The Mano Kö Së Troa Cainöje Trootro Ngöne La Itre Hnalapa
1 Ame ngöne lo Isaraela ekö, ke, hna hujëne la nöjei huje o drai. (Eso. 29:38-42) Ka mele palahi la eë hune la ita ne huj; kola mejë draië la haj, nge ketre ewekë ka “pui loi” hnei Iehova hna ajan. (Eso. 29:18) Ame enehila, tro së a catre “hamëne pala hi la huje ne atrunyi Akötesie jëne nyidë, celë hi wene la ite ukeineqe shë kola olene kowe la atesiwa i nyidë.” (Heb. 13:15) Loi pe tro së a atrunyi Iehova, ene la tro së a qaja palahi la elolo i nyidrë, hune la troa trongëne hmaca la hna amekötine hnene la wathebo göi itre huj. — Isa. 43:21; Ite Huliwa 5:42.
2 Iesu Keriso la atr anyipicine ka tru hune la nöjei ka anyipicin, ka mele e celë fen, hnei nyidrë hna ini së la aqane tro së a thupëne la hmi ka wië, ngöne la easë a hamëne la huje së troa atrunyi Akötresie. Hnei nyidrëti hna inine la angetre drenge troa catre cainöjëne la maca ka loi. Atrehmekune hi nyidrë ka hape ame la aqane troa ketr la itre atr hnene la maca ka loi, ke, ene la troa ithahnata me angatre ngöne la itre hnalapa i angatr. (Mata. 10:7, 12) Hawe, easë a öhne laka hnene la ange aposetolo hna trothenge la hna amekötine hnei Akötresie, ene la troa cainöje trootro ngöne la itre hnalapa. — Ite Huliwa 20:20.
3 Tha saze kö la hna amekötine cili enehila. Ame la aqane xötrethenge la tulu i Iesu hnene la angetre drei nyidrë, ke, kolo fe a xötrethenge enehila hnene la itre nyipi keresiano göi troa cainöjëne la maca ka loi ngöne itre hnalapa trootro. Qa ngöne lai, ngacama kola jelengazo së, me axösisi së, ngo ame pe, ke, itre milio lao atr la ka atrehmekune la nyipici, nge itre hadredre thauzane lao atr ka nyixane la nöje i Iehova e nöjei macatre, kola aeatrëne la ketre götrane la aja i nyidrë. Celëhi matre nyipiewekë tro së a catre ngöne la huliwa ne cainöje trootro.
4 Itre thangane la hna cainöje trootro ngöne itre hnalapa: “Tha hnei Akötesieti hna iwangate hmekunyine ite ate (. . .) hna kapa hnei anganyidëti la ate qoue nyidë me kuca la thina ka meköt.” (Ite huliwa 10:34, 35) Tulu lai nyine amamane hnyawane laka pëkö troa iwangate hmekunyine la itre atr, kola hape loi e tro së a tro kowe la nöjei hnalapa asë ngöne la götrane së, ke, jëne tro la nöjei atr asë lai a drenge lapaane la maca ne la Baselaia. Qa ngöne lai, ijije tro la nöjei atr a kapa la sipu ixatua thatraqai angatr.
5 Loi e tro la nöjei ka cainöje trootro, ene lo itre thöth, maine qatr, maine itre ka hnyipi lö pena, a trongëne palahi la huliwa ne cainöje trootro. Celëhi aqane tro la isa alacasi a “qaja uti hë la mel.” (Rom. 10:10) Ame la tro së a cainöje trootro ngöne itre hnalapa, ke, kola ieakeu së me itre xaa trejine hnene la otretre ne ihnimi me cas. Itre ijine tro mina fe së lai a hetrenyi la xomihni, ngöne la kola öhne laka itre atr a tha nyipiewekëne kö la maca hne së hna trofë, maine kolo pena a icilekeu memin. Qa ngöne la hne së hna qaja amamane la lapaune së, ke, kola goeë së ceitu me “waduo,” ngo kolo fe a xatuane la itre ka hni ka ipië, troa trotrohnine laka hetre hna hnëkëne koi së thatraqane la troa inine la Tusi Hmitrötr, nge ijije tro angatr’a hane kepe thangane qa ngön. (1 kor. 4:9) Kola amamane hnyawane hnene la nöjei ewekë, laka Iehova a amanathithine la huliwa ne cainöje trootro, me thuejëne troa xawaane la ka alanyimu atraqatre ngöne la “ēnē” ne la hmi ka wië. — Isa. 2:2-4.
6 Ka sisitria catre kö la hneijine së enehila tro la atr a drenge la maca ne la Baselaia. Nyipiewekë tha tro kö së a cile e troa cainöje trootro ngöne itre hnalapa utihë la tro Iehova a qaja ka hape ijijë hë. (Isa. 6:11) Nyipici laka, tro së a hetre madrin, e hne së hna cainöje trootro ngöne itre hnalapa, ke, ketre huliwa lai ka sisitria me ka hetre thangane ngöne la itre drai ne nyipune celë. — 1 Kor. 15:58.