Troa Tro Fë La Itre Ithuemacanyi Ne La Baselaia Na. 38 e Nofeba!
1. Nemene la hna lapaa pune hnyingëne hnene la itre atr göne la itre ka mec, nge nemene la ketre jëne troa sa koi angatr ngöne la treu Nofeba?
1 Isa hmi ju hë la itre atr, ngo casi hi la ithupëjia memine la nöjei atr asë, a mec. (1 Kor. 15:26) Kola isa hnying ka hape, ekaa la itre sinee ka meci hë, nge ijije kö troa iöhnyi hmaca me angatr? Celë hi kepine matre, ca treu ka pexeje ne troa pane tro fë hnene la itre ekalesia e cailo fen asë lo sine pepa hna hape, Itre Ithuemacanyi Ne La Baselaia Na. 38; drei la tan, “Tro Kö a Mele Hmaca La Itre Ka Mec?” Kola nyiqaane la huliwa ne tro fë lai Itre Ithuemacanyi Ne La Baselaia e drai 1 Nofeba. Thupene hë la hna tro fë lai Itre Ithuemacanyi Ne La Baselaia Na. 38 ngöne lai treu Nofeba, tro pala pë hë sa tro fë ej ngöne la hna cainöje trootro, tune lo itre xa tarak.
2. Qeje pengöne jë la aqane kuca lai tarak Itre Ithuemacanyi Ne La Baselaia Na. 38.
2 Aqane Kuca: Hna kuca hi la Itre Ithuemacanyi Ne La Baselaia Na. 38, matre canga öhne ju hi hnei itre atr lai tan, memine lo lai hnyinge ka hape, “Ame koi epun, tre . . . eje hi? ohea? maine thatre kö epun?” Ame hë la kola fe lai Itre Ithuemacanyi Ne La Baselaia hnene lai atr, tro hë angeic a wange la aqane sa hnei Tusi Hmitrötr lai hnying, memine la aliene lai hna thingehnaean. Tro fe angeic a öhne la itre kepine matre ijije tro angeic a hane mejiune kowe la hna qaja hnene la Tusi Hmitrötr. Ame pë hë ngöne la tröne la Itre Ithuemacanyi Ne La Baselaia, hetre hnyinge nyine tro pë hë lai atr a lapa mekun, nge kolo fe a ithuecatre koi angeic troa thele jëne troa sa la itre xa hnyinge i angeic.
3. Nemene la aqane tro sa tro fë lai tarak Itre Ithuemacanyi Ne La Baselaia Na. 38?
3 Aqane Troa Tro Fë: Ceitune hi la aqane tro fë së elany la tarak celë, memine lo aqane tro fë së lo itre pepa ne ihë göi Drai Ne Amekunën, me asabele ne distrik. Tro la itre qatre thup a amekötine la aqane tro sa tro fë la itre pepa, ngöne la itre götrane hne së hna troa cainöj, thenge lo tusi hna iupi fë koi angatr, nge hna fejane ngöne lo drai 1 Eiperem 2013. Maine co hi la götrane hne së hna troa cainöje trootro, ijije hi tro fe sa hane sipone kowe la itre xa ekalesia ezi së, troa hane thue qa së. Ame la nyipunieti a kapa la Itre Ithuemacanyi Ne La Baselaia Na. 38, mekune kö troa xome hi la ka ijije thatraqane la wiik. Thupene la ijine hna amekötine ka hape, troa pane tro fë la Itre Ithuemacanyi Ne La Baselaia ngöne la itre hnalapa trootro, haawe, ijije fe hë troa tro fë e cahu hne së hna tro. Maine tha traqa pala kö së kowe la pune treu, nge pë hë tarak së, loi e troa tro fë lo sine itus hna amekötine troa tro fë ngöne la treu. Ame la nyine tro sa pane kuca ngöne la pane Mecixeni ne la treu cili, tre ene la tro sa tro fë tarak, nge pine pë hë la tro sa tupath troa nyiqaane ini Tusi me itre atr. Ketre tune mina fe e Mecixen me Sabath, troa pane tro fë tarak nge pine pë hë la itre zonal. Nyipunieti kö a hane hnëkë matre aijijë nyipunie troa hane sine la ijine tro fë lai tarak ka hnyipixe?