Cainöje Trootro: Catre Jë Së Troa Huliwa Ngacama Tru La Etre Ejolen’ej
1 Eje hi laka tha hmaloi kö kowe la itre ka xötrei kapa la nyipi hmi, troa ithahnata memine la itre trehnyiwa ngöne la angatr’a troa cainöje trootro. Ngo tro la sipu ihnimi angatre koi Iehova a xatua angatre troa hun. Itre xane ka tha majemine kö ithahnata me iahlë, a huliwa catre palahi, matre enehila, ke, itretre cainöje hutine hë la Maca ka Loi.
2 Kola amamane hnyawa hnei Tusi Hmitrötre laka, hnene la itre keresiano hnapan, hna trofë la Maca ka Loi ne la Baselaia, ngöne la ketre uma me ketre uma (Itre Hu. 5:42; 20:20, 21). Celë hi matre, nyipi ewekë tro fe së itre keresiano ne la hneijine enehila a hane huliwa tuun. Nge tro la ihnimi së koi Iehova me kowe la nöjei atr’asë a, xatua së troa catre kuca la huliwa cili, ngacama easë a qëmeke kowe la itre atr ka pëkö nyipi mekun, itre ka xele ma trotrohnin, itre ka xele ma dreng, maine itre ka icilekeu.
3 Drei la thangane koi së e hna huliwa hune la ejolen: Loi e tro së a catre jume la itre itine feja ne la nyipici, ngöne la nöjei ijine easë a iöhnyi memine la itre atr, me mekune hnyawa palahi laka, troa hetre thangane me hamë wene ne la Baselaia, e hne së hna catre cainöje trootro (Atre Cai. 11:6). Ketre kola saze la itre hnedrai, nge itre ewekë fe ka hnyipixe a traqa ngöne la melene la atr, celë hi matre angeic’a mekune hmaca lo itre ithuemacanyi hne së hna qaja, ame hna drei së hnyawa pe ngöne la ketre ijin.
4 Ka sisitria la huliwa së ngöne la troa cainöje trootro, pine laka, kola troa hamëne kowe la itre atre ka hni kowe la nyipici me meköt; lo manathith, ene la troa atre Iehova memine la itre hnei Nyidrëti hna thingehnaean, matre e angatre fe kowe la gojenyi ne la mele ka epine palua. Ketre, kola hnime me thuemacane la itre ka xötrethenge la itre madrine ne fen, ka hape, loi e tro angatre a ujë, e ajane fe angatre tro Iehova a hane kepe angatr. Ngo eje hi laka, kola qejepengöne la eje i Iehova me atrunyi Nyidrë, hnene la huliwa ne cainöje trootro, ngacama kola drenge maine tha drenge pena hnene la itre atr. — Ezek. 3:11.
5 Nyipici laka, kola xatua së hnene la huliwa ne cainöje trootro, troa melëne la itre wene ne la ua, ene lo ihnim, me madrin, me tingeting, me xomi hni ahoeany (Gal. 5:22). Ketre kola xatua së fe troa ipië me iloi, hnene laka easë a kuca la loi kowe la itre xaa atr. Catre jë së troa huliwa koi Iehova, celë hi aqane tro së a hmekëne la itre itupathi ne la fen. — 1 Kor. 15:58.
6 Loi e tro së a ixatuanekeune la itre ejolen: Nyipi ewekë tro së a inine la itre ka xötrei traqa, trene aja troa hane kuca lai huliwa ka sisitria. Ngo pëkö trenge catrene la itre xan, nge angatr’a hace troa mekune laka tro fe angatr’a hane cainöje trootro. Celë hi matre loi e tro së a ce ithahnatane la itre mekune ka ajolëne la Maca ka Loi me amamane la nyine sa. Ketre, loi e tro fe së a huliwaane la itre ixatua qa hnine la itus Comment raisonner matre hetre thangane la huliwa së. Tuneka matre xatua angatre ju pena hnei epuni troa hnëkë nyine qaja göne la huliwa ne cainöje trootro? Nge tro fe së a xatua angatre troa hane sine palahi la itre icasikeu ne huliwa ne cainöj, thupene lai tro angatre a hane ce huliwa memine la itretre cainöje ka majem. Eje hi laka troa hetre trengecatre së, e hne së hna ce huliwa.
7 Ketre hnëqa atraqatre the së la troa anyipicine la tretretro së, ene Iehova ngöne la cainöje trootro. Hapeu, hetre hnëqa kö enehila ka sisitria hune la troa ce huliwa trootro me Akötresie? (1 Kor. 3:9). Eje hi laka, maine hne së palahi hna mejiune koi Nyidrë, ke tro Nyidrëti a hamëne la uati hmitrötre i Nyidrëti nyine xatua së troa apatrene la itre jole ka eje the së ngöne la troa cainöje trootro. — 2 Kor. 3:5.