“Anyipicine” Jë—Jëne La Hna Cainöj Ngöne La Itre Batima
1. Nemene la aliene la kola hape, troa ‘anyipicine la maca ka loi’?
1 Tui Paulo, aja së fe troa “anyipicine la maca ka loi.” (Ite Hu. 20:24) Haawe, loi e tro sa thele troa ketr la itre atr ne la teritoare së hnene la maca ne Baselaia. Kolo lai a qaja mina fe la itre atr ka mele ngöne la itre batima. Ame ngöne la itre xaa ijin, ketre jole koi së troa cainöje kowe la itre atr ka mele ngöne la itre batima cili. Ngo pine laka nyimutre la itre atr ka mele e cili, haawe, ketre götrane lai ka sisitria catre koi së troa cainöjëne la maca ka loi.
2. Pine nemene matre nyipi ewekë troa hetre hni ne metrötr, me atreine waiewekë ngöne la easa cainöje ngöne la itre batima?
2 Pine laka kola elë la ihumuth me isi, tiqa catre hnei batima hna thupëne hnyawa hnene la ketre atr maine itre kamera pena. (2 Tim. 3:1, 2) Maine jë hetrenyi la ketre code hna amë göne matre thaa tro kö a lö menu hnene la itre trehnyiwa. Ijije troa helë së qa hnine la batima hnene la atr ka cilën, ene hmekuje hi ngöne la kola eetr hnene la ketre atr ka mele ngön. Qa ngöne lai, nyipi ewekë tro sa hni ne metrötr, me atreine waiewekë.
3. Eue la ijine ka ijije troa cainöj ngöne la itre batima, nge pine nemen?
3 Eue La Troa Huliwa: Tune ngöne la itre xaa götrane la teritoar, loi e troa cainöj ngöne la itre batima, ngöne la ijine hetre atrene la itre uma. Maine jë troa mekuhni së, e tro pala hi sa traqa nge paatre kö la itre atr. Nyimutre la itre trejine ka öhnyi eloine la hna wange la itre atr ngöne la hnalapa i angatr, e heji lapa, ketre tune e hnaipajö ne Mecixen me Sabath. Maine easa cainöj ngöne la itre batima e hmahmakanyi petre kö, e mecixeni me sabath, maine jë tro ha eetr la itre atren, me qejeqeje së kowe la atre thupëne la batima.
4, 5. Tune kaa la aqane tro sa ketr la itre atr ngöne la itre batima hna thinge koi së?
4 Qëmekene Troa Lö Hnine La Batima: Thaa tro kö la itre ka cainöj a pane hëne la atre thupëne la batima maine ketre uma ne huliwa, qëmekene troa cainöj. Maine easa traqa qëmekene la ketre batima hna thinge koi së nge hetre interphone, ene la ketre jën hna hnëkëne matre tro sa ithanatakeu memine la itre atrene la hnalapa, haawe, loi e tro sa xom ej matre troa ithanata memine la itre atr ka ajan. Thenge la pengöne la batima, ijije tro sa kuca trongëne la itre uma, thupene la hne së hna ithanata memine la atr ka nue së troa lö. Ngo ame ngöne la itre xaa batima, loi e troa lö hmaca qa hnine lai batima me ithanata memine la itre xaa atr jëne lai interphone. Loi e tro sa atreine waiewekë me axeciëne la etrune la itre atr e hnine lai batima, hne së hna troa ithanata kow jëne lai interphone.
5 Maine jë kola ajane hnene la itre xan tro nyipunieti a qaja koi angatre qaa kuhu trön, la aliene la tronge i nyipunie. Maine eje hi, loi e tro nyipunieti a ibozu me qaja la ëje i nyipunie koi angatr. Qaja jë la ëje ne la atrene la hnalapa, e hna fejane ezine la interphone. Ame ngöne la easa qaja la taan la porotrike së, thaa tro kö sa aqean. Hnene la itre xan hna öhne la eloine la hna e mekötin la ketre mekune nyine nyiqaane la porotrik qa hnine la itus Comment raisonner.
6. Nemene la nyine tro sa kuca e hetre ka thup?
6 Maine xele kö ma nue së hnene la atr ka thupëne la batima troa cainöj kowe la itre atr ka mele ngön, haawe, loi e tro sa cainöje koi nyidrë. Nyimutre la itre atr ka thupëne la itre batima ka ajane troa e la itre itusi së. Ijije mina fe tro sa nyiqaane me xomiujine la ketre etid ngöne la varad. Maine kola nue së hnene lai atr troa lö hnine la batima matre troa wange la ketre atr ka hetre hni ne ajan, thaa ka loi kö e tro sa fenafena la itre xaa qëhnelö ne la itre xaa atr.
7. Nemene la nyine tro sa hneheen, göne la watrenge së ne troa cainöj?
7 Pengö Së Memine La Aqane Ujë Së: Ijije troa wanga atrehmekunyi së hnene la hna fena trongëne la itre watrenge ka tru me ka tru alien. Qa ngöne lai, maine jë loi e tro sa xome la ketre watrenge ka thaa tro kö a qejeqeje së, maine pë pena kö nyine xom. Hnene la itre xaa trejine hna amë la itre itus ngöne la ketre hna qatrei itus ka co, me xome trongëne la Tusi Hmitrötr maine aliine pena hnine poosi ne itrauziz.
8. Tune kaa la aqane troa eköthe la ketre gurupe göne la troa cainöje ngöne la itre batima?
8 Thaa ka loi kö e troa ce tro asë hi hnene la ketre gurup ka ala nyim, ngöne la kola lö e hnin la itre batima, maine ngöne la hna cil hnei loto, ke, canga tro hi a wanga atrehmekunyi angatr hnene la itre atr. Loi e troa hmeke hnyawa ngöne la kola cainöj ngöne la itre batima gaa isi, me ka ihumuth. (Ite edomë 22:3) Drei la ketre ceitun, maine jë kola ce cainöj ngöne la ketre batima hnene la foa maine sikisi lao trejin, matre ame la kola fenafena la qëhnelö hnene la lue xan, tre, itre xan a itreqe ezin.
9. Tro sa amamane tune kaa la metrötre së, nge pine nemene matre ka nyipi ewekë catre lai?
9 Ame ngöne la kola lö e hnine la ketre hnalapa, loi e tro nyipunieti a pane köle hnyawa la itre ibuutre i nyipunie, me thinge hmaca la qëhnelö. Maine tro nyipunieti a amamane la metrötre i nyipunie, haawe, pëkö nyine troa qaja hnene la itre atrene la batima. Ame la nyipunieti hë e kuhu hnin lai batima, tre, canga xome jë la asasör maine tro kowe la itre uma nyine kuca, ngo thaa tro kö a aqean e kuhu qëmeken. Maine tro sa ujë tune lai, haawe, thaa tro kö a mekuhni së hnene la itre ka goeë së.
10. Tro sa neëne tune kaa la itre mejene ilu ngöne la itre hna tro?
10 Ame ngöne la itre batima, tre, tru catre la itre mejene ilu ngöne la itre hnë tro. Qa ngöne lai, the ithanata catre menu kö wanga drei nyipunieti jë hnene la atrene la hnalapa. Ame ngöne la kola ithanata kowe la itre xaa trejin, loi e troa tuluthe la nine i nyipunie me menyik, matre thaa tro kö a mekuhni menu hnei itre xan. Hnene la itre xaa trejine hna ce huliwane la caa xötre uma, matre lue xan a fenafena ngöne la ketre pune nge lue xan ngöne la ketre pun la hnë tro uti hë la kuca asë, hune la troa fenafena la ketre qëhnelö matre ketre hmaca. Ketre, ame la nyipunieti a fenafena catrëne la qëhnelö, tre, ijije troa axouene la itre atr e kuhu hnin.
11. Nemene la itre mekun ka troa xatua së ngöne la easa fenafena la ketre qëhnelö ka hetre nyine goeë së?
11 Maine hetrenyi la ketre götrane gaa lailai ne la qëhnelö, haawe, cile amamanyi jë me sine tronge i nyipunie matre tro la atrene la hnalapa a goeë nyipunie memine la sine tronge i nyipunie. Goeëne hnyawa jë lai götrane gaa lailai cili, nge ame la nyipunieti a öhne laka, kola goeë nyipunie hnene la ketre atr, tre, ibozu jë me angeic nge nyiqaane ithanata jë. Maine angeic a hnyingë nyipunie, ka hape, ‘Drei la ëje i nyipunie?’ haawe, ketre ijine lai ka sisitria koi nyipunie troa qaja la ëje i nyipunie memine la sine tronge i nyipunie. Maine jë thaa xoue angeice kö troa thawa la qëhnelö. Maine thaa thawa kö angeic, haawe, ijije tro nyipunie a cainöje koi angeic qaa kuhu trön.
12. Tro sa amë tune kaa la itre itus ngöne la itre hnalapa ka pë atren matre thaa tro kö a traqa la itre jol?
12 E Pëkö Atrene La Uma: Ame la aliene la wesitre lapa i itretre thupën la batima, tre, hnei angatre hna hleme lapaane la itre itusi së qa ngöne lo itre hna lö maine itre xaa götrane pena ne la batima. Ame la itre itus hna amë e kuhu qëhnelö, tre, ijije troa mala e cahu hna tro, maine nyine tro pena a trij. Qa ngöne lai, qëmekene la itre hnalapa ka pë atren, loi e tro sa amë la itre itusi ngöne la itre götrane gaa sihngödr.
13. Nemene la nyine tro sa kuca, e easa ixelë memine la ketre atr ka wesitr?
13 E Kola Wesitr Hnene La Itre Atrene La Itre Hnalapa: Maine easa ixelë memine la ketre atr ka wesitr nge ka thel troa hëne la ka thup, tre, loi e tro sa nue lai hnalapa cili, me bëeke hmaca ngöne la ketre ijin. Ame ngöne la itre xaa götran, loi e tro sa inamacan me nue la batima cili, wanga wesitre jë koi së hnene la ka thup. Ngacama thaa hna qaja kö hnene lai atr, ka hape, thaa tro hmaca kö a wai angeic elany ngo loi e troa fejane ngöne ipepa la numero ne la uma nyine thaa tro kö a kuca me ce amë ej memine la teritoar. Ame la itre hnalapa cili nyine thaa tro kö a wange hmaca, tre, loi e troa wai angatr e itre xaa ijin, matre troa atre la itre aja i angatr.
14, 15. Nemene la nyine tro sa kuca, e kola helë së hnene la ketre ka huliwa hnine la batima?
14 E Kola Helë Nyipunie: Maine kola helë nyipunie hnene la atr hna amë matre troa nyihnyawane la batima maine ketre atr ka thupe pena, maine ketre atr ka nyidrawane lai batima maine ketre atrene pena lai batima, tre, loi e tro sa inamacan me canga tro. Thaa aja së kö troa uti sai së koi hna kootr, maine tro pena hë polis. Kola mama laka, thaa kolo kö a xele ma wange la Itretre Anyipicine i Iehova hnene la itre ka huliwa e cili, ngo angatre pe a kuca la huliwa i angatr.
15 Ame ngöne la itre xaa ijin, maine kola helë nyipunie hnene la ketre atr ka thupëne la batima, tre, ijije tro nyipunieti a qaja hnyawa koi nyidrë cememine la metrötr, la aliene la tronge i nyipunie. (1 Pet. 3:15) Easa wanga atrehmekune laka, hnëqa i nyidrë la troa amadrinëne la itre atr ka lapa e hnin la batima, me thele mina fe troa thupëne ej. Maine jë tro nyidrëti a nue nyipunie troa lapa ngöne lai batima. Ngo maine nyidrëti a helë nyipunie, haawe, loi e tro nyipunieti a nue nyidrë cememine la hni ka tingeting. Maine ijij, pane sipone jë troa ami itus ngöne hi la hna lö maine troa kuiëne pena ngöne la itre hnë ami tus. (Kol. 4:6) Loi e tro pala hi a thuemacanyine la atre thupëne la huliwa, göne la itre ewekë cili.
16. Tro sa kuci nemen, e kola catrehnine catre la itre jol ngöne la easa thele troa cainöj ngöne la itre batima?
16 Ame ngöne la itre drai thupen, loi e tro la itre ka cainöj a thupëne la aqane tro angatr a huliwa hnine la batima. Ngo maine kolo pala hi a catrehnine catre la itre jol, haawe, loi e tro la itre qatre thup a ithuemacane la Bethela matre troa hamë ixatua, hune la tro la itre ka cainöj a thele caasine la nyin la itre jole cili. Maine thatreine kö la itre trejine troa cainöj ngöne la itre hnalapa, haawe, hetrenyi la itre xaa aqane troa ketr la itre atr, tune la kola cainöje jëne telefon maine jëne tusi pena. Hnene la itre xaa trejine hna thele troa cainöj e cahu gojenyi qëmekene la batima maine xötreithe pena, e hmakanyi me e hej ngöne la kola tro troa huliwa maine kola bëeke hmaca koi hnalapa hnene la itre atr.
17. Pine nemene matre ka nyipi ewekë catre la troa thele troa cainöj ngöne la itre batima?
17 Calemi catre hë la pune kowe la fene ka ngazo celë. Tro hmekuje hi a mele la itre atr ka hëne la atresiwa i Iehova. “Tro angate a hë nyidëti tune ka lo tha hnei angate hna lapaune kow? Nge tro angat’ a lapaune tune ka koi nyidë lo hnei angate hna tha deng?” (Rom. 10:13, 14) Nyimutre la itre atr “hna hnëkëne kowe la mele ka tha ase palua kö” ka mele e hnine la itre batima. (Ite Hu. 13:48) Maine tro sa thele troa hetre hni ne metrötr, me atreine waiewekë, haawe, tro hë sa cainöjëne koi angatre la maca ka loi.