Hane Kö Epuni Tupathe Troa Cainöje Trootro e Hej?
1 Hetre madrine së asë hi ngöne la easë a öhne laka, atraqatre la thangane la huliwa së. Ngo maine pëkö thangane ka loi hne së hna kapa, ke, tro hë së a xomeceitune la huliwa kösë ketre ehnef, nge ka thaa ithuemadrinë kö. Ketre manathithi la troa kepe thangane ka loi, qa ngöne la ketre huliwa ka nyipiewekë. (Wange ju la Ate Cainöj 3:10-13.) Atreine hi tro së a trongëne la mekune celë ngöne la huliwa së, ene la troa cainöje trootro. Ketre ewekë la hne së hna öhne laka, maine hne së hna ce ithahnatane la Tusi Hmitrötre memine la itre atr ngöne la easë a cainöje trootro ngöne itre hnalapa, ame ngöne la easë a bëeke hmaca kowe la hnalapa së, ke, kola egöcatre la mele së ngöne la ua. Drenge hi së e kuhu hni së laka nyipiewekë la hne së hna kuca.
2 Ame ngöne la itre xaa götran, jole catre hë enehila troa öhne la itre atr ngöne la itre hnalapa i angatr, ngöne la itre xaa hnepe ijine la drai. Kola mama ngöne la itre rapore ka hape, ngöne la itre götrane ka nyimutre, 50 nge sin, ngöne la 100 lao hnalapa ka pë atrene ngöne la easë a nyiqane cainöje trootro e hmakany. Nyimutre la itre ekalesia ka cile kowe la jole cili, matre angatre a hnëkëne ju la itre ijine troa cainöje e hej, nge hnei angatre hna öhnyi thangane ka loi qa ngöne lai. Hnene la itretre cainöje hna qaja ka hape ame ngöne la angatre a traqa e hej, ke, nyimutre catre la itre atr hna öhne ngöne la itre hnalapa, a angatre a mano nge hetre aja i angatre troa drenge la maca ne la Baselaia. Hane kö epuni tupathe troa cainöje e hej, ngöne la teritoare i epun?—Wange ju la Mareko 1:32-34.
3 Itre Qatre Thupe a Hnëkëne Hnyawa La Huliwa Ne Cainöje e Hej: Ame ngöne itre xaa götran, hna sajuëne hnyawa la itre icasikeu göi troa cainöje trootro e hnaipajö hej, maine heji lapa. Itre ewekë la hna kuca thatraqane la itretre cainöje thöthi ka fenesi qa hna ini e hnaipajö, me itre ka huliwa i maseta ngöne la drai ka pexej. Ame kowe la itre trejine ka öhnyi jole troa cainöje e mecixeni me sabath, ke, hmaloi pena koi angatre troa cainöje lapa e heji ne la wiik.
4 Nyimutre la itre aqane cainöje ka ijij, nyine tro epuni a kuca e hej. Ijije tro epuni a cainöje trootro ngöne itre hnalapa jëne la itre zonal, maine troa hamëne pena la itus nyine trofë ngöne la treu. E heji lapa la ijine ka ijije e kola mekune troa thele la itre atr hna thaa majemine kö öhne ngöne la itre hnalapa i angatre e hmakanyi hnene la itretre cainöj, maine e mecixeni me sabath. Tro fe a hetre thangane ka loi qa ngöne la hna cainöje e cahu gojeny, ngöne laka, troa ixelë me ithahnata memine la itre atr ka bëeke qa hna huliwa i maseta. Alanyimu catre fe la itre ka öhne laka, e heji la ijine ka loi göi troa wange hmaca la itre atr ka hetre ajan.
5 Loi e Troa Hmek, Me Ipië La Aqane Ujë: Ngöne la itre xaaa götrane enehila, ke, e heji lapa ha maine jidri pena, kolo ha lapa hnuma la itre atr, pine laka, tru la itre jëne iangazo e troa troagö e tröne la hnalapa. Loi pala hi e troa ce tro alanyimu ngöne la itre gojenyi gaa hetre laam, nge troa kuca la itre hnalapa, me itre batima ngöne la itre götrane ka pë engazone kowe la mele i epun. Ame ngöne la epuni a fenafena la qënehlö, ke, cile amamanyi jë, nge qeje epuni jë matre atre epuni hnyawa hnei angatr. Inine jë troa atreine waiewekë. Maine epuni a öhne laka epuni a traqa, nge thaa ijine tro kö a ithahnata pine laka, kola xeni hnene la fami, qaja ju ka hape tro epuni a bëeke hmaca ngöne la ketre ijine ka ijij. Loi e troa cainöje e heji lapa hune la troa wai angatre e hnenyipajidr, pine laka ijine angatre hë lai a mekune troa meköl.
6 Maine tro së a nyi hlue i Akötresie ngöne la “lai me jid,” tro hë Iehova a amanathithine la aqane catre së.—Hna Ama. 7:15.