Ita Ne Thup göi 07 Semitrepa

Nyima 03 me 18 Qene Drehu

Pine Nemene Matre Nyipi Ewekë Troa Cainöje Ngöne Itre Hnalapa Trootro Enehila?

“Nge tha mano kö angate o drai troa ini, me cainöjë Iesu Keriso, ngöne la ēnē me nöjei hnalapa.”—ITE HULIWA 5:42.

1, 2. (a) Kola atre la itretre Anyipicine i Iehova hnei nemene pengöne aqane cainöj? (b) Nemene la hne së hna troa ce wange ngöne la hna cinyihane celë?

Ketre ewekë lai hna öhne ngöne la nöjei nöj e cailo fen asë. Kola tro la lue atr ka heetre hnyawa kowe la ketre uma; nyidroti a thele troa ce thawa memine la atre ne la hnalapa la ketre hnepe maca ne la Baselaia i Akötresie ka eje hnine la Tusi Hmitrötr. E hetre hni ne ajane lai atr kowe la maca, nyidroti hë a hamë angeic la ketre itus me sipo angeic troa hane inine la Tusi Hmitrötr. Thupene jë hi lai, nyidroti pena ha tro kowe la ketre uma. Maine nyipunieti fe a hane xome la huliwa cili, thaa ase petre kö nyipunie ibozu, nge wanga atrehmekunyi nyipunieti fe hë hnene la itre atr ka hape, ketre atre anyipicine i Iehova nyipunie. Nyipici laka kola atre së hnene la itre atr, ke, hne së pala hi hna cainöj ngöne itre hnalapa trootro.

² Nyimutre la itre aqane huliwa nyine tro sa xome matre troa eatrëne la hnei Iesu hna upi së troa kuca, ene la troa cainöj me inine la itre atr. (Mat. 28:19, 20) Easa cainöje ngöne la itre hna maketr, me e cahu gojeny, me ngöne la itre xaa götrane gaa tru atr. (Ite Huliwa 17:17) Easa mina fe a telefon kowe la itre atr ka ala nyim me hane cinyany. Easa ce thawa la itre trepene nyipici qa hnine la Tusi Hmitrötr memine la itre atr hne së hna öhne o drai ngöne la nöjei ijine easë a kuca la itre hnepe jole së. Ketre, hetrenyi fe së la ketre porogarame hna amë ngöne ëternet, nyine xatuane la itre atr troa kapa la itre ithuemacany hna nyi trepene hnene la Tusi Hmitrötr; nge itre ithuemacanyi lai hna ujëne ngöne la 300 lao qene hlapa.a Ame la itre aqane hamë ini celë, tre, itre ka hetre thangane ka loi asë hi. Ngo ame pe ngöne la itre xaa nöj, hetrenyi la aqane troa cainöjëne hnyawa la maca ka loi, ene la troa cainöje ngöne itre hnalapa trootro. Nemene la ka nyi trepene la aqane cainöje celë? Hnauëne matre huliwane catrëne jë hnene la nöje i Akötresieti enehila, la aqane cainöje celë? Nge pine nemene matre nyipi ewekë catre ej enehila?

Aqane Cainöj Ne La Itre Aposetolo Ekö

3. Nemene la itre ini hnei Iesu hna hamëne kowe la itre aposetolo göne la huliwa ne cainöj; nge, nemene la hna amamane hnene itre ej göne la aqane tro la itre aposetolo a cainöj?

³ Hna nyitrepene hnei Tusi Hmitrötr la huliwa ne cainöje ngöne itre hnalapa trootro. Ame lo Iesu a upe la itre aposetolo troa cainöj, öni nyidrëti e ini angatr, ka hape: “Ame la nöjei lapa memine la nöjei hnalapa hnei nyipunie hna troa xulu kow, te, hnyingënejë, ka hape, Dei la ate loi thina e cili.” Tro angatr a öhne tune kaa la itre atr ka hni ka menyik? Hnei Iesu hna upi angatr troa tro kowe la itre hnalapa ne la itre atr, nge öni nyidrëti ka hape: “E löjë nyipunie kowe la kete uma, italofaju me angat. Nge maine loi la uma cili, loi e troa traqa la manene la thithi nyipunie kow’ ej.” Kolo kö lai a hape, tro la itre aposetolo a treqene tro la itre atr a könë angatr kowe la hnalapa i angatr? Hanawange la itre trenge ewekë hnei Iesu hna qaja: “Ame la ate tha kepe nyipunie, me tha denge la ite tenge ewekë i nyipunie, e löpi nyipunie qa la hnuma cili, me lapa pena, jumepi la dro ne la ite hnatrapaca i nyipunie.” (Mat. 10:11-14) Kola amamane hnyawa hnene la itre ini celë, laka, ame la itre aposetolo, ke, loi e tro angatr a “tro nyipine la ite lapa, kola cainöjëne la maca ka loi,” nge angatr a troa wange la itre atr ngöne la itre hnalapa i angatr.—Luka 9:6.

4. Ekaa hnine la Tusi Hmitrötr la kola qaja hnyawa la huliwa ne cainöje ngöne la itre hnalapa trootro?

⁴ Kola amamane hnyawa hnene la Tusi Hmitrötr ka hape, hnene la itre aposetolo ekö hna cainöje ngöne la itre hnalapa trootro. Hanawange la hna qaja hnene la tusi Ite Huliwa 5:42 göi angatr: “Tha mano kö angate o drai troa ini, me cainöjë Iesu Keriso, ngöne la ēnē me nöjei hnalapa.” Nge thupene la 20 lao macatre, Paulo aposetolo a amexeje kowe la itre qatr thup ne la ekalesia ne Efeso, ka hape: “Tha hnenge hna juetëne la kete ewekë ka nyipi, ngo hna amamane koi nyipunie me ini nyipunie qëmeke ne la nöj, me ngöne la kete uma me kete uma.” Hnei Paulo kö ekö hna hane wange hmaca lo itre qatre thup ngöne lo thaa ce hmi petre kö angatr me nyidrë? Eje hi laka, hnei nyidrëti hna ini angatr la itre hnepe ewekë tune la “troa ietra koi Akötesie, me lapaune koi Joxu shë Iesu Keriso.” (Ite Huliwa 20:20, 21) Hna hamë mekune hnene la ketre itus göne la Ite Huliwa 20:20, ka hape: “Ame la itre ka catre cainöje ekö, tre, itre ka cainöje angatr ngöne itre hnalapa trootro.”

Ketre Trongene Isi Ne La Itre Sipa Ngöne la Hneijine Së

5. Hna aceitunëne me nemene la huliwa ne cainöj ngöne lo hna perofetane hnei Ioela?

⁵ Ame lo aqane trongene la huliwa ne cainöj ngöne lo hneijine i Iesu, tre, nyine nyi hatrene la ketre huliwa ka sisitria hna troa kuca ngöne la hneijine së enehila. Hnei Ioela perofeta hna xome la huliwa ne cainöj ne la itre hna iëne ceitune memine la itre sipa ka iakötrë. (Ioela 1:4) Nge tune la itre sooc ka tro troa isi, itre sipa a elë hune la itre jol, me lö hnine la itre hnalapa, nge pë ju pë hë hna amë. (E jë la Ioela 2:2, 7-9) Drei la aqane ihmeku la ceitune celë memine la aqane catre trongëne me eköthe hnyawa hnene la itre atre i Akötresieti la huliwa ne cainöj enehila! Hetrenyi la ketre aqane huliwa ka sisitria hna xome hnene la itre Keresiano hna iën memine lo “ite xa mamoe kö;” angatr asë a troa eatrëne la hna perofetan, ene la troa cainöj ngöne itre hnalapa trootro. (Ioane 10:16) Ngo tune kaa easë Itretre Anyipicine i Iehova, nemene kepine matre hane jë fe së trongëne enehila la aqane cainöj ne la itre aposetolo ekö?

6. Ame ngöne lo macatre 1922, nemene la ithuecatr hna hamën göne la troa cainöje ngöne la itre hnalapa trootro, ngo tune kaa la aqane ujë ne la itre xan?

⁶ Qaane lo macatre 1919, kola amamane hnyawa la enyipiewekëne la tro la itre Keresiano, angatr isa ala caasi a catre tro fë la maca ka loi. Drei la ketre ceitun, ame ngöne la ketre ita ne thup göi 15 Ogas macatre 1922, caa hna cinyihane, hna hape, “Le service est essentiel (huliwa ka sisitria),” kola amekunëne la itre Keresiano hna iën laka troa “catre tro fë la maca ka loi hna cinyihane amë ngöne la itre itus, nge tro fe a tro kowe la itre hnalapa ne la itre atr matre thuemacanyi angatr ka hape, calemi catre hë la baselaia qa koho hnengödrai.” Hna cinyihan ngöne lo Bulletin (hna hape enehila, Huliwa ne Baselaia), la itre aqane troa nyiqaane ithanata memine la itre atrene la itre hnalapa. Ngo eje hi laka, co petre kö la etrune la itre ka cainöje ekö ngöne la itre hnalapa trootro. Ketre, hetre itre xane fe ka cile troa kuca la huliwa celë. Nyimu pengöne jole hna amexej, ngo ame la sipu kepine matre angatr a qeje jol, tre, hnene laka nyimutre la itre ka mekune, ka hape, ame la troa cainöje ngöne la itre hnalapa trootro, ke, kösë huliwa lai ka thaipië angatr. Celë hi matre, ame la kola mama, ka hape, ka nyipi ewekë catre la troa cainöje ngöne itre hnalapa trootro, tre, kolo hi a tro hnene la itre xan qa hnine la organizasio i Iehova.

7. Ame ngöne lo macatre 1950, nemene hë la ewekë ka sisitria nyine troa kuca?

⁷ Thupene la itre macatre, kolo ha elë la etrune la itre ka cainöjëne la maca ka loi. Ngo, nyipici laka, kolo fe a mama la enyipi ewekëne troa isa inine la itre atr matre atreine troa tro fë la maca ka loi ngöne la itre hnalapa trootro. Drei la aqane trongene la itre ewekë e Amerika nyine ketre ceitune koi së. Ame ngöne lo itre macatre 1950, tre, traqa koi ala 42 000 la etrune la itretre Anyipicine ka tuluth la aqane tro angatr a xome la huliwa ne cainöj ene la troa tro fë sine pepa, maine itre zonale pena ngöne la itre gojeny. Ketre, 60 000 la itre ka thaa tro lapa troa cainöj. Nemene la nyine kuca matre xatuane la itre Keresiano asë ka sa xepu hë troa cainöje ngöne la itre hnalapa trootro?

8, 9. Nemene la porogarame ne ini hna nyiqaane acile ngöne lo macatre 1953, nge nemene hë la thangane la hna ini cili?

⁸ Hna ithanatane hnyawa ngöne lo ijine kovasio ne lo macatre 1953 e New York City la enyipi ewekëne la troa cainöje ngöne la itre hnalapa. Hnene la trejin Nathan H. Knorr hna qaja, ka hape, ame la pane huliwa ka sisitria ne la itre atre thup Keresiano, tre, ene la troa xatuane la itretre Anyipicine i Iehova asë tro pala hi a catre cainöje ngöne la itre hnalapa trootro. Öni nyidrëti ka hape, “loi e tro së isa ala caas a atreine tro fë la maca ka loi ngöne la itre hnalapa trootro.” Nge thupene jë hi lai, hna acilëne la ketre porogarame ne ini matre eatrëne la ewekë celë. Ame lo itre ka thaa cainöje petre kö, tre, kola ini angatr la aqane troa nyiqaane ithanata kowe la itre atr ngöne la itre hnalapa, me ithanatane me angatr la Tusi Hmitrötr, me sa la itre hnyinge i angatr.

⁹ Hetre thangane ka loi pi hë la hna ini cili. Thupene la treene lao macatre, kola alua elë la etrune la itre ka cainöj e cailo fene memine la etrune la itre ka ini Tusi Hmitrötr. Ame enehila, easenyi hë matre traqa pi koi sevene lao milio la etrune la itretre tro fë la maca ka loi ne la Baselaia e cailo fen. Ame la aqane kökötre la huliwa ne cainöj, tre, celë hi hatrene laka, Iehova a amanathithine la huliwa ne cainöje ngöne la itre hnalapa trootro.—Is. 60:22.

Kola Pele Hatrene La Itre Atr Matre Amele Angatr

10, 11. (a) Nemene la ewekë hnei Ezekiela hna meköle goeën, hna cinyihane ngöne Ezekiela mekene 9? (b) Nge ej a eatre tune kaa ngöne la hneijine së?

¹⁰ Ame la enyipi ewekëne la troa cainöje ngöne la itre hnalapa trootro, tre, kola mama hnyawa ngöne la ketre ewekë hnei Ezekiela perofeta hna meköle goeën. Ame la hna meköle goeëne hnei Ezekiela, tre, sikisi lao atr ka xulu fë la itre nyine humuth, memine la hna sevene ne atr ka xetrë lino, nge hetre ge ne cinyihane ngöne la gö i angeic. Ame la hna sevene ne atr, tre, hna upi angeic troa “trongëne la lapa nyipine Ierusalema, nge tro [angeic] a nyi hatene ngöne la ite göpadi ne la ite ate itete awe me teije latesi pine la ite ewekë ka sisi asë lo hna kuca nyipin’ ej.” Nge thupene la huliwa ne pele hatren, kola upe la sikisi lao atr ka xulu fë la nyine humuth troa apaatrene la itre thaa hna pele hatrene kö.—E jë la Ezekiela 9:1-6.

¹¹ Ame ngöne la kola troa eatrëne la hna perofetane celë, easa trotrohnine laka, ame la atr “xetë lino,” tre, kolo hi lai a nyihatrene la itre thelene la itre Keresiano hna iën. Jëne la huliwa ne cainöj, kösë itre hna iëne lai a pele hatrene la itre ka troa hane nyi xane la itre “xa mamoe kö” i Keriso. (Ioane 10:16) Nemene la hna pele hatrene cili? Ame la hna pele hatrene ngöne la itre göpadri i angatr, tre, kösë nyine tro hi lai a amamane hnyawa ka hape, itre mamoe lai ka sa xepu, nge itretre drei Iesu hë ka bapataiso, nge itre ka xetrëne hë la ixetre ka hnyipixe tui Keriso. (Efe. 4:20-24) Nge ame la itre atr cili hna aceitunëne me itre mamoe, tre, hna ce ami angatre hi memine la itre hna iën hnine la hna axö mamoe ka caas; nge angatre fe a ixatua ngöne la huliwa ka sisitria, ene la troa pele hatren la itre xaa atr ka hetre hni ne aja troa xötrethenge Iesu.—Hna ama. 22:17.

12. Ame ngöne la kola meköle goeëne hnei Ezekiela la huliwa ne pele hatren, kola mama tune kaa la enyipi ewekëne la troa thele la itre atr hna aceitunëne me itre mamoe?

¹² Kola amamane hnyawa koi së hnene la ewekë hnei Ezekiela hna meköle goeën, la kepine matre loi e tro sa catre thele la itre atr ka “awe me teije latesi.” Celë hi jëne mele lai kowe la itre atr. Easenyi hë troa apaatrene la itre atr ka thaa hetrenyi kö lo hna pele hatren hnene la itre trongene isi Iehova qa hnengödrai, ene lo itre hna nyi hatren hnene lo sikisi lao atr ka xulu fë lo itre nyine humuth. Hnei Paulo aposetolo hna cinyihane göne la iameköti cili, ka hape, tro Joxu Iesu memine la “ite angela ne la mene i nyidë” a “nyithupene koi angete tha’te Akötesie, me koi angete tha denge thenge la maca ka loi ne la Joxu shë Iesu.” (2 Thes. 1:7, 8) Pane mekune jë së laka, kola troa amekötine la itre atr cili thenge la aqane kapa angatr la maca ka loi. Qa ngöne lai, loi e tro pala hi sa catre tro fë hnyawa la maca ka loi uti hë la pun. (Hna ama. 14:6, 7) Celë hi ketre hnëqa ka sisitria catr kowe la itre hlue i Iehova.—E jë la Ezekiela 3:17-19.

13. (a) Nemene la hnëqa hnei Paulo hna wanga atrun, nge pine nemen? (b) Nemene la hnëqa hna athipe koi nyipunie thatraqane la itre atrene la itre teritoare i nyipunie?

¹³ Hnei Paulo hna xome la huliwa ne troa tro fë la maca ka loi ceitune me ketre hnëqa hna athipe koi nyidrë. Hnei nyidrëti hna cinyihane ka hape: “Ini ate xomi gufa göi angete Heleni, me ite xa nöj; angete inamacan, me angete tha ’tein. Qa ngöne lai ini a hnëkën, e ateine ni, troa cainöjëne la maca ka loi koi nyipunieti fe e Roma.” (Rom. 1:14, 15) Pine laka nyidrëti a madrine la hna utipi nyidrë, hnei Paulo hna atrehmekune la enyipi ewekëne troa xatuane la itre xaa atr troa hane kepe manathithi qa ngöne la ihnimi gufa i Akötresie. (1 Tim. 1:12-16) Kösë, hetre gufa i nyidrë thene la itre atr hnei nyidrë hna iöhnyi memin, nge ame la sipu aqane tro nyidrë a të la gufa cili, tre, troa ce thawa me angatr la maca ka loi. Atrehmekune kö nyipunie laka, ka gufa nyipunie kowe la itre atrene la itre teritoare i nyipunie?—E jë la Ite Huliwa 20:26, 27.

14. Nemene la pane kepine matre easë a cainöje kowe la nöjei atr me ngöne itre hnalapa trootro?

¹⁴ Ngacama nyipi ewekë koi së la troa amelene la itre atr, ngo hetrenyi kö la ketre kepine ka tru matre easa cainöje ngöne la itre hnalapa trootro. Ame ngöne la hna perofetane hnei Malaki 1:11, kola qaja hnei Iehova, ka hape: “Qane hna xulu hnei jö, uti hë la hna lö hnen’ ej, troa atrune la ëjenge hnene la nöjei nöj; nge . . . troa tro fë kowe la ëjenge la ite ka pui loi memine la huje ka loi; ke troa atrune la ëjenge hnene la nöjei nöj.” Kola eatrëne la hna perofetane celë, hnene laka, kola atrune hnene la itre hlue i Iehova la ëje i Nyidrë e cailo fen; nge kola mama hnene la aqane xome angatr la huliwa ne cainöje cememine la hni ka ipië. (Sal. 109:30; Mat. 24:14) Ame la troa hamëne “la huje ne atrunyi” Iehova, tre, celë hi pane kepine matre easë a cainöje kowe la nöjei atr asë me ngöne itre hnalapa trootro.—Heb. 13:15.

Itre Ewekë Ka Tru Ka Troa Traqa Koi Së

15. (a) Tune kaa la aqane akökötrene catrëne angetre isaraela la huliwa i angatr ngöne lo hna sevene ne drai? (b) Nge nemene la hnene la ewekë celë hna amamane göne la huliwa ne cainöj?

¹⁵ Nemene la itre xaa mekune hna amë pala kö nyine ixatua thatraqane la huliwa ne cainöj? Hetre ini hne së hna troa xome qa ngöne la hna qaja hnene la tusi Iosua, ngöne la kola apaatrenyi Ieriko. Pane mekune hmaca jë së laka, qëmekene tro Akötresieti a apaatrenyi Ieriko, hnei Nyidrëti hna pane upi angetre Isaraela troa acaa trongëne xötreithe la traon ngöne la nöjei drai, uti hë la kola pexeje la sikisi lao drai. Ngo ame ngöne la hna sevene ne drai, tre, troa akökötrene la aqane huliwa i angatr. Öni Iehova koi Iosua, ka hape: “Tro nyipunie a luengemen’ a tro kanothe la lapa ngöne la drai ka luengemen ; nge tro itete huj’ a ufe trongëne la ite trutru. Nge e hoea la hna ufi trutru ne iubeli, . . . ame hna troa pekajo atrune la nöjei at’ asëjëihë ; ame hna troa keipi la hna xupi etine la lapa.” (Ios. 6:2-5) Maine jë, tro fe a hane kökötre elany la huliwa ne cainöje së. Thaa luelue kö së laka, ame la kola troa apaatrene elany la fene ka ngazo celë, tre, tro hë sa öhne la kola troa anyipicine hnyawa la ëje i Akötresie memine la Baselaia i Nyidrë, ewekë hna thaa hane kö öhne ngöne la aqane trongene la mele ne la atr e celë fen.

16, 17. (a) Nemene la maca hna troa tro fë, qëmekene la troa apaatrene la fene celë? (b) Nemene la hne së hna troa ce wange ngöne la hna cinyihane ka troa xulu?

¹⁶ Ketre, tro ha traqa elany la ijine tro la maca hne së hna tro fë a ceitune memine la kola “pekajo atrun.” Ame ngöne la tusi Hna Amamane, hna aceitunëne la itre maca ne iameköti ka tru memine la ketre “manie ka cate atraqat, isa tune la ehacene la caa talane la ite hnep’ej.”b Celë hi kepine matre kola qaja hnei Hna Amamane 16:21, ka hape: “Atraqate palapi hë la meci cili.” Thatre hnyawa kö së elany la aqane troa qaja la itre maca ne iameköti tixenuë i Akötresie, jëne la huliwa ne cainöje ngöne itre hnalapa trootro. Ngo ka xecie hnyawa koi së laka, qëmekene troa umuthe la “Akötr Atraqatr,” laka troa hlemu la ëje i Iehova ngöne la fen asë nge thaa hna hlemu kö tune ngöne lo itre drai hnapan.—Hna ama. 7:14; Ezek. 38:23.

¹⁷ Ngöne laka, easa treqene hnyawa la itre ewekë ka troa traqa, epi tro sa catre cainöjëne la maca ka loi ne la Baselaia. Ngo ame la easa xome la hnëqa cili, nemene la itre jol hne së hna troa qëmeke kow ngöne la easa cainöj ngöne itre hnalapa trootro, nge nemene la aqane tro sa cile kow? Celë hi itre hnyinge hne së hna troa sa ngöne la hna cinyihane ka troa xulu.

[Ithueamacany]

Tro Epuni A Sa Tune Kaa?

• Nemene la xötr qa hnine la Tusi Hmitrötr ka nyi trepene la huliwa ne cainöj ngöne la itre hnalapa trootro?

• Hna amamane tune kaa ngöne la hneijine së, la enyipiewekëne la troa cainöje ngöne la itre hnalapa trootro?

• Pine nemene matre hnëqa ne la itre hlue i Iehova la troa cainöj?

• Nemene la itre ewekë ka tru ka troa traqa koi së?