Loi e Troa Cainöj Ngöne Itre Hnalapa Trootro
1. Nemene la ewekë hna hnyingëne thele göne la huliwa ne cainöj ngöne itre hnalapa trootro, nge pine nemen?
1 “Kola troa aejëne hnene la itre ka xome la itre aqane tro fë la Nyipici, laka, ame la troa catre cainöj ngöne itre hnalapa trootro memine la itre itus hna hëne ka hape L’AURORE DU MILÉNIUM, tre, ketre jëne ka lolo catre troa cainöjëne la Nyipici ngöne la hneijine së enehila.” Kola amamane hnyawa hnene la zonal Le Phare de la Tour de Sion ne 1 Julai 1893, la enyipiewekën la troa cainöj ngöne itre hnalapa trootro. Troa mama jëne la huliwa cili kowe la itre atr e cailo fen, laka, celë hi Itretre Anyipici Iehova. Hapeu la aqane cainöje cili, ka hetre thangane pala kö, ngacama ngöne la itre xaa nöj, kola jole catre troa öhne la itre atr ngöne la itre hnalapa i angatr?
2. Nemene la trepene hna eköth hnei Tusi Hmitrötr göi troa cainöj ngöne itre hnalapa trootro?
2 Qa Hnine Tusi Hmitrötr Nge Ka Nyipi Ewekë: Hna nyitrepene hnei Tusi Hmitrötr la troa cainöj ngöne itre hnalapa trootro. Hnei Iesu hna inine la itretre drei nyidrë ka ala 70, troa tro ala lue kowe la hnalapa ne la itre atr. (Luka 10:5-7) Ame ju fe kö lo thupene lo meci Iesu, Tusi Hmitrötr a qeje itretre drei nyidrë ka hape: “Tha mano kö angate o drai troa ini, me cainöj . . . ngöne la ēnē me nöjei hnalapa.” (Ite hu. 5:42) Hnei Paulo aposetolo mina fe hna inine la itre atr ngöne itre hnalapa trootro.—Ite hu. 20:20.
3. Nemene la itre eloine la hna cainöj ngöne itre hnalapa trootro?
3 Ame la troa cainöje ngöne itre hnalapa trootro, tre, celë pala hi ketre aqane troa tro fë la maca ka loi ka nyipi ewekë catr matre haöth la fene hnengödrai hnene ej. Kola aijijë së troa canga ‘thele’ me öhne me xatuane la itre atr ka hetre hni ne ajan. (Mat. 10:11) Eje hi lai laka, ka lolo catre kö la itre atr ngöne la itre hnalapa i angatr, tre, thaa angatre kö a nyinyap. Ame la easa ithanata qëmekë me angatr, me drenge la nine nyinawa i angatr, me öhne la lue meke i angatr, me goeëne la itre ewekë xötreithi angatr, ene pe kola aijijë së troa atrehmekune la itre aja ka eje thei angatr. Kola aijijë së fe troa xome la ijine ka sisitria cili troa hane porotrike me angatr.
4. Tro sa kuca tune kaa matre troa hetre thangane ka lolo catr ngöne la easa cainöj ngöne itre hnalapa trootro?
4 Aqane Isa Saze Mel: Hnei Paulo aposetolo hna thele troa saze la aqane mele i nyidrë “pine la maca ka loi.” (1 Kor. 9:23) Maine jë tro fe së a hane saze la porogarame së matre troa cainöj ngöne la kola tru hnei atr ka lapa ngöne la itre hnalapa i angatr, maine e heji lapa, maine e mecixeni me sabath, maine ngöne la itre ijine mano. Xome hnyawa jë la itre hnalapa ka pë atren, matre troa bëeke troa wange itre eje hmaca ngöne pena ha la ketre drai ne la wiik, maine ngöne pena la ketre hawa ngöne la drai.
5. Tune kaa la aqane troa hane ce cainöj ngöne itre hnalapa trootro memine la itre trejine ka hetre sine mecin?
5 Ame mina fe lo itre ka trene sine mec, maine jë atreine fe hi tro nyudren a hane cainöj ngöne la itre hnalapa trootro. Maine jë tro sa hnëkë matre troa tro thei angatr me ce tro kowe la itre hnalapa ka thaa jole kö troa tro kow; kolo hi lai a aijijë angatr matre thaa tro kö a jole koi angatr troa hane cainöj. Hetrenyi la ketre trejine föe ka hmanono; hna aijijë eahlo troa kuca hmekuje hi la caa hnalapa ngöne la sine la hawa. Drei kö la madrine i eahlo thupene la hnei eahlo hna hane ce cainöj memine la gurup!
6. Pine nemene matre nyipi ewekë tro sa xome pala hi la huliwa ne cainöj ngöne itre hnalapa trootro?
6 Nyimutre pala hi la itre atr ka hetre hni ne ajan, hna öhne ngöne la hna cainöj ngöne itre hnalapa trootro. Hnene la ketre trejine hna fenafena la qëhnelö ene pe sa jë hi koi angeic ka hape: “Lö jë. Atre nyipunieti hi ni. Hnenge hna thithi koi Akötresie troa upe la ketre atr troa xatua ni, nge eni a drenge la kola fenafena la qëhnelö. Hnei Nyidrëti hna drei ni me upi nyipunieti koi ni.” Kola amamane hnyawa hnene la ceitun, laka, Iehova a amanathithine la aqane cainöje celë. (Mat. 11:19) Catre pi së tro sa xome pala hi la aqane huliwa celë, ene la troa cainöj ngöne itre hnalapa trootro.