lo tulu ne thithi nyidrë. (Mat. 6:9) Hna xome la trenge ewekë cili, matre troa nyi tan la asabele ne sirkoskripsio ne la macatre ne huliwa ne 2012. Kola qaja ka hape, ‘Epi Troa Ahmitrötrëne La Atresiwa i Akötresie.’
2. Nemene la itre ithuemacanyi hne së hna troa kapa?
2 Itre Mekun Hne Së Hna Troa Dreng: Ame la cainöj hna troa cile fë e Mecixen, hna hape, “Kola Ahlemune La Ëje i Akötresie Hnene La Itre Hlue Ka Cainöj Ngöne La Drai Ka Pexej” tre, eje a troa amamane la kepine matre ketre aqane mele ka lolo la troa cainöj ngöne la drai ka pexej. Easë mina fe a troa drenge la cainöje celë hna thawa nyimutren, hna hape, “Thupëne Kö Wanga Qaja Angazone Jë La Ëje i Iehova,” nge eje a troa xatua së matre tha tro kö sa kei kowe la foa lao hnö. Kola troa sa la lue hnying hnene la cainöje celë, hna hape, “Pine Nemene Matre Nyipi Ewekë Troa Ahmitrötrëne La Atresiwa i Akötresie;” ame la hnapan, tre, Nemene la ka troa xatua së troa catre cainöj kowe la itre atr ka tha semesine së kö? nge ame la hnaluen, tre, Nemene la ka troa xatua së troa maca me hetre thangane la huliwa ne cainöje së? Ame e Sabath, tro ha cile fë la ketre cainöj ka foa lao götran, nge ka troa amamane la aqane tro sa ahmitrötrëne la atresiwa i Akötresie hnene la itre mekuna së, me trenge ewekë së, me itre mekune hne së hna axeciën, me itre huliwa së. Tro hë la itre atr ka xötrei traqa a madrine troa drenge la cainöje celë koi nöjei atr, hna hape, “Tro Iehova a Ahmitrötrëne La Ëje i Nyidrë Ka Sisitria e Amagedo.”
3. Nemene la manathithi ka tru hne së hna troa kapa, nge troa xatua së tune ka hnene la porogaram?
3 Calemi catre hë la ijine tro Iehova a ahmitrötrëne la ëje i Nyidrë. (Ezek. 36:23) Eje mina fe the së la manathithi ka tru troa anyipicine kowe la nöjei atr asë, laka, easë la itre atr ka xome la ëje i Iehova ka hmitrötr. Ka xecie hnyawa koi së, laka, tro la porogarame ne la asabele ne sirkoskripsio celë a xatua së isa ala cas, troa eatrëne hnyawa la hnëqa së ka tru, ene la troa xome la ëje i Akötresie.