Troa Cainöje Tune Kaa Ngöne La Itre Götrane Hna Salemë Ewekë
1. Nemene la itre xaa thangane ka loi hne së hna kapa ngöne la easë a cainöj ngöne la itre götrane gaa salemë ewekë?
1 Aja i nyipunieti kö troa hane cainöj ngöne la itre götrane gaa kepe itre ka vizit nge gaa hetre atr pala hi, pëkö hna hane pë atr? Maine jë ijije hi tro epuni a hane cainöj ngöne la itre teritoar ka tune lai hna kuca hnene la ekalesia i epun. Troa tune kaa? Troa tro troa hane wange la itre ka huliwa ngöne la itre magazë. Nyimutre la itre thangane ka loi hna kapa hnene la itre trejine ka cainöje ngöne la itre magazë.
2. Tune kaa la aqane troa eköthe la cainöj ngöne la itre götrane gaa salemë ewekë?
2 Ame la itre xaa ekalesia, tre, hna athipe koi angatr troa cainöj ngöne la itre götrane gaa salem. Loi e tro la trejine atrekë hnëqane la teritoare a hnëkëne la itre karte ne teritoare thatraqane lai itre götrane gaa nyimu magazë. Ketre, troa siji hatrene hnyawa ngöne la itre karte ne teritoare la itre magazë, matre thaa tro kö a ce kuca itre eje memine la itre uma hna amekötine troa wange ngöne lai teritoare ka caas. Ngöne la itre xaa teritoar, ke, caa hnene hi la itre uma memine la itre magazë. Maine thaa hnei epuni pala kö hna hane cainöj ngöne la itre magazë, pane nyiqaane jë hnene la itre magazë ka co.
3. Nemene la ka troa xatua së matre troa hetre thangane ka loi ngöne la easë a cainöje trootro ngöne la itre magazë?
3 Troa Hmaloi La Aqane Nyiqaane Ithanata: Maine epuni a cainöje trootro ngöne la itre magazë, loi e troa heetre hnyawa, tune lo epuni a troa sine la ketre icasikeu ngöne la uma ne Baselaia.Troa iëne mina fe la ketre ijin e thaa tru menu kö hnei atr ka traqa troa itö hnine la magazë. Maine pëkö atr ka itreqe ngöne la kees, ke, lö jë, nge sipone jë troa ithanata memine la hene la magazë, maine memine pena la atre cilëne ej. Loi e troa keukawahnine la aqane ithanata, nge the aqeane kö. Nemene la nyine tro sa qaja?
4-6. Nemene la nyine troa qaja ngöne la easë a cainöje kowe la ketre atr ka thupë magazë maine atrekë magazën?
4 Maine tro sa ithanata memine la ketre atr ka thupë magazë, atreine hi tro sa qaja ka hape: “Pine laka tru catr la jole i nyipunie itre ka cilë magazë, haawe nango jole tro huni a öhnyi epuni ngöne la hnalapa i epun, celë hi matre eahuni a thele troa wai epuni ngöne la hna huliwa i epun. Kola hamën hnene la itre zonale huni la itre ithuemacanyi ngöne la itre ewekë ka traqa e cailo fen.” Thupene lai, xome jë la caa mekun qa hnine la caa zonal.
5 Maine jë tro epuni a pane nyiqaane ithanata tune la: “Nyimutre la itre atr ka ajan troa atre hnyawa la Tusi Hmitrötr ngo nango tru hnei jole i angatr. Kola qeje pengöne hnene la tarak celë la ketre porogaram ne etid hna hnëkëne thatraqai epun matre troa sa la itre hnyinge i epun jëne la Tusi Hmitrötr.” Thupene lai, amamane jë la tarak hna hape Ajane Kö Nyipunie Troa Atre Hnyawa La Tusi Hmitrötr? ngöne la götrane 4-5.
6 Maine kola mama laka hetre jolen la atrekë magazën, hamëne ju la ketre tarak me qaja ka hape: “Tro hmaca pë hë ni a traqa elanyi e pë kö jole i nyipë. Ngo eni a pane pi atre la mekuna i nyipë ngöne la tarake celë.”
7. Tune kaa la aqane tro sa akökötrene la aja ka eje thene la itre atr hne së hna ithanata memin ngöne la itre götrane gaa salemë ewekë?
7 Loi e Troa Wange Hmaca La Itre Atr Ka Hetre Hni Ne Ajan: Maine jë tro epuni a inine la Tusi Hmitrötr memine la ketre atr ka cilë magazë. Hnene la ketre trejine trahmany ka pionie huti hna hamën lapaan la itre zonal kowe la ketre trahmanyi ka cilë magazë. Hnene la trahmanyi hna amamane la madrine i nyidrë kowe la itre hnei nyidrëti hna e, ene pe kola amamane jë koi nyidrë hnene la pionie la aqane troa inine la Tusi Hmitrötr jëne la boroshür Thele. Qaane ju hi lai, kola hnen pala hi la ini tus ngöne la hna huliwa hnene lai trahmany. Hnene lai pionie hna wangatrune pala hi lai hnainin, matre hnei nyidrë hna kuca 10 maine fifitrin lao menetr ne etid. Epi tro pala hi së a kuca tune lai, ene la troa catre thele la itre atr ka hetre hni ne ajan kowe la nyipici, hnene la hna cainöje ngöne la itre götrane gaa salem.