The Mano Kö Troa Qaja Trongëne La Maca Ka Loi
1 Hnene la itre pane keresiano hna ahmitrötrëne la huliwa ne cainöje i angatr. Hnei Luka hna qaja ka hape: “Nge tha mano kö angate o drai troa ini, me cainöjë Iesu Keriso, ngöne la ēnē me nöjei hnalapa.” (Ite Huliwa 5:42) Pëkö ewekë ka thungi jë i angatre troa kuca la huliwa ne cainöj, thaa hna nga angatre kö hnene la itre itupath! (Ite Huliwa 8:4) Hnei angatre pala hi hna catre troa qaja trongëne la nyipici.
2 Hapeue fe së? Loi e tro epuni a isa thele ka hape: ‘Hetrenyi kö thenge la mekune laka, easenyi catre hë la pun? Hapeue ka mele kö e kuhu hninge la trenge ajane troa catre qaja trongëne la maca ka loi, nge thaa tro kö la aja cili a mele metrötr?’
3 Hanawange La Itre Tulu Qa Thene La Itre Trejine Ka Catre Cainöj Ngöne La Hneijine Së : Hna tithe la ketre söre hnene la ketre meci lo hna hape polio, nge hna umë angeice hnine la ketre aparei nyine ixatua troa mano hnyawa. Thatreine kö nyidro troa hane sine la icasikeu ngöne la uma ne Baselaia, maine asabele pena. Ngo thaa mano kö nyidro troa catre cainöjëne la maca ka loi. Ngöne la 37 lao macatre ne lapa fë la söre lai aparei, ke, hnei eahlo hna xatuane la 17 lao atr troa atre la nyipici! Tuneka la aqane kuca i eahlo? Ngacama, thatreine kö eahlo troa cainöje trootro ngöne itre hnalapa, hnei eahlo hna xome la nöjei ijine ka ijij, troa cainöje o drai kowe la itre ka traqa troa wai eahlo.
4 Hna enijëne la itre trejine me easë qa Bosini, nge nyimutre thei angatre la itre ka pë hë caa ewekë. Ngo ame pe, thaa hna nga angatre kö hnene la itre itupathi cili, hnei angatre pala hi hna catre cainöjëne trootro me hamëne la ini qathei Iehova. Ame e Saraievo, ke, hna isa kuca hnene la itretre cainöje la 20 lao hawa e nöjei treu, ngöne la troa qaja trongëne koi itre xane la maca ka loi, nge isa lue etidi angatr. Ngacama angatre a mele e hnine la itre jole ka tru, ngo thaa mano kö angatre cainöj, me inine la itre xan.
5 Hnene fe la itre thöth, hna amamane la aqane catre i angatre ngöne la huliwa ne cainöj. Hnene la itre sooci hna icasikeune hnine la ketre hnahag, la ketre fami ne temoë qaa Ruaneda, kola mekune troa humuthi angatr. Ene pe hna sipone ju hnene la fami troa pane hmi. Hna kapa la aja ne la fami, nge hna hmi catre hnene la nekönatre jajiny, ene Debora, kola hape: “Iehova, Hnenge me kaka hna amë la faifi lao zonal. Tro nyio a bëeke me ini angatre tuneka la nyipici, me xatua angatre troa hetrenyi la mel?” Qa ngöne la etrune lapaune i angeice memine la ihnime kowe la huliwa ne cainöj, thaa humuthe ju kö la fami.
6 Nyipiewekë catre enehila troa thupëne me wangatrehmekune la itre ijine troa cainöje koi itre xan, me thele la itre “hna hnëkëne kowe la mele ka tha ase palua kö.” (Ite Huliwa 13:48) Qanyine kö la aqane mele ngöne la götrane i epun, ngo loi e tro la itre qatre thupe a hnëkëne la itre ijine troa icasikeu göi troa cainöje trootro ngöne la itre ijine ka ijij, maine itre hmakany, maine itre hnaipajö, maine e hej. Hna hamëne la itre mekune ka ijij, me itre ithuecatre göi troa cainöjëne la Baselaia ngöne la nöjei ijine jëne la itre hna cinyihane hnine la Huliwa ne Baselaia, me itre ithuemacanyi ngöne la itre icasikeu ne huliwa ne cainöj, me itre asabele ne sirkoskripsio. Ketre, itre atre thupe ne sirkoskripsio, me distrik a xatuane la itre trejine troa cainöje e cahu gojeny, me amamane la aqane troa cainöje ngöne la itre teritoare gaa thele mani, me qaja atrune fe la itre xaa jëne troa cainöje ngöne la nöjei götrane kola troa iöhnyi memine la itre atr. Kola amamane hnene la nöjei ewekë celë ka hape: the cile kö troa qaja trongëne la maca ka loi!
7 Hnene la itre aposetolo i Iesu hna catre qaja ka hape: “Tha’teine kö nyiho troa tha qaja la nöjei ewekë hnei nyiho hna goeëne me deng.” Hnei angatre hna cile huti tuneka qëmekene la nöjei itupath? Hnei angatre hna sipo Iehova troa xatua angatr, nge hna kapa la thithi angatre hnei Nyidrë, nge “hna tiqa angat’asë hnei uati hmitöt, ame hnei angate hna qaja la wesi ula i Akötesie hnene la cat.” (Ite Huliwa 4:20, 29, 31) Ma thaa hna traqa kö la itre ewekë celë kowe la nöjei trejine asë ngöne la huliwa ne cainöj, ngo maine hetre nyipi aja së troa catre qaja trongëne la maca ka loi, thaa tro kö a nanazij, nge maine easë a thele troa cainöje o drai, ke, tro Iehova a xatua së.