Hetre Thangane Ka Loi Hna Kapa, e Troa Cainöj e Cahu Gojeny
1. Nemene la ketre aqane tro sa xötrethenge la tulu i Iesu?
1 Ame ngöne lo Iesu a cainöje e celë fen, thaa hnei nyidrëti kö hna cile hnö troa ithanata kowe la itre atr hnei nyidrëti hna ixelë memin e cahu gojeny, me ngöne la itre götrane gaa tru atr. (Luka 9:57-61; Ioane 4:7) Eje pala hi thei nyidrë la ajane troa thawa kowe la itre atr ka nyimutre la ketre maca ka sisitria. Ame enehila, ame la troa cainöj e cahu gojeny, tre, celë hi ketre aqane troa xatuane hnyawa la itre atr troa kapa la inamacan qaathei Akötresie. (Ite edomë 1:20) Tro ha mama la itre thangane ka loi, e hne së hna tro troa wange la itre atr, me atreine waiewekë.
2. Nemene la aliene la hna hape, troa tro troa cainöje kowe la itre atr e cahu gojeny?
2 Tro Jë Troa Wange La Itre Atr: Loi e tro sa tro troa wange la itre atr, ngo tha tro kö sa cile maine lapa pena ngöne la ketre götran, me treqene tro angatr a tro koi së. Loi e tro sa hnyima me goeë angatr cememine la thiina ka menyik. Maine ala nyimu së itre ka cainöj, tha tro pi kö sa ce tro asë troa ithanata memine la atr. Nyipi ewekë mina fe tro sa wai angeice hmaca, matre troa sisedrëne la porotrik. Maine ijije hi, ame ngöne la kola nyipune la porotrik, sipone jë troa hë angeice hmaca. Hetrenyi fe la itre xan ka tro pala hi ngöne la ca götran ne pala gojeny; celë hi matre casi pala hi la itre atr hnei angatre hna ithanata kow, nge ketre, ijije hi tro angatr a akökötrene la aja ka eje thene la itre atr cili.
3. Tro sa atreine waiewekë tune kaa ngöne la kola cainöj e cahu gojeny?
3 Loi e Tro Sa Atreine Waiewekë: Loi e tro sa atreine waiewekë hnyawa, ngöne la aqane troa iëne la götran memine la itre atr hne së hna troa cainöje kow e cahu gojeny. Thaa nyipi ewekë kö troa cainöj kowe la nöjei atr asë ka tro xötreithi së. Pane goeëne hnyawane jë. Drei la ketre ceitun, maine easa öhne laka, ka trene jol la ketre atr, haawe, tha tro sa acilë angeic. Ame la easa cainöj qëmekene la ketre hna huliwa i maseta, tha tro kö sa ithanata catr wanga wesitre së jë la maseta. Celë hi matre, loi e troa cainöj ngöne la kola fenesi la itre atr qa hna huliwa, ngo tha ngöne kö la angatr a traqa troa huliwa. Ame la easa easenyine la itre atr, tha tro pi kö sa axouenyi angatr maine asesëkötrë angatr pena. Ketre, loi e tro mina fe sa atreine waiewekë ngöne la aqane troa tro fë la itre itusi së. Maine pëkö hni ne ajan thene la atr, the hamëne kö së la itre zonal, ngo hamëne jë pe la ketre tarak.
4. Pine nemene matre ka hetre thangan me ka hamë madrin la troa cainöj e cahu gojeny?
4 Kola aijijë së hnene la hna cainöj e cahu gojeny, troa jumejume la itre itine feja ne la nyipici ngöne la ketre hnepe ijin. (Ate cai. 11:6) Maine jë ame la itre atr hne së hna cainöje kow, tre, kolo hi lo itre atr ka paatre kö ngöne lo itre hnalapa i angatr. Haawe, maine tro sa xome la itre aqane cainöj e cahu gojeny, eje hi lai laka, tro hë sa madrin nge tro ha hetre thangane ka loi hne së hna kapa qa ngöne la huliwa cili.