Nyipiewekëne Jë La Ijine Cainöj
Hne së hna amamane lo macatre 2014 ka hape, nyipi ewekë catre koi së la troa huliwa i Iehova, ke 1 945 487 604 lao hawa ne easa cainöj. (Sal. 110:3; 1 Kor. 15:58) Atre hi së laka, “xoxopate pe hi la ijin.” Celë hi matre, nemene la aqane tro sa nyipiewekëne la hnepe ijine cili?—1 Kor. 7:29.
Ma ka loi e troa saze la aqane tro sa cainöj, ke ame itre xa ijin, tre, ca hawa ne cainöje së nge pëkö ca atr hne së hna ithanata memin. Nga nemene jë la nyine tro sa kuca? Nyipici laka, ka nango isapengöne kö la itre götrane hne së hna isa cainöje ngön, ngo hane hi la itre xa ixatua matre tha tro kö sa “lepe la eny.”—1 Kor. 9:26.
Cainöje Ngöne Itre Hnalapa Trootro: Hne së pala hi hna majemine nyiqaane cainöj trootro kowe la itre hnalapa e hmakany. Ngo ma ka loi e hnaipajö hej, maine e heji lapa ke itre atr lai a bëeke qa hna huliwa me nango mano. Ame ngöne la drai, tro pe sa tupathe troa cainöje hmekune la itre hna huliwa me ngöne la gaa tru atr.
Cainöje Ngöne La Gaa Tru Atr: Maine hetre götrane gaa tru atr hna ahnith kowe la ekalesia së, tro sa cainöje fë ilaulau maine “présentoirs” e cili. (Wange ju la Huliwa Ne Baselaia ne Julai 2013, g. 5.) Ngo maine tha tru hë hnei atr ka tro ngöne lai götrane hna ami laulau maine présentoir, tro la Komite Göi Huliwa ne la ekalesia a thele la ketre götrane gaa tru atr.
Iwai Hmaca Me Ini Tus: Tro sa tupath troa tro kowe la itre atr hne së hë hna lapaa hamë itusi kow, me ini Tusi memin ngöne la traem ne kola patr la itre atr ngöne la hnalapa. Ka tune e Mecixen, ma ka loi troa ini Tus me tro kowe la itre atr hne së hna wange hë e hnaipajö maine e hejihej, ke tro së lai a öhne la itre atrene la itre hnalapa e hmakany.
Nyipici laka, tro sa e la hawa ne easa huliwa, ngo tro së lai a madrine e hetre thangane la hne së hna cainöj. Maine jole troa öhne la itre atrene la itre hnalapa ngöne la ketre hawa ne la drai, kuca jë la itre xa huliwa tune la iwai hmaca maine ini Tus, nge bëeke jë ngöne la ketre hawa. Thithi jë koi Iehova, “Joxu ne la meledrai,” matre tro Nyidrëti a xatua së troa nyipiewekëne la itre hawa ne cainöj!—Mat. 9:38.