Pine Nemen Matre Loi e Tro Sa Catr Cainöj?
1 Hapeue la götran hnei epuni hna mele ngön, ekö hë cainöjën la maca ka loi e ngön? (Mat. 24:14) Maine eje hi, tre, maine jë tro epuni a mekun ka hape, tru catre hë la hna cainöj ngöne la teritoare cili. Ame la epuni a cainöj enehila, maine jë ala nyimu la itre atr ka thaa hane kö pi nango semesinen la maca ne Baselaia hne së hna tro fë. Ketre, hanawange mina fe la aqane troa wangatrehmekun la itretre drei Iesu, hna cinyihan ngöne la götran 141 ne la itus La Prophétie d’Isaie II, kola hape: “Ame ngöne la itre xaa götran, ngacama tru catr la hna huliwa hnene la itre trejin, ngo co hi la etrun la itre atr ka lö kowe la organizasio. Ngo thaa hnei angatre kö hna hmaca qa ngöne la huliwa ne cainöj.” Matre, pine nemen laka loi e troa catre cainöj?
2 Drei La Pengö i Ieremia: Maine thaa troa drei së maine thaa kepe së pena hnene la itre atr, ngo thaa celë kö la ka upi së lai troa cile hut ngöne la huliwa ne cainöj. Hnei Ieremia hna cainöj 40 lao macatre ngöne la götran ka caas, ngacama ala xalaithe hi la itre atr ka drei angeic, nge nyimutre la itre ka thipetrij la maca hnei angeic hna tro fë. Nemen kepin matre thaa hmaca kö Ieremia? Pine laka, angeic a trongën la hna upi angeic troa kuca hnei Akötresie, nge hnene laka, atre hi angeic la itre ewekë ka troa traqa ngöne la itre drai ka troa xulu, haawe, thaa cile kö angeic troa hane thuemacan la itre atr.—Iere. 1:17; 20:9.
3 Ceitune hi la hneijine i Ieremia me easë. Hnei Iesu hna “ahnithe koi huni troa cainöje kowe la nöj, me anyipicine, laka, nyidëti la iana i Akötesie nyine ate hnyingëne la ite ka mele me ite ka mec.” (Ite Huliwa 10:42) Ame la maca hne së hna tro fë, tre, ka nyipi ewekë catr, ke jëne mel, maine mec koi itre ka troa dreng ej. Troa amekötin la itre atr, thenge la aqane kapa angatr la maca ka loi. Caasi hi la qa së, ene la troa tro thenge la hna upi së troa kuca. Nge ame la kola thipën la maca hnene la itre atr, kolo mina fe lai a aijijë së troa amaman la ejuin la ihnimi së koi angatr, memin la aqane fedre së koi Iehova, hnene laka, easë a catre kuca la hne së hna atrein. Ngo hetrenyi pala kö la itre xaa kepin matre loi e tro sa catre cainöj.
4 Hetre Manathith Hne Së Hna Kapa: Maine thaa tro kö a drei së hnene la itre atr ngo hne së pala hi hna kuca la aja i Akötresie, eje hi lai laka, troa hetrenyi the së la tingeting memin la madrin e kuhu itre hni së, thatreine kö troa kapa la itre thiina ka tune lai jën la itre xaa huliwa. (Sal. 40:8) Nge troa hetre nyipi alien la mele së. Maine tro pala hi së a catre cainöjën la maca ka loi, tro fe hë a catr ngöne la hni së me ej ngöne la itre mekune së, la mejiune memin la madrin troa hane mele elany ngöne la fen ka hnyipixe i Akötresie. Maine tro së a nyipiewekën la itre hna thingehnaeane celë hnei Tusi Hmitrötr, eje hi lai laka troa kökötr la mele së ngöne la ua, nge troa acatren la aqane imelekeu së me Iehova.
5 Maine thaa tro kö së a canga öhn la itre thangan la hne së hna cainöj, ngo ase hë lai traan la itine nyipici ngöne la hni ne la itre atr, nge tro pë hë ej a cia ngöne la ijin hna amekötin hnei Iehova. (Ioane 6:44; 1 Kor. 3:6) Pëkö ka atre e easë la aqane tro la itre atr ka ala nyim a thel troa atrepengön la Baselaia elany jën la aqane catr ne la nöje i Iehova, ngöne la nöje së me e cailo fen.
6 Kola nyipi ewekë catr enehila la ini hnei Iesu hna hamën, nge loi e tro sa wangatrun, kola hape: “Wange kö nyipunie, hmekënejë me thith; ke tha ’te kö nyipunie la ijin. Ame la hnenge hna qaja koi nyipunie, ini fe a qaja kowe la nöjei ate asë, ka hape, Hmekënejë.” (Mareko 13:33, 37) Qa ngöne lai, epi tro asë hi së a catr tro fë la maca ka loi ne la Baselaia, me amadrinën la hni Iehova, ngöne laka, easë a atrun la atresiwa i Nyidrë ka draië nge ka hmitrötr.