Xatuane Jë La Atr Troa Thele Mekun
1. Nemene la aqane nyiqane ithanata ka troa hetre thangane catr?
1 Hetrenyi la ketre aqane nyiqane ithanata ka hetre thangane ngöne la hna cainöje trotro. Hapeu, kola qaja la troa ithanatane la itre ini qathei Tusi Hmitrötr, maine pena troa xatuane la atr troa thele mekun matre troa xomi ini qa ngön? Hnei Paulo aposetolo hna ithanatane me angete Iuda ne Thesalonika la itre hna cinyihan, ene pe hane jë hi “ite xan’ e angat’ a kapa.” (Ite hu. 17:2-4) Kola hapeue la troa thele mekune memine la itre atr?
2. Tro sa xome tune ka la tulu hna hamëne hnei Paulo ngöne la easa cainöjëne la maca ka loi?
2 Wangatrune Jë La Itre Aliene Hni Me Aqane Mele Ne La Itre Atr: Ame ngöne la easë mekune troa xatuane la itre atr ngöne la teritoare së troa thele mekune, nyipi ewekë tro sa wangatrune la itre aliene hni angatr. Ame la Paulo a nyiqane cainöje koi angetre Heleni ngöne nyipine Areopago, hnei angeice hna pane amexeje la itre ewekë hnei angatre hna atre me kapa. (Ite hu. 17:22-31) Celë hi matre, ame la easa hnëkëne la aqane nyiqane ithanata së, loi e tro sa atrehmekune hnyawa la itre ini ka nyipici hna lapaune kow hnene la itre atr ne la teritoare së, memine la aqane goeëne angazonyi angatre hnene la itre xan. (1 Kor. 9:19-22) Maine angatr a amejëne la ketre mekune ka iajolë, thele jë troa itrotrohni, nge tupathe ju troa eköthe la ketre ithanata hune la itre hnei angatre hna qaja.
3. Tune ka la aqane tro sa xome la itre hnying, matre troa xatuane la itre atr troa thele mekune hnyawa?
3 Loi e Troa Maca La Aqane Tro Sa Hnying: Maine thatre kö së la götran hna cile ngön hnene la ketre atr, thatreine jë kö tro sa amamane la götrane hnei angeice hna tro kow. Ketre tune mina fe, thatreine kö së troa xatuane la atr troa ketre sipu trotrohnine la ketre ini, e thatre kö së la mekuna i angeic. Qëmekene tro Iesu a xatuane la ketre atr troa thele mekun, hnei nyidrë hna majemine troa hnyinge matre atre pengöne la itre mekuna ne la atr. Drei la ketre ceitun, ame la kola hnyinge hnene la ketre atr koi Iesu ka hape, “Nemene la qânge troa kuca mate troa hetenyi ni la mele ka tha ase palua kö?,” hnei Iesu hna pane thele troa atre la mekuna ne la trahmanyi qëmekene troa sa. (Luka 10:25-28) Ame ngöne la ketre ijine Iesu a wenë amekötine la aqane waiewekë i Peteru, hnei nyidrëti hna xome amacane hnyawa la hnyinge i nyidrë. (Mat. 17:24-26) Celë hi matre, maine kola hnying hnene la ketre atr maine qaja pena la ketre mekune ka tria, ijije hi tro sa xome la itre hnyinge matre troa xatua angeice troa hane thele mekun.
4. Pine nemene matre nyipi ewekë tro sa thele troa xatuane la ketre atr troa atreine thele mekun?
4 Ame la easa xatuane la ketre atr troa thele mekun, easë hi lai a nyitipu Iesu, lo Atre Ini Ka Tru; easë mina fe a xome la tulu ne lo itre ka maca me catre cainöjëne ekö la maca ka loi ngöne lo hneijine Iesu. Easë hi lai metrötre me nyipi angeic. (1 Pet. 3:15) Qa ngöne lai, maine jë tro ha hetre hni ne ajane i angeice tro sa bëeke hmaca troa wai angeic.