Tro Angatr a Drenge Tune Kaa?
1. Pine nemen matre ijije troa ketre jol koi së la huliwa ne cainöj, nge pine nemen matre easa catr?
1 Pine laka calemi catre hë la drai Iehova, nyipi ewekë troa xatuane la itre atr troa hetrenyi la nyipi atrehmekune göi Akötresie memine la aja i Nyidrë kowe la fene hnengödrai. (Ioane 17:3; 2 Pet. 3:9, 10) Ketre jole lai koi së enehila, ke, nyimutre la itre ka xele ma drei së maine kola hnyimasai së pena, pine la huliwa së ne cainöj. (2 Pet. 3:3, 4) Ngo nyimu kepin matre easë pala hi a mejiun laka, hetre atr pala kö ngöne la teritoare së ka troa kapa la maca ka loi thupene la hna drenge ej. Tro angatr a drenge tune kaa, e pëkö atr ka cainöj?—Rom. 10:14, 15.
2. Kola ithuecatre koi së tune kaa hnene la tulu i Paulo aposetolo?
2 Ngöne La Kola Icilekeu: Pine laka nyimutre pala kö la itre atr ka ajane troa drenge la maca ne la Baselaia, haawe, thaa tro pi kö sa xou. Hnei Filipo ekö hna drenge la maca ka loi hnei Paulo hna cainöjën ngöne lo pane traon e Erop. Ame ngöne lo kola sili trengathoi Paulo me Sila, tre, hna ce thaucë nyidro me ce kuië nyidro hnine kalabus. (Ite Hu. 16:16-24) Ngo thaa hna sewe Paulo kö troa cainöj hnene la iakötrë celë. Hnei nyidrëti hna ‘catr thupene lai göi Akötesie’ ngöne lo nyidrëti a iwai e Thesalonika, ngöne lo tronge i nyidrë ceitu me ketre mesinare. (1 Thes. 2:2) Kola amamane koi së jëne la tulu i Paulo laka thaa tro pi kö sa ‘kucakuca.’—Gal. 6:9.
3. Nemene la ka troa upe la itre xaa atr troa saze la aqane ujë i angatr, ngacama itre ka xele kö angatr ekö ma hane drei së?
3 Nyimutre la itre ka saze la aqane ujë i angatr kowe la maca thupene la itre macatre. Maine jë angatr a saze hnene laka kola traqa koi angatre la itre ejolene la mani, maine wezipo maine hna meci pena hnene la ketre fami angatr, maine itre ewekë pena ka akötr ka traqa ngöne la fen. (1 Kor. 7:31) Ame la itre xan, ka icilekeu ekö la keme me thine i angatr ngo itre thupëtresiji hë angatr enehila nge hetre hni ne ajan i angatr troa dreng. Maine tro sa catre cainöj, easë hi lai a aijijëne la itre atr cili troa hane ‘hëne la atesiwa i Iehova’ nge ijine pala kö.—Rom. 10:13.
4. Nemene la ka uku së troa catre nge “tha mano kö” troa cainöj?
4 “Tha Mano Kö”: Tune la hna kuca hnene la itre aposetolo ne la hneijine i Iesu, kola uku së hnene la ihnimi së koi Akötresie me kowe la atre lapa easenyi së, troa catr nge “tha mano kö” troa cainöj me inine la nöjei atr. (Ite Hu. 5:42) Ame enehila, nyimutre la itre ka “awe me teije latesi pine la ite ewekë ka sisi asë.” (Ezek. 9:4) Drei la kola hamë mejiune me akeukawane la hni ne la itre ka drenge la maca ka loi! Ngacama kola xele ma drei së hnene la itre atr ka ala nyim ngo hetrenyi së la mejiune qa hnin la Tusi Hmitrötr laka, kola amadrinë Iehova hnene la hne së hna kuca.—Heb. 13:15, 16.