Pine Nemen Matre Easa Anyimua Bëeke Hmaca
1. Nemene la hnying hna amejëne göne la huliwa ne cainöje së?
1 Ame ngöne la itre götrane ka nyimutre, hna kuca lapaane la itre teritoare së. Easë pala hi a kuca la itre uma ka caas, ngo maine jë kolo pala hi a qaja hnene la atr hnë së hna iöhnyi memin, ka hape, thaa ajane kö angeic troa drei së. Pine nemene matre easa catre wange lapaane lo itre atr ka xele kö ma drei së?
2. Nemene la pane kepin matre easë a catre ngöne la huliwa ne cainöje së?
2 Ihnimi Koi Iehova Me Kowe La Itre Atr: Ame la pane kepin matre easa catre ngöne la huliwa ne cainöj, tre, hnene laka tru la ihnimi së koi Iehova. Hnene laka catre la aja e kuhu hni së, ene pe kola uku së troa catre hane qaja fe kowe la itre xan la pengöne la Akötresi së ka pucatin asë. (Luka 6:45) Kola upi së hnene la ihnimi së koi Iehova troa drengethenge la hnei Nyidrëti hna amekötin, me xatuane la itre xan troa hane tu së. (Ite edomë 27:11; 1 Ioane 5:3) Thaa hnene kö la aqane ujë ne la itre atr kowe la cainöje së, matre easë a xomihnin ahoeany. Ame mina fe ngöne lo hneijine i Iesu, tre, hna icilekeu memine la itre Keresiano, ngo hnei angatr hna catre cainöj “nge tha mano kö.” (Ite hu. 5:42) Ame la kola thipëne la maca ka loi hnene la itre atr, tre thaa tro kö sa kucakuca pine lai, ngo tro pe sa catr, me amamane la etrune la ihnimi memine la ajane së troa nyihlue i Iehova.
3. Tune kaa la aqane tro la ihnimi së kowe la itre atr a xatua së troa catre cainöj?
3 Ease fe a catre pala hi cainöj, pine laka, easa hnime la itre atr ka lapa easenyi së. (Luka 10:27) Thaa ajane kö Iehova troa meci la ketre e easë. (2 Pet. 3:9) Ngacama hna kuca lapaane la teritoare, atreine pala kö tro sa öhne la itre atr ka ajane troa nyihlue i Iehova. Drei la ketre ceitun: ame e Guadeloupe, tre, maine 56 lao atr, tre, caa Temoë e kuhu hnin; kola e la 214 lao atr ka xome la bapataiso ngöne lo macatre hnapan. Kola e fe la 20 000 lao atr ka sine la Drai Ne Amekunën, matre kösë, maine 22 lao atr, tre caa Atre Anyipici Iehova e kuhu hnin!
4. Kola hapeu la kola hape kola saze la itre teritoar?
4 Itre Ewekë Ka Saze Ngöne La Teritoar: Isapengöne kö la itre atr hne së hna lapaa öhne ngöne la teritoare së. Ame la easa cainöj ngöne la ketre hnalapa ka xele kö ekö ma drei së, maine jë troa fe pena koi së hnene la ketre atrene la fami ka thatre kö la maca ka loi; haawe, maine jë tro angeic a hane drei së. Maine pena, itre xaa atr hmaca pena ha la ka lapaane lai uma, nge angatre a ajane troa drei së. Maine ka icilekeu la itre keme me thin, ngo ame itre nekönatr, tre, angatr a tru trootro me tro qa ngöne la hnalapa. Maine jë tro la itre nekönatre cili a ajane troa hane drenge la maca ne Baselaia.
5. Nemene la ka troa upe la itre atr troa pi hane drei së?
5 Kola saze mina fe la itre atr. Paulo aposetolo ekö la ketre “ate nyi tru, me iaxösisi, me cate mek.” (1 Tim. 1:13) Ketre, nyimutre la itre ka nyihlue i Iehova enehila, laka ame ekö, tre, ka xelene kö angatre la nyipici. Ame itre xan, tre, maine jë hetre ijine ekö, angatr a pane icilekeu memine la maca ka loi. Pine laka kola saze la fen, haawe, ame hë lo itre ka icilekeu maine itre ka thaa hane kö semesinene la nyipici, angatre fe hë a hane pi drei së. Ame itre xan, tre, angatre ha pi hane drei së thupene la hna pane traqa la ketre ewekë ka ngazo koi angatr, maine jë hna meci la ketre atrene la fami, maine luuzi pena ha la huliwa, maine kola jole göi manie, maine pena hna tithe hnene la ketre sine mec.
6. Pine nemen matre nyipi ewekë tro sa catre cainöj cememine la madrin?
6 Kolo ha troa nyipune la fene ka ngazo celë, ngo ame la cainöje së me huliwa ne ini së, tre, kola kökötre nyimenyim enehila. (Is. 60:22) Qa ngöne lai, catre pi së troa cainöj cememine la madrin me thele troa hetrenyi pala hi la aqane waiewekë me aqane ujë ka loi. Maine jë ame la atr hne së hna troa ithanata memin, tre, tro angeic a drei së. Nyipi ewekë tro sa catre ithanata! ‘Maine tro sa kuca tune lai, haawe, tro hë së a amele së me angatre fe, angetre drei së.’—1 Tim. 4:16.