Itre Nyima Ka Hnyipixe
1 Ame lo drai 4 Okotropa 2014, drai ne kola icasikeu hnene la Watch Tower Bible and Tract Society of Pennsylvania, kola thuemacane la iatrene la icasikeu ka hape, kola troa wange hmaca la uke nyima së. Hana lai ketre maca ka lolo! Hna amexeje kowe la iatrene la icasikeu la enyipiewekëne la itre nyima ne hmi.—Sal. 96:2.
2 Ma tro epuni a hnyingëne ka hape: ‘Hnauëne laka kola troa wange hmaca la itre nyima?’ Nyimu kepin. Ame la hnapan, tre pine laka, kolo pala hi a amekötine la aqane trotrohnine së la Tusi Hmitrötr. (Ite edomë 4:18) Ketre, ame la itre trenge ewekë hna sil tre, hna xom ekö qa ngöne lo Traduction du monde nouveau hnapan. Haawe, loi e troa amekötine la itre trengewekë, matre troa ihmeku memine la itre hnaithanata ne la Traduction du monde nouveau ka hnyipixe. Pine laka huliwa ka tru la troa saze la itre trengewekë, hna amekötine laka, troa nyixane la itusi së hnene la itre xa nyima ka hnyipixe.
3 Hapeu, tro kö së a pane treqene lai ketre uke nyima matre nyimane jë së la itre nyima ka hnyipixe? Ohea. Tru la madrine hun troa thuemacanyi epuni laka, kola troa amë la itre nyima ka hnyipixe ngöne jw.org. E ase mina ha amë la ketre nyima ngöne la sit, tro ha nyimane lai nyima cili ngöne la pune la Icasikeu Ne La Huliwa (tro kö a ami hatrene ka hape “nyima ka hnyipixe”).
4 Aqane Troa Inin: Ketre jole ka tru la troa inine la itre nyima ka hnyipixe. Ngo tha pi tro kö sa lapa “hum” ngöne la itre ijine icasikeu; easë pe a pi nyima tune lo ketre atre cinyihane la Salamo. (Sal. 30:12) Hane hi cahu ketre aqane troa inine la itre nyima ka hnyipixe.
A nyimu a drenge jë la miuzik hna elon hnei piano, nge hna amë ngöne la sit Ëternete së. Aqane tro hi së lai a kuca matre tro sa majemi kowe lai miuzik.
E jë nge inine jë la itre trengewekën.
Ahone jë hë la miuzik nge nyima jë hë, uti hë la maca.
Hane ju inine la itre nyima ka hnyipixe ngöne la ijine kola Hmi La Hnepe Lapa, matre maca jë epun.
5 Maine troa mama elany ngöne la porogaram ne la Icasikeu Ne La Huliwa ka hape, hetre nyima ka hnyipixe, ke troa pane ahone kowe la iatrene la ekalesia, matre tro angatr a dreng. E thupen, tro hmaca ha ahone matre tro hë la ekalesia a nyima.
6 Ame la easa nyima, tre easa madrin, ke kola cas la itre nine i easë asë göi troa ce atrunyi Iehova. Celë hi matre, maine pëkö nyipi kepin, tha tro kö sa lapaa majemine tro trije la nyima ngöne la easa icasikeu.
7 Hetre ketre aqane troa amamane ka hape, easa nyipiewekëne la itre nyima ne hmi. Ame ngöne lo itre ijine asabele ka co me ka tru, hetre hnepe miuzik pala hi hna ahon qëmekene troa nyiqaane la huliwa së. Miuzik lai hna enregistrer e Patterson (New York), ngo hna elone hnene la itre xa trejin qa cailo fen ka isa nyithupe i göhnë (a lue ngöne la macatre) a tro Patterson. Celë hi kepin matre, e upi së hë hnei ceaman troa isa lapa göhnen me drenge la miuzik hna hnëkën, tre loi e tro sa idrei. Aqane tro hi së lai a hnëkëne la hni së troa kapa la itre ini hna troa hamëne koi së e thupen.—Ezera 7:10.
8 Easa troa nyipun la icasikeu celë hnene la ca nyima ka hnyipixe. Kola qaja hnene la tane ka hape, “Cile Hë La Baselaia.” Nyima lai hna ithanatane ngöne lo ijine icasikeu hna qaja ngöne la pane paragaraf, nge hna sil göi troa atrune la 100 lao macatre ne mus la Baselaia.
9 Ame la itre nyima ka hnyipixe, tre itre xa “ewekë ka loi” lai qaathei Iehova. (Mat. 12:35a) Epi tro sa isa catre inine me nyimane la itre nyima ka hnyipixe fë la hni ka madrin, matre tro sa atrune la Akötresie së!—Sal. 147.1.