Hapeu Ka Tru La Teritoar Ne La Ekalesia i Epun?
1 Hnei Iesu hna catre cainöj ekö e Isaraela, ketre teritoar ka tru catr, qaane ju hi la itre lapa e Iudra, uti hë ngöne la itre hnehlapa ne Galilaia. (Mareko 1:38, 39; Luka 23:5) Nyipi ewekë fe tro sa kuca la hne së hna atrein troa cainöjën la maca ka loi, kowe la itre atr ka nyimutre. (Mareko 13:10) Ngo eje hi laka, thaa huliwa ka hmaloi kö lai. Pine nemen?
2 Nango isa pengöne kö la itre teritoar e Drehu me e Mëëk, ngöne laka, itre tribu hna troa cainöje ngön, nge ketre iananyi catr itre ej, matre kösë kola troa trongën la itre gojenyi ka nany. Ame kowe la itre trejin e Numea, tre, angatr a thel la itre atr ka qene Walis, nge ame itre xaa ekalesia, tre hna athipe fe koi angatr la itre xaa götran hna troa cainöje ngön e tröne Numea. Nemen la nyine tro së a kuca matre troa xatuan la itre atr ka mel ngöne la itre teritoare cili, troa atre la nyipici göi Iehova me Iesu me göne la Baselaia?
3 Loi e Troa Hnëkë Hnyawa: Nyipi ewekë tro la atre thupën la huliwa ne cainöj, memine la atre hnëkën la itre teritoar, a elemekene hnyawa la huliwa matre troa hetre thangan ka loi kowe la itre atren la ekalesia. Maine jë troa ami trepen la itre mecixen matre troa cainöj ngöne la drai ka pexej, pine laka, ala nyimu la ka ijij troa cainöj ngöne la ijine cili. Ame ngöne la itre teritoar ka nany, hnëkëne jë troa cainöj ngöne la itre drai ka pexej, xeni ju kö e cili ngöne la götran hna cainöje trootro. Maine jë troa canga kuca la icasikeu göi cainöje trootro, matre troa hetre traem ne tro kowe lai teritoar, maine tro pena a icasikeu easenyine lai götran hna troa cainöje ngön. Thaa tro kö a tru menu la alien la itre loto, nge loi e troa hetre huliwa pala hi hnene la nöjei trejin. Amë jë la ijin troa cainöj ngöne la itre tribu, hmekun lo hneijine hedredrei, matre lolo la drai memin la itre gojeny.
4 Ame koi itre ka troa cainöj ngöne la itre teritoar ka qaja la itre xaa qene hlapa kö, loi e tro angatr a hnëkëne amë la ëj me hnalapa me map, matre thaa jol, nge ketre thaa tro kö a hmitr troa canga kuca lai itre teritoar cili. Hnëkëne jë la itre teritoar, matre ijij tro la itre trejin a cainöje ngöne la nöjei hnalapa hna athip ngöne lai teritoar.
5 Loi e troa xecie koi epun laka, ijij la etrun la itre itus hna troa tro fë. Maine thaa hna kuca lapaane kö la teritoar, maine jë tro hi a amë pe ngöne la itre hnalapa ka pë atren, la ketre tarak maine ketre zonal ka nango he cili hë. Maine hetrenyi ngöne la qene hlapa i epun la tarak, hna hape, Aimeriez-vous en savoir plus sur la Bible ? hamëne ju kowe la itre atr hnei epuni hna ixelë memin, me amë pe ngöne la itre hnalapa ka pë atren.
6 Loi e Ce Huliwa Hnyawa: Nyipi ewekë tro sa ce huliwa hnyawa, maine hna athip kowe la ekalesia së troa kuca la ketre teritoar ka tru. Maine nanyi la itre götran hna troa cainöje ngön, loi e tro asë hi së a mekune la itre loto ka iati, göi thupene saas. Loi e tro pala hi së a atreine waiewekë, ngöne la easë a öhne la itre atr ka ajan troa ithanata. Loi e tro fe së a atrehmekun la enyipiewekën la troa ketr asë la itre atren la teritoar, nge troa hane mekune fe la itre atr ka itreqe, nge ka ce të me easë hnine la loto. Maine epuni a ajan troa pane aqean la porotrike i epun memin la ketre atr, ijije kö troa wang la ketre drai troa bëeke hmaca, matre thaa tro kö a ahmitrën la itre xaa sine ce tro i epun troa sisedrën la cainöj?
7 Isa pui hnyawa ju memin la itre atr asë ka drei epun, matre troa bëeke hmaca troa wai angatr. Thaa tro kö a makëne caasin la itre hnalapa, tupathe jë fe troa xom la ëjen me numero ne telefon ne la itre atr ka drei së, matre troa cainöj koi angatr jëne telefon. Maine pëkö ëjen ne la itre gojeny me numero ne la itre uma, desëne ju ngöne la ketre pepa la hna lapa hnene lai atr, matre hmaloi elany troa wai angeice hmaca.
8 Drei la ketre hnëqa ka lolo catr the së, ene la troa kuca la hnei Iesu hna amekötin, kola hape: “Ame la nöjei lapa memine la nöjei hnalapa hnei nyipunie hna troa xulu kow, te, hnyingënejë, ka hape, Dei la ate loi thina e cili”! (Mat. 10:11) Nyipici, tro hë Iehova a amanathithi së, maine easë a nue hnyawa la mele së troa kuca asë la hne së hna atrein, ngöne la huliwa ka lolo celë!