Aqane Troa Maca Ngöne La Hna Cainöj—Aqane Troa Ewekë Ngöne Interphone

Enyipiewekën: Ame la easa cile qëmekene la interphone, ke ma tro së lai a xou troa ithanata. Nemene la nyine troa kuca matre tha tro kö a nanazij la trenge aja së troa cainöj? Mekune ju ka hape, ame la itre xa atr, tre ma tro hi angatr a hane drei mejene la maca ka loi, e hne së hna cainöje koi angatr jëne interphone. (Rom. 10:14) Kola mama jëne la hna melëne hnene la itre xa trejin, ka hape hetre thangane la troa cainöj jëne interphone. (Wange ju la Annuaire 2011, g. 65-66, me Annuaire 2000, g. 54, par. 3.) Hane hi la itre xa nyine troa kuca.

Aqane Troa Kuca:

Hnëkëne jë la itre pane ithanata ka hohopatr nyine troa qaja, nge fejane ju ngöne ipepa matre tro pë hë epuni a e, la epuni a ewekë jëne interphone. Tro lai a xatua epun troa triji xou. Nge canga qaja ju fe la aliene la tronge i epun. Maine hna maakëne la ëje ne la atr, hëne jë la ëje i angeic. Nyipune ju hë, nge sipone ju troa tro fë koi angeic (maine amë pena fene la qëhnelö) la ketre sine itus ka troa hamëne koi angeic la itre xa ithuemacany.
Loi e troa hetrenyi la itre mekune ka hamë ithuecatr. Hnyimahnyima pi, nge enije jë tune lo aqane kuca i epun la epuni a ithanata kowe la atr hnei epun hna goeën.
The xou menu kö; ithanata hnyawa jë memine lai atr, matre tro angeic a drei epuni hnyawa, me trotrohnine la hnei epuni hna qaja. Saathe pi la itre ithanata, the ewekë nyimenyime kö.
Tro fe sa hetre wang atrehmekun. Ame ngöne la itre batima ka tru, tre ka tiqa hnei interphones, maine sonnettes. Ma ka loi tro hi a kuca la köni hnalapa me maakëne la itre hnalapa hna tha kuca, nge lö pi hë. Ke ma tha tro kö lai a madrine hnene la itre xa atrene lai batima la easa lapa aqeany, me huj asë la itre sonnettes.

Tupathe ju Ngöne La Treu Celë:

Ame la ijine easa kuca la hmi ne la hnepe lapa, tha tro kö la lue ka inine cainöj a igoeë.