Troa Cainöjëne La Maca Ka Loi Ngöne La Nöjei Götran

¹ Hnene la itre pane keresiano hna cainöje ngöne la nöjei götran. Hnei angatre hna catre ngöne la huliwa cili, matre ngöne la 30 lao macatre thupene la hna amele Iesu hmaca, ke, “hna cainöjëne kowe la nöjei ate asëjëihë e celë fen” la maca ne la Baselaia.”​—Kol. 1:23.

² Celë fe hi mekune lai, hna ajane catrëne hnene la itre hlue i Iehova ka catre enehila​—ene la troa ketr la nöjei atr hnene la maca ka loi ne la Baselaia. Nemene la ka troa xatua së troa eatrëne lai? Nyimutre catre hë la itre atr ka huliwa ngöne la drai ka pexej, nge paatre kö angatre ngöne la easë a vizitë angatr. Maine thaa angatre kö a huliwa, ke, angatre a ngenu, me kuca la itre komisio i angatr, maine troa kuci madrine pena. Hetrenyi thene la itre atr cili, la itre ka loi thiina, haawe, troa ketri angatre tune ka hnene la maca ne la Baselaia?​—Mata. 10:11.

³ Hna kapa hnei itre xane la maca ka loi ngöne la hnei angatre hna huliwa. Ngöne la itre traone ka co, ke, nyimutre la itre atr ka huliwa ngöne la itre götrane hnë thele mani, nge angatre a lapa e cili ngöne la drai ka pexej. Ngöne la itre traone ka tru, ke, hna vizitëne hnene la caa temoë la itre atr ka huliwa ngöne la itre götrane hnë thele pengöne troa salem, maine ngöne la itre batima ka draië catr thatraqane la itre ka cilë biero, me itre ka lapane la itre uma hna thupëne hnyawa​—nge alanyimu catre thene la itre atr cili, la itre ka xötrei hane öhnyi temoë. Ame e mecixeni me sabath, ke, hna öhne la itre xaa atr ngöne la angatre a mano ngöne park, maine ngöne la itre nyine madrin, maine ngöne la itre götrane hna hnëkëne thatraqane la itre atr ka traqa troa pane lapa ngöne la itre drai ka xalaithe hi, maine ngöne la nekö i uma, maine hnë ami loto, maine ngöne la itre götrane gaa tiqa hnei magazë, nge hetre aja i angatre troa drenge la maca ka loi.

⁴ Nyimutre catre la itretre cainöje ka catre troa cainöje ngöne la itre götrane gaa tru atr, nge angatre fe a thele la itre hna majemine tro kow hnene la itre atr. Ngöne la xötrei, hna cile hnö hnene la itre Temoë celë, me xou pine laka thaa majemine kö angatre cainöje tune la, ka nango loi kö lo cainöje trootro ngöne itre hnalapa, ke hna lapaa huliwa tune pala hi. Tune ka la hnei angatre hna mekune enehila?

⁵ Kola qaja hnene la ketre trejine ka maca hnyawa hë ngöne la huliwa ne cainöje ka hape, “Kola thuecatre koi ni ngöne la huliwa ne cainöj!”. Ketre trejine a qaja ka hape: “Kola xatua ni troa catr.” Kola öhne me qaja hnene la ketre qatr ka pionie ka hape: “Hna ithuecatre koi ni ngöne la mekun, me ngöne la ngönetrei, me ngöne la ua, . . . nge eni pala hi la a tru trootro ngöne la itre götrane cili.” Kola qaja hnene la ketre atre cainöje ka hape, angeice hë enehila a ketr la itre atr ka alanyimu, nge nyimutre la itre ka thaa hane fe kö ekö porotrike memine la itre Temoë i Iehova. Hnene la itre thöthi hna hane madrine troa kuca la huliwa cili. Kola sipu fe amamane hnene la ketre thöthi la mekune i angeic, kola hape: “Ka ithuemadrine pine laka, epuni a troa ithahnata kowe la itre atr ka alanyimu.” Hnene la ketre thöthi trahmanyi hna qaja ka hape: “Tru hë la itre itusi hnenge hna amë enehila, thaa tune kö lo xötrei!” Itre ewekë lai ka eje ngöne la itre götrane hna kuca lapaan.

⁶ Troa Elemekene Hnene La Itre Atre Thupe Ka Wange Trongëne La Itre Ekalesia: Hnene laka kola “pate la pengöne la fen,” hnei Sasaitri hna mekune ka hape tro la itre atre thupe ka wange trongëne la itre ekalesia a amekötine la porogarame ne la huliwa ne cainöje i angatre e nöjei wiik, matre troa ketr la itre atr ka alanyimu hnene la maca ka loi. (1 Kor. 7:31) Ngöne la itre macatre, hnene la itre atre thupëne la sirkoskripsio hna iëne troa cainöje trootro ngöne itre hnalapa e hmakany, nge ame itre hnaipajö, ke, ijine troa kuca la itre iwaihmaca maine kuci etid. Nyimu götrane pala kö ka kepe thangane ka loi jëne la porogarame celë. Ame pena ha ngöne la itre xaa götran, thaa tru kö la hna kuca ngöne la hna cainöje trootro ngöne itre hnalapa e itre hmakany. Haawe, ijije tro la atre thupe ka wange trongëne la itre ekalesia a axeciëne troa canga nyiqaane e hmakany, ene la troa cainöje ngöne la itre magazë trootro, maine e cahu gojeny. Maine pena, ijije tro nyidrë a iacaasinekeune la itre gurupe ka co matre troa cainöje ngöne la itre batima hna huliwa hnei itre ka cilë biero, maine ngöne la itre götrane hna itö, maine hnë ami loto, maine ngöne pena la itre götrane gaa tru hnei atr. Maine tro la itretre cainöje a huliwane hnyawa la traeme i angatre thatraqane la huliwa ne cainöj, ke, troa tru catre hnei atr hna ithahnata memin.

⁷ Hna amamane hnene la itre rapore ka hape, hna kapa hnyawa la hna amekötine celë hnene la itre atre thupe ka wange trongëne la itre ekalesia, ketre tune mina fe la itretre cainöj. Nyimutre hë la itre qatre thupe ka pane hëne la atre thupëne la sirkoskripsio troa inine la itre xaa ka cainöj, matre atreine angatre troa huliwa hmekune la hna ajane hnene la itre atr ne la teritoar. Ketre ixatua ka tru lai kowe la itretre cainöje celë troa ce huliwa memine la atre thupe ka wange trongëne la itre ekalesia, pine laka tro angatre a öhnyi nyidrë e kuca lai ketre aqane cainöj. Qa ngöne lai, tro fe hë angatre a hane inine fe la itre xane elany. (2 Tim. 2:2) Ame la thangane lai, ke, troa alanyimu catre hnei atr hna troa ketr hnene la maca ka loi.

⁸ Eje hi, thaa tro kö epuni a treqene elanyi la tro la atre thupëne la sirkoskripsio a amamane la nöjei pengöne aqane troa cainöj. Hanawange la itre xaa mekune ka troa hetre thangane ngöne la teritoare i epun:

⁹ Cainöje e Cahu Xötre Gojeny: ‘Eka jë la itre atr la?’ Easë a hnyinge tune la ngöne la itre xaa ijine easë a traqa kowe la itre uma ka tru ka pëkö caa atrene e itre hmakany. Itre xane a kuca la itre nyipi jol, maine itö pena. Hapeu, hnei epuni kö hna tupathe troa iöhnyi me angatre ngöne la epuni a cainöje e cahu gojeny? Maine hna huliwa hnyawa, ke, ijije hi troa hetre thangane ka loi la aqane tro fë cainöje cili? Easenyine jë lai atr, nge nyiqaane jë la porotrike me angeice cememine la madrin. Thaa nyipiewekë kö troa hamëne la cainöje kowe la nöjei ka tro. Ithahnata jë kowe la itre atr ka pëkö nyipi jol, tune la itre ka goeëne trongëne la itre ewekë ka mama ngöne la itre magazë, maine itre ka itreqe ngöne la itre hna ami loto, maine itre atr ka treqe kar. Ma ngöne la xötrei, ke, pane ibozu ju cememine la hni ka madrine nge treqene ju tro angeice a sa koi epun. Maine ka ajane la atr troa ithahnata, ke, hnyingë angeice ju la mekune i angeice kowe la ketre ewekë epuni a öhne laka, ka troa ketri angeic.

¹⁰ Hnene la atre thupe ka wange trongëne la itre ekalesia hna könëne la sikisi lao itretre cainöje troa ce cainöje trootro me nyidrë, me föe i nyidrë e cahu gojeny. Nemene ju hë la thangane la huliwa i angatr? Öni nyidrë, “Lolo catre la hmakanyi ne cainöje hun! Thaa ketre jole kö koi eahuni troa trongëne la itre uma ka pë atren. Eitre lao zonal, nge nyimutre catre la itre tarake hne huni hna amë. Nyimutre la itre atr hne huni hna ithahnata memin, nge lolo catre la thangan. Hnene la ketre atre cainöje trahmanyi ka xötrei hane cainöje e cahu gojenyi hna qaja hape: ‘Nyimutre hë la itre macatre ne eni ngöne la nyipici, nge eni petrehi enehila a trotrohnine hnyawa la enyipiewekëne la huliwa celë!’ Ngöne la pune la wiik, pë hnyawa ha ca zonale nyine troa hamëne trongëne e hnine la ekalesia.”

¹¹ Ame la kola vizitëne pena la ketre ekalesia hnene lai atre thupe ka wange trongëne la itre ekalesia, ke, nyidrë a drenge laka, hna cainöje e hmahmakanyi e cahu gojenyi hnene la itretre cainöje ka alanyim, ngo co hi la thangane hna kapa qa ngön. Hnene la ketre söre hna ithahnata kowe hi la lue atr ngöne la ijine cili, hnene laka, alanyimu catre la itre atr ka nyenyape nyimenyime kowe la itre hna huliwa i angatr. Hnene la atre thupe ka wange trongëne la itre ekalesia hna upi angatre hmaca troa bëeke kowe lai götrane cili, ngöne la ketre drai pena ha, ngo thaa sine hmakanyi hmaca kö. Hnei angatre hna drengethenge lai, nge hnei angatre hna lapa uti hë midi. Hna wangatrehmekune hnene lai söre ka alua ithahnata hi ngöne lo lai hmahmakany, laka tru catre kö la thangane la angeice a bëeke hmaca. Hnei angeice hna amë pe la 31 lao zonale me 15 lao boroshür, nge hnei angeice hna fejane la itre ëje me itre hune tusi ne la sevene lao atr, nge hnei angeice hna nyiqaane la lue etid! Ketre tune mina fe la itre xaa atrene lai gurup, tru la thangane ka loi fe hnei angatre hna hane kapa.

¹² Ngöne la epuni a öhne la ketre atr ka hetre aja, ke, tupathe ju troa xome la ëje i angeic, me hune tusi, me numero ne telefon. Thaa loi kö e troa hnyingëne la pengöi i angeic, ngo qaja ju pe ka hape: “Eni a madrine la hne so hna pane ce porotrik. Nemene la mekune i epun, ijije kö tro nyiso a sisedrëne la porotrike so e ketre ijine hmaca?” Maine pena hnyinge ju ka hape: “Ijije kö tro ni a iöhnyi me epuni ngöne la hnalapa i epun?” Alanyimu catre la itre atr hna öhne tune lai, ka ajane troa wai angatre hmaca. The thëthëhmine kö troa xometrongëne fe la itre pepa göne la porogarame ne la itre reinio së.

¹³ Ngöne la epuni a ithahnata kowe la ketre atr ka ajan, nge ka lapa ngöne la teritoare ne la ketre ekalesia kö, ke, loi e tro epuni a fejane la itre ithuemacanyi ka iji, göne la tro angatre a wange lai atr, nge troa hamëne kowe la itre trejine ka troa kuca pe lai vizit. Hapeu la cainöje e cahu gojeny, jëne tro kö lai a haöthe la götrane i epuni hnene la maca ka loi? Maine eje hi, ke, wange ju la hna cinyihane ka hape “Thele jë la itre ka ajane jëne la cainöje trootro ngöne xötre gojeny” hnine la Huliwa ne Baselaia ne macatre 1994. Thupene lai, hnëkë jë troa cainöje e cahu gojeny ngöne la ketre hawa ne la drai, hnei epuni hna mekune laka, troa alanyimu la itre atr hna troa iöhnyi memin.

¹⁴ Cainöje Ngöne La Itre Hnë Treqe Kar: Ame ngöne la ketre hmakany, hna mekune hnene la itre pionie troa cainöje kowe la itre atr ka treqe kar, thaa nanyi kö qa ngöne la kolej. Lolo catre pi hë la angatre a porotrik, ngo hetre ejolene pe. Kola hnyapa hnyawa la porotrik, nge kola traqa la kar, matre canga thupatëne pi hi la porotrik. Hna unijolene hnene la itre pionie la pengöne cili, hnei angatre hna ce elë memine la itre atr hune kar, matre sisedrëne la porotrike memine la itre ka ti kar, ke, angatre a ce tro kowe la traon. Traqa ha ngöne la hna iautiny, thaa uti kö angatr, ngo angatre a mekune hmaca ju troa ce bëeke memine lai kar, me cainöje hnine ej. Thupene la hna ce tro me bëeke memine lai kar, angatre a öhne la thangane la huliwa i angatr, laka hnei angatre hna amë la 200 lao zonal, nge hnei angatre hna nyiqaane la sikisi lao etid. Hnene la itre xaa ka ti kar hna hamëne la itre hune tusi angatr, me numero ne telefone i angatr, matre atreine troa wai angatre hmaca ngöne la itre hnalapa i angatr. Ame la wiike thupen, ke, hna bëeke hmaca hnene la itre pionie kowe la hnë treqe kar, nge hnei angatre hna kuca tune lo aqane huliwa i angatre e cili lo. Hnei angatre hna amë la 164 lao zonale me nyiqaane la ketre etid. Ngöne la ketre hnë itreqe, ke, kola elë la ketre atr hune katr, nge hna lapane la icea ka pë atren​—ezine hnyawa ju hi la ketre pionie. Nyidrëti a goeëne la trejin, me hnyimahnyima, nge kola hape: “Eni a mekune laka ma hetre La Tour de Garde i nyipë koi ni.”

¹⁵ Alanyimu catre la itretre cainöje ka anyipicine ngöne la itre kar, me hune la itre tërë, maine itre avio, nge hetre thangane catr la huliwa i angatr. Tro epuni a nyiqaane tuneka troa porotrike kowe la atr ka lapa ezi epun? Hnene la ketre atre cainöje ka 12 lao macatre hna nyiqaane e la ketre Réveillez-vous! hnine la kar, angeice a mekune troa ahlëne la aja ne la neköjajinyi ka lapa ezi angeic. Hna eatrëne la mekune i angeic. Hnene la neköjajinyi hna hnyingë angeice la aliene la hnei angeice hna e, nge kola sa hnene la thöthi ka hape, angeice a e la nyin ne la itre jole ka traqa kowe la itre thöth enehila. Angeice a qaja ju fe ka hape, tru la thangane ka loi hnei angeice hna kapa qa ngöne la itre hna cinyihan, nge atreine tro itre eje a xatua angeice fe. Madrine catre la neköjajinyi troa kapa la itre zonal. Hna drenge la porotrike i nyidro hnene la itre xaa thöth, nge hane jë fe hi angatre sipo itre xaa zonal. Qa ngöne lai, hnene la ka xomiujine la kar hna acilëne la kar ezine la gojeny, me hnyingëne la kepine matre kola ajane la itre zonale cili. Ame la nyidrë a atre la kepin, ke, hane jë fe hi nyidrë sipone la itre xaa zonal. Nyipici laka, maine pë ju zonale hna tro fë hnene la atre cainöje thöthi kowe la nöjei atr ka hni ka ajan, thaa tro jë kö a traqa la ewekë celë!

¹⁶ Cainöje Ngöne La Itre Park Me Itre Hnë Ami Loto: Loi e tro fe a cainöje ngöne la itre park me itre hnë acili loto, celë hi jëne ka lolo fe troa ketr la itre atr. Hapeu, hane fe kö epuni cainöje ngöne la itre götrane hna acili loto ne la itre magazë ka tru? Maine epuni a traqa ngöne la hnë acili loto, pane goeëne jë xötreithi epun. Thele jë la ketre atr ka pëkö nyipi jol, maine ka itreqe hnine la ketre loto, nge thele jëne jë troa porotrike me angeic. Maine ka ajane hi troa porotik, ke, tro xomi angeice jë kowe la maca ne la Baselaia. Tupathe jë troa isa tro caas, ngo the tro iananyi kö memine la hna cainöje memin. Thaa loi kö e troa fena trongëne la itre watrenge ka tru, me ka tru alien, maine ketre aqane ju kö ka troa qejeqeje epun. Hmekëne hnyawa kö epuni lai. Thaa tro kö a qea menu la hna cainöje ngöne la caa hna acili loto, ngo loi e troa saze me tro pena kowe la ketre. Maine thaa ajane kö la ketre atr troa ithahnata me epun, xötrëne jë la gojenyi epuni cememine la hni ka menyik, nge thele jë la ketre atr nyine troa ithahnata memin. Hnene la ketre trejine hna tupathe la itre aqane kuca celë, matre ngöne hi la caa treu, hnei angeice hna amë la 90 lao zonale ngöne la hna cainöje ngöne la itre hna acili loto.

¹⁷ Itre xaa atr a tro kowe la park matre troa mano; itre xane a tro cili troa elo maine troa ce madrine memine la itre nekö i angatr. The ajolë angatre kö troa kuca la itre hnei angatre hna ajan, ngo loi pe e troa thupëne la itre ijine ka ijije troa cainöj. Hnene la ketre trejine trahmanyi hna thele troa porotrike memine la ketre atr ka nyihnyawane la park, nge kola mama laka ngazo la hni nyidrë hnene la ejolene la kuci dorog, memine la mele ne la itre nekö i nyidrë elany e tru jë angatr. Celë hi matre nyiqaane ju hi la etid, nge hnë etidi nyidrë pala pë hë ngöne lai park.

¹⁸ Cainöje Ngöne La Itre Götrane Gaa Nyimu Magazë: Pine laka tha ijije kö troa cainöje trootro ngöne la itre magazë, ke, hna wathebone la ewekë cili, itre xaa ka cainöje a thele jëne ju troa cainöje e cahu hna tro. Angatre a lapa hune la ketre sine ta, me thele jëne troa porotrike memine la itre xaa ka pane lapa troa mano. Maine troa hetre aja thene la ketre atr, ke, angatre a hamëne acone ju la tarak, maine ketre zonal, me thele jëne troa ce wange la ijine troa iwaihmaca. Thaa tro kö a qea hna lapa ngöne la caa ta pala hi, ngo loi e troa saze götrane, me thele troa porotrike me ketre atr. Nyipici, thaa loi kö e troa mama kowe la nöjei atr, laka easë a cainöje tune lai.

¹⁹ Maine epuni a ibozu memine la ketre atr, nyiqaane jë la porotrike hnene la itre trenge ithahnata ka menyik. Maine ajane hi lai atr troa ithahnata me easë, ke, loi e troa hnyinge koi angeic, nge thupene lai drenge hnyawa ju fe la angeice a hane ithahnata. Thele jë troa nyipiewekëne la hnei angeice hna qaja. Amamane jë fe ka hape epuni a nyipiewekëne la mekune i angeic. Nge maine ijij, amamane ju laka caasi hi la mekune i epuni me angeic, ngöne la itre xaa götran.

²⁰ Lolo catre la hna porotrike hnene la ketre söre memine la ketre qatre föe, ngöne la nyidroti a ithahnatane la aqane elëne la itre thupene mo enehila. Kola aejëne hnyawa la mekune cili hnene la qatre föe, nge pine laka, ewekë lai hnei eahlo hna melën, hetre thangane catre nge lolo la porotrike i nyidro. Hna xome la ëje ne lai föe memine la aderesi eahlo hnene la sör, nge hna wai eahlo hmaca ju fe kö lai wiik.

²¹ Troa Cainöje Trootro Ngöne La Itre Magazë: Hna hamëne fe kowe la itre xaa ekalesia troa kuca la itre götrane hnë thele pengöne troa salem. Loi e tro la trejine atrekë hnëqane la teritoare a hnëkëne la itre karte ne teritoare thatraqane lai itre götrane gaa nyimu magazë. Ketre, troa siji hatrene hnyawa ngöne la itre karte ne teritoare la itre magazë, matre thaa tro kö a ce kuca itre eje memine la itre uma hna amekötine troa wange ngöne lai teritoare ka caas. Ngöne la itre xaa teritoar, ke, caa hnene hi la itre uma memine la itre magazë. Loi e tro la itre qatre thupe a könëne la itretre cainöje ka maca hna huliwa, matre tro pala hi a kuca la itre götrane gaa nyimu magazë, nge thaa tro kö a wangacone la huliwa cili.

²² Maine hna könë epuni troa ce kuca la huliwa cili, nge thaa hane fe kö epuni cainöje tune lai ekö, ke, loi e troa pane ‘cat’ cainöje ngöne la neköi magazë ka co; thupene lai, maine drenge hi epuni laka atreine hë epun, ke, kuca jë hë la itre magazë ka tru. (1 Thes. 2:2) Maine epuni a cainöje trootro ngöne la itre magazë, loi e troa heetre hnyawa, tune lo epuni a troa sine la ketre icasikeu ngöne la uma ne Baselaia. Maine ijij, ke, lö jë hnine la magazë e pëkö atr ka itreqe ngöne la kees. Sipone jë troa ithahnata kowe la hene la magazë, maine kowe la atre ka cilëne ej. Loi e troa keukawahnine la aqane ithahnata, nge the aqeane kö. Thaa nyipiewekë kö troa qeje menune la hna pane xome la traeme i angeic. Alanyimu catre la itre ka cilë magazë ka una ielene la itre atr troa itö, celë hi matre atreine hi tro angatre a pane hane drei së.

²³ Thupene la hna ibozu memine la ka cilë kees, ke, qaja ju ka hape: “Nyipici laka, tru catre hnei jole ne la itre atr ka thele mani, matre paatre kö angatre ngöne la itre hnalapa i angatr, haawe, eahuni a wai epuni e celë ngöne la hnei epuni hna huliwa matre tro epuni a hane e hnine la itre itusi celë la itre mekune ka sisitria thatraqane la mele i epun.” Thupene lai, ithahnatane jë la caas maine lue mekune qa hnine la zonale hna troa hamën.

²⁴ Maine pena, tupathe jë la aqane ithahnata celë ngöne la epuni a ithahnata kowe la hene ne magazë: “Hne huni hna öhne laka, itre ka thele mani fe a hane catre troa atre hnyawa la pengöne la mel. Hanawange la hna qaja hnene la ketre hna cinyihane hnine La Tour de Garde (maine Réveillez-vous!) thatraqai së asë isa alacaas.” Qaja jë la alien, nge nyipune ju ka hape: “Thaa luelue kö huni laka tro epuni a madrine troa e ej.”

²⁵ Maine hetre ka huliwa, nge maine ijij, ke, qaja ju fe ka hape: “Ijije kö tro ni a hane ithahnata tune la memine la itre ka huliwa i nyipë?” Maine ajane hi nyidrë, ke, mekune kö laka, ase hë epuni qaja ka hape, thaa epuni kö a troa aqean, nge kola nue epuni hnene la hene ne magazë tro epuni a eatrëne la trenge ewekë i epun. Maine kola ajane hnene la itre xaa ka huliwa troa porotrik, ke, loi e tro pë hë a sisedrëne la hna porotrikëne ngöne la hnalapa i angatr.

²⁶ Eue hi lo, ngöne la ketre traone ka co, hna ce cainöje trootro ngöne la itre magazë hnene la atre thupëne la sirkoskripsio memine la itre trejine ka alaxaithe hi. Ngöne la xötrei, hetre xouene la itre xaa ka cainöj, ke, thaa hane fe kö angatre kuca la huliwa celë ekö; ngo canga majemi ju hi angatr, nge hetre madrine i angatre hë troa hane cainöje tuun. Thaa caa hawa ju kö, nge hnei angatre hna ithahnata me 37 lao atr, me hamëne la 24 lao zonal, me 4 lao boroshür. Hna qaja hnene la ketre trejine ka hape, tru catre kö hnei atr hnei angeice hna öhne ngöne la hna cainöje trootro ngöne itre magazë, ngacama xoxopatrehi la ijine cainöj, hune la itre xaa ijine angatre cainöj.

²⁷ Loi e Troa Kuca Matre Hetre Jëne Troa Cainöj: Thaa hnei Iesu kö hna cainöje ngöne lo itre ijine hna hnëkëne thatraqane la huliwa cili. Hnei nyidrëti hna qaja trongëne la maca ka loi ngöne la nöjei ijin. (Mata. 9:9; Luka 19:1-10; Ioane 4:6-15) Pane goeëne ju la aqane kuca hnene la itre xaa ka cainöj, matre hetre jëne troa cainöj.

²⁸ Itre xaa trejine a kuca tune la, ngöne la angatre a cainöje kowe la itre keme maine thine ka treqene la itre nekö i angatre ngöne la hna ini. Pine laka, nyimutre la itre keme me thine ka canga traqa 20 lao menetre qëmekene la kola troa lö hnei uma ne ini, hetre ijine i angatre troa thele jëne troa ithahnata, nge loi e troa thele jëne troa eköthe la hna ithahnata hune la ketre taane mekune qa hnine la Tusi Hmitrötr.

²⁹ Nyimutre la itre pionie ka atrepengöne la aqane troa ketr la itre atr ka hetre aja kowe hmekuje hi la ketre taane mekun, nge hna qejepengöne e hnine la itre zonale së. Hanawange la ketre ceitun, lolo catre la thangane hna kapa hnene la ketre sör, ngöne la angeice a kuca la sikisi lao uma ne ini ngöne la teritoare ne la ekalesia i angeic, cememine la itre zonale hna hape “L’école en crise,” taane mekune hna amamane hnine la Réveillez-vous! ne 22 diseba, 1995. Hnei angeice hna wange lo itre asosiasio ka hamë ihaji me ixatua kowe la itre fami ka tru ejolen, e cili, angeice a hamëne ju la itre zonale thatraqane la mele ne la fami, me aqane akötrëne la itre nekönatr, me qaja ka hape tro hmaca angeice a bëeke memine la itre zonale ka hnyipixe, nge ka qejepengöne pala hi la itre ewekë celë. Ame la mekune hnei angeice hna kapa qa ngöne la biero ne thele huliwa göne la Réveillez-vous! ne 8 maac, 1996, ke, hna qaja ka hape ketre ewekë ka “tru.”

³⁰ Hna qaja hnene la atre thupëne la distrik ka hape, hnei nyidrë me föe i nyidrë hna cainöje pala hi e nöjei ijin, ngöne la nyidro a tro koi hna maketr. Nyidro a acaa tro ngöne la drai, ngöne la ijine thaa tru menu pala kö hnei atr, nge itre atr a tro agö kola hunyinyi akawane la itre ewekë nyine salemën. Angatre a qaja ka hape, nyimutre catre la itre atr ka ajane troa porotrik.

³¹ Alanyimu la itretre cainöje ka qaja la itre thangane ka loi, hnei angatre hna öhne ngöne la angatre a cainöje kowe la itre atr, ngöne la itre hnë waasi mano. Thaa hnei angatre hmekuje kö hna ami zonal e cili, ngöne ijine pë atr. Ame la aja i angatr, ke, ene la troa ketr la itre atr hnene la maca ka loi, qa ngöne lai angatre a catre troa ithahnata kowe la nöjei ka traqa e cili.

³² Ngöne la itre xaa götran, hetrenyi la itretre cainöje hna iëne troa cainöje ngöne la hnë kei hnei avio. Ame ngöne la itre xaa ijin, ke, hetre madrine i angatre pi hë troa cainöje kowe la itre ka majemine ngenu agö, nge ka mele ngöne la itre nöje gaa co Temoë i Iehova. Maine hetre aja hna öhne thene la itre atr cili, angatre a hamëne ju la itre tarak, maine zonal.

³³ Maine ngöne la teritoare ne la ekalesia, ke hetrenyi la itre uma thaa hna nue kö troa kuca, nge hna thupëne hnyawa, hnei itre xane hna cainöje kowe la itre ka thupë qanahag, maine kowe pena la itre atrekë batima ne lai. Hna xome la aqane kuca celë ngöne la itre uma hna eköhagen. Hna vizitëne tune lai la sevene lao batima ka nyimu ume hnahagen, hnene la atre thupëne la sirkoskripsio me itre xaa ka cainöj. Nge, eje hi laka, hnei angatre hna qaja kowe la ka cilëne la itre uma cili ka hape, ngacama thaa hna nue angatre kö troa kuca la itre uma, ngo angatre a pane ajane tro la itre atrene a hane atrepengöne la itre mekune ka eje hnine la itre zonale ka hnyipixe. Hna kapa madrine la itre zonale hnene asë hi lo lai itre ka cilëne la itre batima cili, nge hnei angatre hna sipone la itre xaa zonale ka troa traqa! Celë hi matre ketr asë ju hi la itre atrene lai itre batima, jëne telefon.

³⁴ Catre Jë Së Isa Alacaas Troa Cainöje Ngöne La Nöjei Götran: Ame la troa mele thenge la hne së hna sa xepu, ke, ene la troa nyipiewekë la hnëqa së troa cainöjëne la maca ne la Baselaia. E ajane së troa ketr la itre atr ngöne la itre ijine ka ijije koi angatr, ke, nyipiewekë koi së troa amë pe la itre sipu aja së matre tro së a “cat troa amele ite xan.” Kola ajane troa qaja hnene la nöjei ka saene troa nyihlue i Iehova tui Paulo aposetolo ka hape: “Nge ini a kuca la ewekë celë pine la maca ka loi, mate tro sha ce hetenyin.”​—1 Kor. 9:22, 23.

³⁵ Hnei Paulo hna cinyihane ka hape: “Qa ngöne lai madin atraqate ni troa selëne ngöne la ite kucakucang, mate hnene hunge la mene i Keriso. . . . Ke e kucakuca ni, celë hi ijine cate ni.” (2 Kor. 12:9, 10) Kolo lai a hape, Thatreine kö së troa aeatrëne la huliwa celë hnene la sipu trenge catre së. Nyipiewekë koi së troa thithi koi Akötresie, matre troa sipone la uati hmitrötre i Nyidrë ka tru menen. Maine easë a sipone la trenge catre i Akötresie jëne la thith, ke, atreine hi troa hetrenyi the së la mejiune laka, tro Nyidrëti a sa la itre thithi së. Thupene lai, tro la ihnimi së kowe la itre atr a upi së troa thele la nöjei aqane troa cainöjëne la maca ka loi koi angatr, ngöne la nöjei götrane hnë troa öhnyi angatr. Ngöne la wiike ka troa xulu, nemene la ejolene e troa pane tupathe la ketre mekune hna fejane hnine la sine trongene la Huliwa ne Baselaia?