Porogarame Ne Asabele Ne Sirkoskripsio Ka Troa Xulu
1 Troa nyiqaane e treu semitrepa, nge ame la taane ne la itre asabele ne sirkoskripsio, ke, hna hape “Drenge ju, me inine jë troa xötrethenge la Wesi ula i Akötresie.” Hna xome la taane celë qa hnine la tusi Deuteronomi 31:12, 13, nge taane lai ka ijije kowe la porogarame ka pexej, ke, kola troa amamane hnyawaane la itre ini hne së hna ajane troa atre, me trongën.
2 Ngacama, nyimutre la itre atr enehila ka drenge la itre trenge ewekë ka menu, nge ka xulu qa thene la itre dremoni, qa ngöne lai, sisitria catre koi së troa drenge la Wesi ula i Akötresie, me inine troa xötrethengen’ej. (Luka 11:28; 1 Tim. 4:1) Thenge la mekune celë, ke, hna hnëkëne lai asabele ne sirkoskripsio nyine troa ithuecatr, me hamë ixatua kowe la itretre cainöj, kowe la itre fami, kowe la itre qatre thup, me kowe la itre pionie. Ame e mecixeni, ke, troa kuca la ketre sëpoziom, hna thawa foan, nge hna nyitaane ka hape “Drenge ju me trongëne jë la Wesi ula i Akötresie—matre ijiji së troa cile kowe la itre jol.” Nge ame e hmakanyi ne sabath, ke, tro fe a kuca la ketre sëpoziom, hna nyitaane ka hape “Nemene la aqane haji së hnene la Itre Hna Cinyihane ngöne la meköt.” Tro la porogarame ka pexej’a hamë ixatua ngöne la ua, nge tha loi kö tro epuni me fami epuni a paatre la ijine cili.
3 E mecixeni me sabath, ke, troa hamëne la itre iamacany, me itre mekune hna hnëkëne ka loi thatraqane la huliwa ne cainöje trootro. Tro fe a qaja la itre ewekë hna melëne ka ithuecatr, me nyine ini koi së. Qa ngöne lai, e tro epuni a hane sin, me dreng, nge hetrenyi thei epuni la ajane troa trongëne la hnei epuni hna inin, ke, tha jole kö koi epuni troa xötrethenge hnyawa la itre hna amekötiine hnene la Wesi ula i Akötresie.
4 Ame la ketre götrane ka tru ne la asabele ne sirkoskripsio, ke, ene la kola bapataisone la itre ka xötrei hamëne la mele i angatre koi Iehova. Qëmekene la tro angatr’a fe amamane la aja i angatre troa nue la mele i angatre koi Iehova, ke, tro la nöjei ka mekune troa xome la bapataiso a qaja amamane la aja i angatre troa bapataiso kowe la atr thup perezida, matre hetre ijine kowe la itre qatre thup troa ce ithahnata me angatr.
5 Ame la taane la cainöje koi nöjei atr e ijine asabele ne sirkoskripsio, ke, hna hape “Pine nemene matre troa melëne la Tusi Hmitrötr?” Könëne ju la itre atr ka ajane troa hane sin. E ajane epuni troa kepe thangane la itre ixatua, me troa hane sine me fami epuni lai asabele, ke, loi e troa hnëkëne hnyawa matre tha tro kö la ketre ewekë a ajolë epun, wanga troa paatre ngöne la drai cili.