Eloine La Troa Sipo Götrane Hnë Tro Sa Isa Cainöje Ngön
1. Maine tru la itre götrane hnë troa cainöje ngön, nemene la hna aijijë së troa kuca hnene la ekalesia?
1 Maine tru la itre götrane hnë troa cainöje ngön, nemene la hna aijijë së troa kuca? Ene la troa sipone matre troa ahnithe koi së la ketre götrane ka tha nanyi kö qa ngöne hnalapa së, matre tro sa cainöje e cili. Kola qaja hnene la itus Organisés ngöne götrane 103, ka hape, ‘maine easenyi hi la götrane hnë tro sa cainöje ngön qa ngöne la hnalapa së, ka loi hi, matre ijije tro sa canga nyiqaane la huliwa së. Ketre, ijije hi tro sa hane hëne la itre xa ka cainöj, matre troa ce huliwa me easë ngöne lai götrane cili.’
2. Nemene la aqane troa huliwane me itre xane la hnepe götrane hna nue koi së troa cainöje ngön?
2 Matre Troa Ce Huliwa Memine La itre Xan: Maine tha nanyi kö la götrane hnë tro nyipunieti a cainöje ngön qa ngöne la hna huliwa i nyipunie, nge atre hi nyipunieti laka, kolo fe hi a huliwa e cili hnene la ketre ka cainöje hë, ijije hi tro nyipunieti a pane itronyi ngöne lo lai ijine xeni hnaipajö, maine qëmekene troa lö hmaca koi hnalapa, matre troa pane cainöj. Maine hna hamë nyipunieti la ketre götrane hnë troa cainöje ngön, nge ka tha nanyi kö qa ngöne la hnalapa, ijije hi tro nyipunieti a ce wange memine la itre atrene la hnepe lapa i nyipunie troa cainöje me angatr e cili, e heji lapa. Maine tha nyipunieti kö a tro kowe la icasikeu thatraqane la huliwa ne cainöj, tre tha tro kö a thëthëmine troa pane thithi koi Iehova matre sipo Nyidrëti troa ce me nyipunie ngöne la huliwa ne cainöj. (Fil. 4:6) Nyipici laka, ka loi la troa huliwa ngöne lai götrane hna ahnithe koi nyipunie, ngo ame pe, ketre nyipi ewekë troa sine pala hi lo itre icasikeu thatraqane la gurupe ne cainöje së. Ka tune e mecixeni me sabath, itre drai hna hnëkëne thatraqane la huliwa ne cainöj.
3. Nemene la itre eloine la troa isa hetre hnepe götrane hnë troa cainöje ngön?
3 Itre Eloin: Maine hetre hnepe götrane hna nue kö koi nyipunie troa cainöje ngön, ka loi hi, pine laka, qanyi nyipunieti pë hë wange la traeme ka ijije koi nyipunieti troa cainöje e cili. Ketre, hetre traeme i nyipunieti hë troa cainöje hnyawa, ke tha kolo hmaca kö a tro koi ketre götran. Itre eloine lai ka upe la itre xa trejine troa hane pionie ka ixatua, maine pionie lapa pena. Ketre, maine hetre itre atre hë e cili hnei nyipunieti hna öhne ka ajane troa sisedrëne la porotrik, maine ka ajane troa ini Tusi pena, haawe, tha jole kö troa wai angatre hmaca, ke angatre hi e cili ngöne lai hnepe götrane hna nue koi nyipunieti troa cainöje ngön. Kola qaja hnene la itre xa trejine ka hape, ame la eloine la easa isa hetre hnepe götrane hnë troa cainöje ngön, nge a nyimu a tro së troa cainöje ngöne la götrane cili, tre atre hnyawa ha së la itre atrene la itre hnalapa, nge imajemikeu hë së me angatr. Maine hetrenyi fe nyipunieti la ketre hnepe götrane hnë troa cainöje ngön, tre hapeu, atreine jë kö nyipunieti memine la hnepe lapa i nyipunie troa kuca asë la qa i nyipunie?—2 Tim. 4:5.