Hetre Sipu Teritoare i Epuni Kö?
1. Nemene la sipu teritoare së kö ne cainöj?
1 Ame la sipu teritoare i epun, tre ene la götrane hna ahnithe koi epun troa cainöje ngön. Loi e troa canga atrehmekune la hnë cainöj, matre thaa tro kö a hmitr troa cainöj caas maine ceme ketre trejine pena. Ngacama hetre eloine la troa sajuëne la itre hna hnëkëne hnene la ekalesia thatraqane la itre icasikeu göi cainöje trootro, ngo maine hetre götrane hnë huliwa së hmekuje kö matre cainöje e itre xa ijine kö, tre, celë fe ka xatua së troa huliwane hnyawane la götrane teritoar hna hamë së. Nyipi ewekë la pengöne cili ngöne la itre ekalesia ka hetre götrane teritoar ne cainöj gaa tru.—Ite hu. 10:42.
2. Nemene la itre thangane ka loi ne la troa hetre sipu teritoare ne huliwa së kö?
2 Itre Manathith: Hnei itre xan hna öhne la itre xaa thangane ka lolo hna kapa qa ngöne la hna cainöj ngöne la sipu teritoare i angatr, ezine la hnë huliwa i angatr ngöne la hawa ne xeni hnaipajö, maine thupene ju fe kö la huliwa pena. Atraqatre la madrine la itre xaa fami troa ce cainöj easenyine la hnalapa i angatr koi caa hawa maine qëmekene la Ini Tusi Ne La Ekalesia. Ame hë la thangane lai, tre, thaa nanyi kö la itre vizit me itre hnei angatre hna troa etid memin, ene pe angatre a huliwane hnyawa la trenge catre me traeme me manie i angatr. Pine laka ijije hi troa kuca atrun ngöne la hnepe ijine ka co, e maine ijije hi troa hetre sipu teritoar, tre, tro lai a xatuane la itre xaa trejine troa hane xome la huliwa ne pionie ka ixatua e itre xaa ijin, maine tro fe a hane pionie lapaa, pine laka ijije hi troa kuca la itre huliwa ka nyimutre ngöne la hnepe traeme ka co. Ketre, maine troa huliwane la sipu teritoare së, me atre la itre atrene ej, tre, ketre ixatua lai matre thaa tro kö angatr a xoue së, me aijijë së fe troa xome la itre aqane nyiqaane ithanata ka ihmeku memine la itre aja i angatr, ene pe troa wawene la huliwa ne cainöje së.
3. Nemene la hna melëne hnene la ketre pionie thupene la hna thue teritoare nyine tro eahlo a ketre sipu huliwan?
3 Hnene la ketre söre pionie, hna xatuan hnene la atre thupëne la sirkoskripsio troa hetre sipu teritoare i eahlo, hna qaja ka hape: “Hnenge hna kapa la eamo i nyidrë, ene pe tha qea ju kö nge atre ni hë me majemi hë koi ni la itretre lapa ngöne la teritoareng. Hnenge hna kuca matre tro ni a wange hmaca la itre atr thenge la itre ijine ka ijije koi angatr. Ame la pun, kökötre jë hi la itre iwai hmaca i eni qaane 35 koi 80 la etrune ngöne la treu; nge sevene hë lao etiding.”
4. Tune kaa la aqane tro sa hetre sipu teritoare së kö me huliwane ej?
4 Tune Kaa La Aqane Troa Hetre Sipu Teritoar: Maine epuni a aja teritoar, sipone jë kowe la atrekë hnëqane lai. Sipone jë kowe la ketre atre cainöje troa ce huliwane la teritoare i epun, nge fejane jë la itre hnalapa ka pë atren. Loi e tro epuni a tupath troa he la teritoare i epun ngöne la foa lao treu. Ngo maine tha ijiji epuni kö troa eatrëne lai, pane ithanatane jë memine la atre thupëne la Ini Tusi Ne La Ekalesia i epun maine itre xane matre xatua epun. E fenesi hë la teritoare thupene la foa lao treu, tre, hamëne pi hë, maine thaa ase kö, sipone jë troa huliwa ngön hmaca. Eje hi laka, thaa loi kö tro epuni a lapa fë paluane la teritoar cili, ngo loi e troa nue hmaca matre sipon eje me huliwane hnei itre xan. Maine thaa tru menu kö la teritoare ne la ekalesia i epun, nge thaa ijije kö troa hetrenyi la ketre sipu teritoare së, haawe, sipone jë kowe la atre thupëne la ini tusi epun la ketre hnepe götran ne la ketre teritoar.
5. Nemene la nyine troa kuca matre troa eatrëne hnyawa hne së la hnëqa ne cainöje hna ahnithe koi së?
5 Ame la hnëqa së troa cainöje “e cailo fen” tre, ketre huliwa ka tru hna ahnithe koi së. (Mat. 24:14) Qa ngöne lai, nyipi ewekë catre troa ce huliwa. Loi e tro sa sine la itre icasikeu göi cainöje trootro, ngo ketre ixatua mina fe koi së e hetre sipu teritoare së matre troa ketr la ka ala nyimu ngöne la easa cainöjëne la maca ka loi.