Loi e Tro Së a Huliwane Hnyawa La Traeme Së
1 Caasi hi la etrune la traeme së ngöne la nöjei wiik. Sisitria catre la itre hnepe hawa hne së hna xome matre troa cainöj, pine laka, traeme lai hna xome thatraqane la huliwa ne iamele. (Rom. 1:16) Pine laka, easë a wangatrune la traeme cili, haawe, easë a amamane ngöne la aqane hnëkë hnyawa së kowe la huliwa hna amekötin, me canga traqa kowe la itre icasikeu qëmekene troa cainöj, me canga tro kowe la götrane hnë troa cainöje ngön. Nyipi ewekë tro së a canga tro troa cainöje trootro, ngo thaa tro kö a huli hmitre qëmekene lai. Pine laka, hnei Iehova hna ini së me qaja ka hape, “hete ijine la nöjei huliwa asë,” haawe, nyipi ewekë tro së a wangatrune hnyawa la ijine hne së hna hnëkëne amë thatraqane la huliwa ne cainöje trootro.—Ate Cai. 3:1.
2 Loi e Tro Së a Huliwane Inamacanëne La Traeme Së: Hetrenyi la itre manathithi hne së hna kapa, ngöne la easë a catre xötre thenge la ketre programme, ka aijijë së troa tro fë pala hi la maca ka loi. Eje hi, tro kö a kapa la itre manathithi ngöne la hna cainöje trootro, thenge la etrune la traeme hna xome thatraqane la huliwa cili. Maine nyipici laka, hetre ijine hë hne së hna amë thatraqane la huliwa ne cainöj, hapeu, ijije kö tro së a akökötrene la itre hawa ne troa cainöje trootro? Hanawange la ketre ceitun, maine ase jë së tro fë zonale ngöne la mecixen, ijije kö tro së a xome la itre xaa hnepe ijine troa iwai hmaca? Maine hne së hë hna cainöje trootro ngöne la mecixen, hapeu, ijije kö tro së a pane xome la itre xaa hnepe hawa, matre troa iwai hmaca, maine troa etid memine la itre atr? Ijije jë fe kö troa hane cainöje trootro ngöne la nöjei ijin, thupene la hna cainöje ngöne itre hnalapa trootro? Atreine hi troa kökötre la huliwa së, e hna thele la nöjei aqane tro fë la maca ka loi.
3 Maine thaa hmeke kö së, atreine hi tro sa aluzine la itre hawa ka sisitria ngöne la easë a cainöj. Eje hi laka, ame la itre ijine ngazo drai, pëkö engazone la troa pane mano, matre hetre trenge catre hmaca jë troa sisedrëne la huliwa. Ngo loi e troa thupëne hnyawa, pine laka, ame e itre xaa ijin, thaa nyipi ewekë kö troa mano.
4 Kola mama ngöne lo itre macatre ka ase hë laka, jole hë troa öhne la itre atr ngöne la itre hnalapa i angatr. Celë hi matre nyimutre la itre trejine ka thele la isa pengöne hawa ngöne la drai, matre troa cainöje ngöne itre hnalapa trootro. Tuneka matre tupathe pena troa cainöje e hnaipajö hej, maine e heji lapa?
5 Troa aluzi traem, e tro la lue ka ce cainöje a porotrike trootro ngöne la gojeny. Loi e tro pe a isa ijei ngöne la kola tro ngöne la gojeny, matre troa ithahnata memine la itre atr hna ixelë memin. Qa ngöne lai, thaa tro ha gufa la itre hawa hna xome thatraqane la huliwa ne cainöj, nge hetre madrine hna troa kapa qa ngön.
6 The Hnöthe Kö Troa Cainöje Ngöne Itre Ijine Ka Ijij: Hna mekune troa cainöje hnene la ketre trejine kowe la ketre föe, ngo xele kö nyidroti ma drei angeic; haawe, angeice a hnyingëne jë maine hetrenyi e hnine la uma la ketre atr ka ajane troa ithahnata me angeic. Ene pe kepe angeice ju pena hnene la keme ne la hnalapa, a kolo pë hë a lapa hnuma pine laka, nyimu macatre ne tithe hë hnei mec. Ame hnene la trejine hna qeje pengöne la mejiune hna hamëne hnene la Wesi Ula i Akötresie, ene pe cia hmaca jë hi la ajane kowe la trahmanyi troa mel. Nyidrëti hë a hane lö pi qa hnine la uma matre troa sine la itre icasikeu ngöne la uma ne Baselaia, nge kolo fe hë a hane ce thawa me itre xaa atr la mejiune i angeice ka hnyipixe!
7 Hnene la ketre trejine jajinyi hna trongëne la ixatua hna hamëne thatraqane la huliwa ne cainöj, ene la troa cainöj, caa hawa qëmekene troa nyiqaane la Ini Tusi ne la Ekalesia. Hna kepe angeice hnyawa ngöne la pane hnalapa hna kuca, hnene la ketre nekö jajinyi ka 13 lao macatre, a kola drei angeice me xome la itre itus. Nge elanyi hë ngöne la hna ini, hna öhne hnene la trejine jajinyi lo lai nekönatre hna cainöje kow. Canga sipone ju hi angeice troa inine la Tusi hmitrötre koi nyën, ewekë hna kapa madrine hnene la nekö jajiny.
8 Loi e Nyipi Ewekë La Traeme Ne Cainöj: Maine tro sa catre cainöje ngöne itre hnalapa trootro, eje hi laka, tro hë së a atreine tro fë hnyawa la maca ka loi. Ijije kö tro epuni a thele troa alolone la aqane tro epuni a nyiqaane ithahnata ngöne la itre hnalapa, jëne la itre xaa aqane ithahnata ka sisitria catr? Ijije kö tro epuni a ketre atr ka atreine hamëne hnyawa la ini, ngöne la ijine kola inine la Tusi Hmitrötre kowe la itre atr? Maine celë hi ewekë lai hnei epuni hna kuca, atreine hi troa nyipi ewekë catre la traeme hna xome troa cainöj, nge troa sisitria catre fe la itre wene la huliwa ne cainöj.—1 Tim. 4:16.
9 Pine laka, “xoxopatre pe hi la ijin,” loi e troa tiqa la mele së hnene la itre huliwa i keresiano. (1 Kor. 7:29) Nyipi ewekë tro pala hi së a amë panëne la traeme hna amekötine thatraqane la huliwa ne cainöj, loi e tro eje a sisitria hune la itre xaa jole së. Loi e troa egöcatre pala hi hne së, me catre tro fë la maca ka loi. Ame la traeme ke, celë hi ketre ewekë ka nyipi lolo hnei Iehova hna hamëne koi së. Epi huliwane eje hne së cememine la inamacan, me anyipiewekëne eje hnyawa.
[Hna eköhagen götran 4]
Wange Ju La Itre Mekune Celë:
◼ Loi e troa canga traqa kowe la hna icasikeu göi cainöj.
◼ Loi e troa xalaithe hi la itre atrene la itre gurup.
◼ The hmitre kö troa tro kowe la götrane hna cainöje ngön.
◼ Kuca jë la teritoar, ngöne la itre atr e ngöne la itre hnalapa i angatr.
◼ Thaa tro kö së a hnöthe troa cainöje caas ngöne la itre xaa ijin, e maine ijije hi koi së.
◼ Loi e troa iwai hmaca ezine la hnë troa cainöje ngön.
◼ Maine hmitre itre xane pala kö cainöj, the itreqe kö ngo hane jë fe cainöje treqe angatr.
◼ Qanyi së isa wang, ngo maine ijije koi së, loi e thaa tro kö a kuca ju hi la caa hawa ne cainöj.