Maine Pëkö Atren La Itre Hnalapa
1. Nemene la ketre hnepe jole hne së hna öhne hë enehila ngöne la easa cainöje ngöne itre hnalapa trootro?
1 Ame ngöne la nyimu götran, kola jole trootro troa öhne la itre atr ngöne la itre hnalapa i angatr. Ngöne la itre “ijine aköte” celë, nyimu hawa ne huliwa la itre atr göne tro hi a hetrenyi la itre ka nyipi ewekë thatraqane la mel. (2 Tim. 3:1) Ame itre xan, tre, angatr a tro gaa nanyi matre troa itö maine mano me ngenu. Tune kaa la aqane tro sa cainöjëne la maca ka loi kowe la itre atr cili?
2. Troa xecie tune kaa koi së laka, hna kuca hnyawa la itre atr ka pë atren?
2 Loi e Troa Xome Hnyawa La Itre Ithuemacany: Ame la pane nyine troa kuca, tre, ene la troa cinyihane la itre uma ka pë atren. Ka nyipi ewekë catre lai, maine epuni a kuca lapaan la teritoare i epun. Epuni kö a hane cinyihane la ëj me gojenyi me numero ne la teritoar, me ëje i epun, me drai ne huliwan? Ami göhnene ju la itre xaa ithuemacanyi maine epuni me ketre trejine a bëeke troa wange hmaca la itre hnalapa ka pë atren. Ame hë ngöne la kola ase cainöj, mekune kö troa hamëne la itre ithuemacanyi hna cinyihan kowe la trejine atrekë teritoar troa ce xeen memine lo itre xaa teritoar; maine pena tro angeic a nue koi epuni troa kuca la itre hnalapa ka pë atren. Xome jë la ketre pepa matre troa cinyihane la itre ithuemacanyi göne la itre atr hnei epuni hna troa wange hmaca.
3. Nemene la itre mekune nyine troa xatua së troa hane ketr la itre atr ka paatre ngöne la itre hnalapa i angatr?
3 Tupathe Jë Ngöne La Ketre Ijine Pena Ha: Maine jë ame la itre xaa ka paatr ngöne la itre hnalapa i angatr ngöne la drai ka pexej pine laka kola huliwa, haawe, maine jë tro pena ha a öhnyi angatr e heji lapa maine e mecixeni me sabath. Tro kö epuni a eköthe la porogarame i epuni matre troa bëeke hmaca ngöne la itre xaa ijine ka ijij? (1 Kor. 10:24) Maine thaa ijiji epuni kö, tre, hamëne jë la itre hnalapa ka pë atren kowe la ketre trejine ka ijije troa iwai ngöne la ketre drai me ketre hawa pena. Nge e paatre pala hi la itre atr ngöne la itre hnalapa i angatr, tre, maine jë troa cinyanyi koi angatr maine troa hë angatre pena jëne telefon. Ame koi itre trejine ka nango wezipo matre jole troa hane cainöj ngöne itre hnalapa trootro, maine jë tro angatr a madrine troa xatua epuni ngöne la götrane cili.
4. Nemene la ka amamane la enyipiewekëne la troa wange hnyawa pala hi la itre hnalapa ka pë atren?
4 Drei la ketre ceitune ka amamane la eloine la troa thele troa öhne la itre atr ka paatre kö ngöne la itre hnalapa i angatr. Thupene la köni macatre ne tro lapa la itre trejine troa wang la ketre hnalapa, ene pe angatre a öhne ju lai atrene lai uma. Kola mama laka ame ngöne la köni macatre cili, tre, kola itreqe hnene lai föe troa traqa hnene la ketre temoë troa xejë hmaca la etidi eahlo hna nyiqaane hë qëmekene troa lapane lai hnalapa.
5. Eu la kola qaja ka hape ase hë afenesine la ketre teritoar?
5 Huliwane Asë Jë La Teritoare Së: Eu la troa qaja ka hape, ase hë kuca asë la ketre teritoar? Ngöne lo kola mama laka, ase hë kuca asë matre troa öhne la itre atr ngöne la nöjei uma asë. Maine jë tro pë hë a amë la ketre tarak maine ketre zonale pena ka he cili hë ngöne la itre hnalapa ka pë atren, a ngöne lo itre teritoar hna thaa huliwane lapaan. Loi e troa foa lao treu ne troa afenesine la teritoar. Thupene lai, troa alöne asë la itre teritoar matre tro la atrekë hnëqane a xeene asë hnyawa hmaca itre ej me wange la itre nyine troa kuca.
6. Pine nemen matre loi e tro sa thele troa cainöjëne la maca ka loi kowe la nöjei atr asë ka lapa ngöne la teritoare së?
6 Ame la aja së tre troa hetre ijine kowe la itre atr ka ala nyimu troa hane atre me hëne la ëje i Iehova, ene pe tro fe hë angatr a hane mel. (Rom. 10:13, 14) Kolo lai a qaja fe lo itre atr ka paatre kö ngöne la itre hnalapa i angatr ngöne la easë a cainöj ngöne itre hnalapa trootro. Loi e tro sa tui Paulo aposetolo, ene la troa hetrenyi la ajane “troa anyipicine la maca ka loi ne la ihnimi gufa i Akötresie.”—Ite hu. 20:24.