Loi e Troa Hetre Thangane Ka Loi La Huliwa Së

¹ Miti ju hi la drai, nge alemi trootro la ketre mejene atraqatr nyine qouen kösë hedreng. Nge hanawang, ceitune me iawe kola mitimiti ipië. Nemene ewekë la? Celë hi trongene isi itre sipa, itre milio la etrun; itre eje a traqa troa ajinëne la nöj! Ewekë la hna qeje pengöne hnei perofeta Ioela, a kola eatre ngöne la hnedrai së enehila, jëne la huliwa ne cainöje hna kuca hnene la itretre nyihluei Akötresie hna iën, me itretre ce huliwa me angatr, ene la ka ala nyimu atraqatr.

² Hna qaja ngöne la zonal, La Tour de Garde ne 1 mei 1998, götrane 11, paragarafe 19, ka hape: “Hetrenyi enehila hnedrai së la trongene isi ne la itre sipa i Akötresie; angatre a jilapane asë la ‘lapa’ ne la itre nöje ka sipu qeje angatre kö ka hape itre keresiano angatr, ngo thaa eje pe. (Ioela 2:9) . . . Ame ngöne la aqane qaja trongëne la maca i Iehova, angatre pala hi a elë sasaithe la nöjei jole asë, me lö hnine la itre uma ka nyimutre, me ixelë memine la itre atr ngöne la itre gojeny, me ithahnata me angatre jëne telefon, me thele la nöjei aqane troa cainöje koi angatr.” Hapeu, thaa madrine kö së troa hane xome la hnëqa ka tru celë, huliwa hna upi së troa kuca hnei Akötresie?

³ Thaa ceitu së kö memine la itre sipa; itre eje a hilili troa xen, ngo ame së itretre nyihluei Iehova, easë a wangatrune hnyawa la mele ne la itre atr tro së a cainöje kow. Easë a ajane troa xatuane la itre xaa atr troa atrepengöne la nyipici ka lolo e hnine la wesi ula i Akötresie, ka troa upi angatre troa eatrëne la itre hna amekötine ka troa eatrongë angatre fe kowe la mele ka thaa ase palua kö. (Ioane 17:3; 1 Tim. 4:​16) Qa ngöne lai, easë a thele la aqane tro sa cainöjëne hnyawa la maca ka loi. Ngacama nyimu aqane tro së a cainöj, ngo loi e tro së a wangatrune pala hi la aqane me ijine troa cainöje matre troa hetre thangane ka loi qa ngöne lai. Pine laka “kola pate la pengöne la fen,” loi e tro së a wange hnyawa la itre aqane tro së a cainöj, me aqane troa ithahnata kowe la itre atr, matre troa xecie koi së laka, troa hetre thangane la huliwa së, ngacama ketre itupathi ka tru lai koi së enehila.​—1 Kor. 7:​31.

⁴ Maine nyipici laka, nyimu aqane tro sa thele troa ithahnata memine la itre atr, ngo ame pala hi la nyipi ewekë ngöne la huliwa ne cainöje së, ke, ene la troa cainöje ngöne la itre hnalapa trootro. Hapeue la epuni a cainöje trootro ngöne la itre xaa ijin, paatre kö la itre atr, maine angatre hi e hnine la uma, a kola meköl? Ma pëkö madrine qa ngöne laka, thaa ase ju kö së qaja la maca ka loi koi angatr! Nemene la aqane tro së a cile kowe la jole cili?

⁵ Loi e Troa Atreine Ce Mel, Me Menyike La Aqane Ujë: Ame ngöne la hneijine i angetre Isaraela, angatre a nyi ie e jidr. Pine nemene lai? Thaa hnene kö laka, ijine ka ijije hmekuje hi lai koi angatr, ngo celë hi ijine ka sisitria, ke, ijine xeni la itre ie matre hetre tha hnyawa. Hetre thangane catre troa thinyi jidr. Celë hi matre kola qeje pengöne la ewekë cili hnene la zonal, La Tour de Garde ne 15 juun 1992, ka hape: “Loi e tro fe së a hane waipengöne hnyawa la teritoare së, matre troa tro troa nyi ie, ngöne la ijine kola lapa hnalapa hnene la itre atr, nge hetre ajane i angatre troa drei së.” Kola mama hnyawa ngöne la aqane mele ne la itre atr ka lapa ngöne la itre bâtiments me itre immeubles résidentiels, laka, maine jë angatre hi e hnine la itre uma i angatre ngöne la easë a cainöje trootro ngöne la hmakanyi ne mecixeni me sabath; ngo maine jë thaa tro kö la itre xane a kepe së ngöne la hawa cili. Maine ka mele tun, la itre atr ngöne la götrane hnei epuni hna troa cainöje ngön, hapeu matre neëne troa hë maine epuni a wangatrehmekune laka thaa ijiji angatre kö troa kepe epun? Celë hi ketre aqane huliwa la ka lolo, pine laka, kola troa akökötrene la atreine së ngöne la hna cainöj, nge nyine amamane fe kowe la itre atr ka lapa easenyi së ka hape, easë a wangatrunyi angatr, nge celë hi hatrene la ihnimi ne la itre nyipi Keresiano lai.​—Mat. 7:​12.

⁶ Kola amekunë së hnei Paulo aposetolo jëne la tusi Filipi 4:5, ka hape, loi e troa ‘öhne hnene la nöjei ate asëjëihë la menyike së.’ Easë a ajane troa trongëne la hna amekötine celë, ene la troa atreine waiewekë, me menyike la aqane ujë së ngöne la itre aqane tro së xome la huliwa, me catre me madrine troa kuca la hnëqa së, ene la troa cainöj. Ame la aja së ke, thaa ene kö la troa ‘amamane la ini qëmekene la nöj, me ngöne la ketre uma me ketre uma’, ngo loi e tro pe a xecie koi së laka, easë a cainöje ngöne la itre hnalapa trootro, ngöne la itre ijine ka ijij, nge troa tru hnei ka drei së. (Ite huliwa 20:20) Tune la itretre nyi ie ne Isaraela, easë a thele troa ‘nyi ie’ ngöne la ijine easë a öhne laka, troa hetre thangane ka loi la huliwa së.

⁷ Nemene la itre ewekë ka ijije troa kuca? Nyimutre la itre icasikeu thatraqane la huliwa ne cainöje hna amë e 8:00 maine 8:30 a.m. ngöne la mecixeni me sabath, matre troa canga tro troa cainöje trootro hnene la itre trejine ngöne la teritoar. Ngo ame itre xaa qatre thup, hnei angatre hna mekune memine la itre trejine troa xome la itre xaa aqane troa cainöj, maine ngöne la nöjei ijin, me ngöne la itre magazë, maine ngöne la troa iwai hmaca, maine qëmekene troa fenifeni qëhnelö ngöne la itre immeubles hna lapane hnene la itre trene mani. Ame ngöne la itre xaa götrane kola majemine canga hlë la itre atr e hmakanyi ne sabath, me hnëkë troa hmi e 10:⁠00 a.m., haawe, kola amë hnene la itre ekalesia la ijine icasikeu troa cainöje e hmahmakany, qëmekene e 8:⁠00 a.m. Haawe, kola tro meköti la itre trejine troa cainöje ngöne la itre hnalapa trootro, me sisedrëne pë hë thupen hnene la itre etid me iwai hmaca. Ame ngöne la itre xaa teritoar, sisitria catre kö troa cainöje trootro, ngöne la hnaipajö pangepang, hune e hmakany. Celë hi itre hna amekötine la, ka aijijë së troa akökötrene la itre thangane hne së hna huliwa, ngöne la hna cainöje trootro.

⁸ Loi e Tro Së a Atreine Waiewekë Me Qaja Hnyawa La Maca: Ame ngöne la easë a cainöje trootro, nyimutre la nöjei pengöne aqane kapa la itre atr la maca hne së hna tro fë. Hetrenyi la itre ka kapa hnyawa, ame itre xane ke, angatre a drei simine ej, nge xalaithe la itre ka icilekeu, maine isi pena. Haawe, kola amekunë së hnene la itus Comment raisonner götrane 7, göne la itre ka icilekeu me isi, laka, thaa tro kö së a thele troa “ ‘isi ithahnata’ memine la itre atr ka thaa metrötrëne kö la nyipici.” Maine kola icilekeu la ketre atr me easë, haawe, loi e tro së a nuetriji angeic. Thaa loi kö e tro së a thele la trenge elëhni ne la itre atr, maine hnene la troa ielene tro angatre a ithahnata me easë maine troa kapa la aqane mekune së. Thaa qa së kö troa iele angatre troa kapa la maca së. Ke thaa aqane ujë ka menyike kö lai, nge kola thue jolene pë hë kowe la itre xaa temoë me kowe la huliwa ne cainöj.

⁹ Qëmekene troa kuca la teritoar, loi e troa pane goëne hnyawa la itre hnalapa hna wathebone troa cainöje ngön. Loi e troa canga thuemacane la itre trejine la itre hnalapa cili. Thaa tro kö ketre me ketre a sipu musi troa cainöje ngöne la itre hnalapa cili, nge thaa hna upi angeice pe hnene la atre thupëne la huliwa ne cainöj.​—⁠Wange ju la Huliwa ne Baselaia ne juun 1994, ngöne lo itre mekune hna eköhagen.

¹⁰ Atreine hi troa maca hnyawa la aqane tro fë së la maca ka loi, e hne së hna atreine waipengöne la itre ewekë ngöne la easë cainöje ngöne itre hnalapa trootro. Loi e tro së a atreine waiewekë ngöne la easë a easenyine la itre uma. Hapeu hna he kö la itre mamalama hnene la itre ihakune mano, me thinge la itre ithingene hetrön? Hapeu ewekë kö hne së hna drenge ka nyihatrene ka hape, hetre atr e tröne la uma? Maine pëkö, hatrene hi lai laka, kola imekölenyi la itre atrene la uma. Ketre, troa hetre thangane la huliwa së e hne së hna bëeke hmaca troa cainöje koi angatre e thupen. Maine jë pena, ka loi thaa tro kö a pane kuca lai hnalapa cili, ngo tro pe a xome la numero ne lai hnalapa. Qëmekene troa tro qa ngöne lai teritoar, pane wange hmaca ju lai hnalapa, maine pena xomi note ju matre troa bëeke hmaca ngöne pena ha la ketre hawa troa cainöje kowe la itre atren.

¹¹ Troa traqa la ketre ijin thaa hne së hna mekune troa ahlëne la ketre atr, matre kola ajolë angeic. Maine jë tro angeice a wesitre me elëhni. Nemene la nyine tro sa kuca? Kola ithuecatre hnei Ite Edomë 17:27 ka hape: “Ame la ate xome hnöthe la ite tenge ewekë i angeic, te, ate wangate hmekun.” Ngacama thaa easë kö a qeje menu pine la huliwa ne cainöje së, ngo ijije tro së a pane amamane la metrötre së, pine laka, hne së hna traqa ngöne la ketre ijine ka jole koi angatr. Loi e tro pe së a hnyingëne hnyawa la ketre ijine ka loi koi angatr, me sipone troa bëeke hmaca troa ithahnata me angatr. Troa lapakötre la elëhni ne la atr, e hne së hna amamane la ihnimi së koi angeice me nine nyinawa ka menyik. (Ite edomë 15:1) Maine tro la ketre atr a qaja koi së ka hape, ka huliwa angeice e lai me jidr, loi e troa cinyihane lai ngöne la ketre pepa nge troa amë hnine lai teritoar, matre ame la kola troa kuca hmaca elanyi lai teritoare cili, troa tupathe troa thele pena ha la ketre ijine ka ijij.

¹² Loi e tro fe së a atreine wangatrehmekun, ngöne la easë a catre thele troa kuca apexejene la teritoare së. Nge pine laka, nyimutre la itre atr ka paatre kö ngöne la easë a xötrei cainöje ngöne la itre hnalapa i angatr, haawe, nyipi ewekë pala hi tro së a thele troa ithahnata me angatr, matre troa hane hamë angatre la maca ne iamele. (Rom. 10:13) Kola mama laka, ame ngöne la itre xaa ijin, hnene la itretre cainöje hna anyimua tro ngöne la drai troa wange la ketre uma, maine jë traqa jë hë la itre atren. Hna öhne lai hnene la itre atr ka lapa easenyine lai hnalapa i angatr, ene pe thaa madrine kö angatre la aqane ujë cili; nge angatre a mekune ka hape, ‘kolo pala hi a cainöje’ ngöne la götrane i angatr. Tune ka la aqane troa neëne la ewekë cili?

¹³ Loi e tro së a atreine waiewekë. Tune ka la easë a bëeke troa wange hmaca la ketre hnalapa ka pë atren, hapeu, hetre hatrene kö ka amamane ka hape, traqa ha angatr? Maine kola mama hnyawa laka, pë pala kö atr, haawe, thaa nyipi ewekë kö troa fenafena la qëhnelö ngöne la hawa celë. Maine ngöne la ketre teritoare hne së hna kuca lapaan, hne së hë hna anyimua wange lai atr ngöne la drai ka pexej, me ngöne fe lo heji lapa, ngo paatre pala hi angeic, haawe, amë juetrëne ju pë hë la ketre tarak, maine ketre pepa nyine ithuemacany, ngöne la qëhnelö. Loi e tro pë hë a thele troa wange lai atr cili, ngöne la kola kuca hmaca la teritoare e ketre ijine pena ha.

¹⁴ Thaa loi kö e tro së a porotrike aqeane ju pë hë memine la itre atr ngöne la qene qëhnelö i angeic, maine ngazo la drai. Maine tro angeice a hë së troa lö kowe la hnine uma, haawe, loi e tro sa thupëne wanga adrone jë së la hnine uma. Loi tro fe së a hetrenyi la inamacan, ngöne la kola ho koi së la ketre kuli. Thaa tro kö së a nyi mejene me inagala menu pala ha ngöne la easë a kuca la itre immeubles, wanga troa ajolëne la itre ka lapane ej, nge wanga canga atre jë angatre ka hape, easë la a cainöje trootro.

¹⁵ Loi e Tro Së a Thiina Ka Loi Me Metrötr: Nyipi ewekë tro sa thupëne matre thaa tro kö cacaxenyi me mama cile menu pala ha kowe la itre atr la easë a traqa itronyi ngöne la teritoare hne së hna troa cainöje ngön. Ame la itre xaa atr, tro angatre a qou ngöne la angatre a öhne la kola cile xötrë la itre loto ka co me ka tru qëmekene la hnalapa i angatr, nge kola icilenyi la itretre cainöje ka ala nyim. Thaa ajane kö së tro angatre a mekune ka hape, easë a traqa troa “utine” la itre götrane i angatr. Hetrenyi la itre hna amekötine hna ami trepene hnyawa ngöne la ijine kola icasikeu thatraqane la huliwa ne cainöj; itre aqane troa huliwane la teritoar. Ka lolo catre thaa tro kö a tru menu la etrune la itre trejine hnine la itre gurup, tune la etrune la ketre hnepe lapa, matre thaa tro kö a aqouene la itre atr, nge ketre thaa jole kö e troa ce itronyi hmaca thupene la hna cainöje ngöne lai teritoar.

¹⁶ Tro la itre keme me thine a thupëne hnyawa la itre neköi angatre ngöne la kola cainöje trootro. Loi e troa lolo pala hi la aqane ujë ne la itre nekönatre ngöne la angatre a ce cainöje memine la itre ka tru, ngöne la itre hnalapa trootro. Thaa loi kö e troa elo hnene la itre nekönatr, maine troa enije agö, me huliwa menu nge öhne jë hnene la itre atr ngöne la götrane hna cainöje ngön, me itre xane ju kö hna ixelë memin.

¹⁷ Nyipi ewekë fe troa atreine tulu ewekë ngöne la kola mekune troa pane mano. Hna qaja hnene la Huliwa ne Baselaia ne juun 1995, götrane 3, ka hape: “Ame ngöne la easë a cainöje trootro, ke, ma pëkö ijine së troa iji kofi. Eje hi laka, e ngazo drai, ke, ka loi e tro së a pane mano, me hetre hna ij, matre hetre trengecatre hmaca jë troa sisedrëne la huliwa së. Ngo, ala nyimu la itre trejine ka ajane troa catre cainöje kowe la itre atr, matre angatre a mekune laka, loi e thaa tro kö angatre a iji kofi memine la itre trejine me angatre ngöne la ijine cainöje trootro.” Maine eje hi laka, isa qanyi së isa ala caasi troa mekune maine troa pane mano troa iji ka lepany, ngo hna öhne hë laka, nyimutre la itre trejine trahmanyi me föe ka traqa itronyi ngöne la itre magazë. Eje hi laka troa nyimutre catre la itre hawa ne troa itreqe, nge ketre, pine laka, ala nyimu catre la itre trejin, haawe, kola aqouene hmaca pena ha la itre xaa atr ka traqa troa xen. Ame itre xaa ijine ke, thaa idrei kö ke kola porotrikëne la hna cainöje ngöne la hmakany, pëkö eloine lai, pine laka, thaa kolo kö a ahmitrötrëne la huliwa ne cainöj, nge kola apaatrene la emenene ej. Qa ngöne lai, loi e tro së a atreine waipengöne la itre ewekë, matre thaa tro kö a uma ne itraqa itronyi la ketre ume tri, wanga thaa nyipi ewekëne pi la traeme ne troa cainöj.

¹⁸ Hetre thangane catre la hna huliwa hnene la itre trejine ka thele troa ithahnata memine la itre atr ngöne la nöjei pengöne götrane​—ngöne la itre gojeny, ngöne la itre hna acili loto, me ngöne la itre xaa götrane ju kö gaa tru atr. Loi e tro fe së a hane hetrenyi la metrötre ngöne la easë a cainöje tune lai; thaa hnene hmekuje kö la aqane tro së a ithahnata, ngo nyipi ewekë tro fe së a atreine waiewekë. Loi e tro la itretre cainöje a isa metrötrëne la itre ifegone teritoare ne la ekalesia i angatr, matre thaa tro kö a anyimua cainöje pala ha kowe la itre atr ngöne la itre hnë itö, ngöne la itre hnë treqe kar, maine ngöne la itre hna xomi sas a hna fe ngöne la drai ka pexej. Nyipi ewekë tro sa thiina ka loi me metrötre ngöne la easë a xome la huliwa ne cainöj; loi e tro së a huliwane hmekuje la sipu teritoare së, ngo atreine fe tro së a hane hamëne la ixatua së kowe la ketre ekalesia, e hetrenyi la itre hna amekötine hnene la kometr ne huliwa ne cainöje ne la ekalesia cili.​—⁠(Wange ju la 2 Korinito 10:13-​15.)

¹⁹ Hetrenyi la itre götrane gaa tru atr; atreine hi troa thawa hnene la itre ekalesia atrekë götranene lai, matre troa itre teritoare i angatr. Troa hamëne kowe la caasi maine nyimu trejine la karte ne la teritoare cili. Qa ngöne lai, hmaloi hi troa kuca hnyawa ej, nge troa hetre thangane ka loi; ketre, kola neëne matre thaa tro kö a nyimutre la itre ka cainöje ngöne la götrane cili nge ce hawa ne traqa itronyi angatre hi. Tune la hna qaja ngöne la 1 Korinito 14:40: “Loi pe kuca alolone jë me amekötine la nöjei ewekë asë.”

²⁰ Loi e tro pala hi së a nyihnyawane la ngönetrei së me hnaheetre së, matre troa mama kowe la itre atr laka, easë la itretre tro fë trongëne hnyawa la atresiwa i Iehova. Loi e troa tune mina fe la itre jiane huliwa ka eje the së. Thaa easë kö a anyipiewekëne la maca ne Baselaia, e ka hnyeqetre me zezenyi la watrenge së, maine ka dro pena la itre Tusi Hmitrötre së. Hna qaja ka hape, qa ngöne la aqane heetre së me aqane iseji së, ke, “kola canga wangatrehmekunyi së hnene la itre atr, nge canga atre hi angatre la pengö së, memine la thiina së, memine la göhnë së ngöne la aqane trongene la itre ewekë.” Qa ngöne lai, loi e tro pala hi së a nyihnyawane hnyawa la ngönetrei së me hnaheetre së, nge ketre thaa tro kö a sasaithi tulu menu pala ha ngöne la götrane cili; nge eje hi lai laka, tro pala hi a “ijije la thina i nyipunie memine la maca ka loi”; wange ju la 1 Timoteo 2:​9, 10.

²¹ Kola qaja hnei Paulo aposetolo ngöne 1 Korinito 9:​26, ka hape: “Nge ini a nyenyape tun, tha luelue kö; ini a ishi tun, tha tune kö la ate lepe la eny.” Easë a huliwa tui Paulo, laka, easë a catre thele troa hetre thangane ka loi me wa wene la huliwa ne cainöje së. Maine nyipici laka, itre atrene fe së enehila la “trongene isi itre sipa” i Iehova, a kolo pala hi a catre cainöjëne la maca, loi e tro pala fe së a amamane kowe la itre atr ka hape, itre keresiano së ka atreine waiewekë me atreine wangatrehmekune ngöne la aqane troa tro fë la maca ne iamele, ngöne la itre götrane asë hna amekötine koi së.