Thele Jë La Itre Ka Ajane Jëne La Cainöje Trootro Ngöne Xötre Gojeny
1 Hnei Iesu hna inine la angetre drenge troa thele la itre ka ajane troa drenge la maca ka loi ne la Baselaia. (Mata. 10:11) Ngo ame ngöne itre xaa götrane enehila, ke, jole trootro hë e troa öhne la itre atr ngöne la itre hnalapa i angatr. Hawe, troa öhne tune ka la itre atr cili?
2 Nyipiewekë catre la cainöje trootro ngöne la itre gojeny, pine laka, aqane tro së lai a öhne la itre atr ka paatre kö ngöne la ijine easë a traqa ngöne la hnalapa i angatr. Hawe, loi la tro së a cainöje trootro ngöne itre gojeny, ka tune ngöne hnë treqe kar, maine easenyine lo itre batima hna thinge koi së, maine ngöne itre park, me itre götrane hna traqa lapa hnei nöjei atr.
3 Hna xou hnei itre xane la kola ithahnataane la cainöje trootro ngöne itre gojeny. Maine jë angatr’a luelue troa kuca la huliwa celë, pine laka thatre kö la nyine qaja, maine pena angatr’a hmahma e tro la itre atr ka xele ma dreng, a canga thipetrije la maca ne la Baselaia. Ka pëkö nyipi kepine la itre hna xouene celë. Hna qaja hnene la itre ka kuca lapaane la huliwa cili ka hape, ceitu hi memine la kola cainöje trootro ngöne itre hnalapa. Hnei angatre hna wangatrehmekune laka ame la hna majemine hnene la itre atr, ene la troa ithahnataane la nöjei pengöne e cahu hna tro, celëhi matre tru kö la hnei angatre hna ithahnata memin, me ka drei angatre e cahu gojenyi hune la itre hna öhne lo itre ijine fenifeni qëhnelö. Hawe, maine tro së a “catr”, ke, tro së lai a sesëkötre la kola kapa la itre thangane ka loi. — 1 Thes. 2:2.
4 Nemene la ka ijije troa kuca matre hetre thangane ka loi la cainöje trootro ngöne itre gojeny? Nyipiewekë troa hnëkëne hnyawan. Loi e troa pane canga e la itre itus, thupene lai, iëne jë la casi maine lue mekune hnei epuni hna wange ka hape, ka troa ihmeku memine la itre hna mekune hnene la itre atr hnei epuni hna troa öhne me ithahnata memin. Loi e tro hi a sine la menetre la kola xötrei ithahnata, tha tro kö a aqean. Ame la hne së hna thel, matre loi e tro së a thele la itre götrane hna majemine trongëne lapaane hnei nöjei atr. Ngacama loi palahi troa hetre sine ce tro, ngo lolo catre kö e troa isa ije ngöne la götrane huliwa celë. Pine laka, ame itre xaa ijin, ke, tru catre kö la hnei ka tro ala lue hna porotrik, nge tha hmekëne hë la itre ka ajane troa drenge la maca ne la Baselaia.
5 Ka hetre thangane catre kö la tro së a ketre sipu easenyine la atr me porotrike memin, hune la tro së a lapa ngöne la ca götrane göi troa amamane hmekuje hi la itre zonal. Goeëne hnyawane jë lai atr la epuni a ithahnata. Hetre thina ka ijije troa mama the së, ngöne la kola tupathe troa nyiqaane la porotrik, loi e troa eje the së la metrötr, me ipië, me tro meköt. Ame itre xaa ijin, ke, nango ce tro jë, me ce porotrike trootro memine lai atr. Maine ketre atr ka dreng, hawe, hamëne jë la itre zonal. Maine ka tha ajane petrekö troa xome itr’ej, tupathe jë pena troa hamëne la ca tarak.
6 Ejehi laka, ka loi kö la troa hnëkëne hnyawaane la ketre aqane nyiqaane ithahnata nyine troa nyijëne la ketre hnying, maine qaja pena la ketre mekune ka ijije troa amejëne la aja ne lai atr. Maine ka ajane hi lai atr, ke, hnyingëne jë la eje i angeic, me aderes, me numero ne telefone i angeic, matre kökötre jë la aja ne lai atr. Ijije tro epuni a qaja ka hape: “E nyipëti a ajane troa akökötrene la atrehmekune i nyipë, ke, ka madrine ni troa wai nyipëti hmaca, maine tro pena ni a upe la ketre temoë troa bëeke hmaca troa wai nyipë.”
7 Hnene la ketre qatre thupe hna nyiqaane ithahnata, e cahu hna tro memine la ketre föe ka ikötresai hë, nge eahlo a qaja ka hape tha ase petrekö eahlo hane porotrike memine la itre temoë ngöne la hnalapa i eahlo. Hnei eahlo hna xome la itus, me nangëne matre tro la ketre söre a bëeke troa wai eahlo hmaca ngöne la hnalapa i eahlo, ngöne la ijine ka ijije koi eahlo. Nyimu ka ajane lo hne së hna öhn, epi tro la aqane maca së ngöne la huliwa ne cainöje trootro e cahu gojenyi a xatua angatr. — Ite huliwa 17:17.