Tune Kaa La Aqane Tro Epuni a Kuca Matre Öhne La Itre Atr Ngöne La Itre Hnalapa?
1. Pine nemene matre loi e tro epuni a kuca matre öhne la itre atr ngöne la itre hnalapa i angatr?
1 Hne së itre Keresiano hna kapa la ikönë celë troa itre “axena at.” (Mat. 4:19) Tune la ketre atr ka atreine nyi i, tro ha hetre thangane la huliwa së nyine axena atr, e hne së hna ami ijine troa cainöj ngöne la itre ijine hetre atrene la itre uma. Ngöne la itre nöj ka nyimutre, kola troa xulu la itre treu ka qea lai. Kola öhne la itre ka ala nyimu ngöne la itre hnalapa i angatr e hnaipajö hej maine hejiheji pena. Loi la hni angatr, nge canga hmalahnine angatr troa drei së. Hapeu, ijije kö tro epuni a kuca matre tro epuni a cainöj ngöne la itre ijine cili?—1 Kor. 9:23.
2. Nemene la itre xaa jëne troa ketr la itre atr hnene la maca ka loi?
2 Cainöje e Hej: Maine tro sa eköth la aqane tro sa cainöj e hejihej, tre, tro lai a aijijë së troa cainöjëne la maca ka loi kowe la itre atr ka nyimutre. (Ite edomë 21:5) Ijije tro la itre thöth a cainöj thupene la hna ini. Ame itre xan, tre, angatr a cainöj thupene la hna huliwa. Hna hnëkën hnene la itre xaa gurup ne Ini Tus la ketre icasikeu göi cainöje trootro qëmekene la hawa ne Ini Tus.
3. Nemene la aqane tro epuni a cainöj e hnaipajö hej, me heji lapa ngöne la teritoare i epun?
3 Ame la ketre eloine la troa cainöje ngöne itre hnalapa trootro e hnaipajö hej me heji lapa, tre, tro sa ketr lo itre atr hna thaa öhne kö ngöne la itre hnalapa i angatr ngöne la drai. Ame ngöne la itre teritoare ka nyimutre, ijije fe troa cainöje e hejiheji e cahu gojeny me ngöne la itre xaa götran gaa tru atr. Nge ala nyimu la itre trejin ka öhne laka itre ijine ka sisitria catr e hejihej matre troa kuca la itre vizit, me nyiqaane la itre etid.
4. Pine nemene matre nyipi ewekë troa atreine waiewekë me hetre metrötr ngöne la easa cainöj e hejihej?
4 Nyipi Ewekë Troa Atreine Waiewekë: Nyipi ewekë tro sa inamacan ngöne la easa cainöje e hejihej. Thaa loi kö e troa traqa wai angatr e hnenyipajidr, pine laka ijine angatre hë lai a mekune troa meköl. (Fil. 4:5) Ame ngöne la epuni a fenafena la qëhnelö, tre cile amamanyi jë, nge qeje epuni jë matre atre epuni hnyawa hnei angatr. Canga qaja amamane jë la aliene la tronge i epun. Maine epuni a öhne laka epuni a traqa, nge thaa ijine tro kö a ithanata pine laka, kola xeni hnene la fami, qaja ju ka hape, tro epuni a bëeke hmaca ngöne la ketre ijine ka ijij. Loi e tro pala hi a hetre metrötr.—Mat. 7:12.
5. Tune kaa la aqane tro sa hmekëne la itre iangazo ngöne la kola cainöj?
5 Nyipi ewekë tro fe sa hmek, ke, tru catr la iangazo enehila. Maine epuni a cainöj e heji lapa maine jidri pena, loi e troa ce tro ala lue maine ala nyimu pena. Loi e troa xome la itre gojenyi gaa hetre laam. Cainöje hmekuje jë hi ngöne la itre götrane laka xecie koi së laka pëkö nyine xouen. The tro kö ngöne la itre götran hnei epuni hna xouene e hnenyipajidr.—Ite edomë 22:3.
6. Nemene la itre xaa eloine hna kapa qa ngöne la hna cainöje e hnaipajö hej me hejihej?
6 Kola xatua së hnene la hna cainöje e hnaipajö hej, me hejiheij, troa xome la huliwa ne pionie ka ixatua me pionie lapaa. (Rom. 1:12) Hapeu, ijije kö tro epuni a kuca matre tro epuni a xome la aqane huliwa celë?