Pine Nemene Matre Easë Pala Hi a Bëek?
1 Hapeu, ma hane fe kö epuni hnyinge tune la ngöne la epuni a hnëkë troa cainöje trootro ngöne la drai? Ngöne la itre teritoare hne së hna huliwane lapaane hë, wangatrehmekunyi së catre hnene la itre atr, nge canga helë së hi hnei angatr. Xalaithe hi la itre ka kepe së. Ame pe, nyimutre la itre kepine ka tru ka aijijë së troa bëeke lapaa troa wai angatr.
2 Ame la pane kepine ke, ene laka, hna amekötine koi së troa catre cainöjëne la maca ne Baselaia uti hë la kola traqa la pun. (Mat. 24:14; 28:19, 20) Hna hnyingëne hnei perofeta Isaia la etrune la itre drai ne tro nyidrë a sisedrëne la huliwa ne cainöje i nyidrë. Hna sa la hnyinge i nyidrë ngöne Isaia 6:11. Pëkö nyine troa ithahnatan—hna qaja koi nyidrë ka hape, tro nyidrëti a bëeke troa trofë la maca i Akötresie. Ketre tune fe enehila, maine troa helë së hnene la itre atr, Iehova a ajane tro së a catre troa wai angatre pala hi, itre ka mele ngöne la teritoare së. (Ezek. 3:10, 11) Ketre hnëqa lai ka hmitrötr, hna ahnithe koi së.—1 Kor. 9:17.
3 Ame la ketre kepine matre loi e tro së a catre bëeke troa cainöje kowe la itre atr, ke, celë hi aqane tro së lai a amamane la ejuine la lapaune së koi Iehova. (1 Ioane 5:3) Ketre, ame ngöne la easë a mekune la pune elanyi la fene hnengödrai, laka easenyi hë, hapeu, nyipici kö laka, tro së a cile troa amamane la ihnimi së ene la troa thuemacane la itre atr ka lapa ezi së? (2 Tim. 4:2; Iako. 2:8) Jëne la lapaune së ngöne la aqane xome së la hneqa së, kola amë pala hi qëmeke i angatre la itre ijine ka nyimutre matre tro angatre a hane kapa la maca ne iamele i Akötresie, matre thatreine kö angatre elanyi troa qaja ka hape, thaa hna hane kö thuemacanyi angatr.—Ezek. 5:13.
4 Ketre, thatre kö së la aliene la hni ne la itre atr. Maine troa ujëne eje hnene laka, hetre ewekë ka ketr la mele i angatr, maine ketre hace ngöne la fami i angatr, maine itre jole ka traqa kowe la fen, matre angatre hë a hane thele ewekë me mekune hnyawa la mele i angatre epin. Ngöne la ketre götran, ma troa hmala la hni troa drei së, pine la ketre ewekë hne së hna troa qaja ngöne la qëmekene uma i angatr. (Ate Cai. 9:11; 1 Kor. 7:31) Ketre, kola saze hnalapa hnene la itre atr. Maine jë tro së a hane iöhnyi memine la itre atr ka xötrei traqa ngöne la teritoare së, nge angatre a hane kapa la maca ka loi—maine jë itre nekö trahmanyi ka mele caasi hë, nge angatre a mekune hnyawa la pengö i angatre elany ngöne la mel.
5 Hapeu, tro kö së a catre troa bëeke hmaca? Eje hi! Jëne la itre trepene meköti ne la Tusi Hmitrötr, kola catre upi së troa bëeke troa cainöje me cainöje hmaca kowe la itre atr. Thupene lai, ame hë la kola nyipune la huliwa ne cainöj, tro Iehova a amanathithi së, qa ngöne laka, hne së hna catre sisedrëne la huliwa, nge tro fe Nyidrëti a hane amanathithine lo itre atr ka kapa madrine hnyawa la maca ka loi ne la Baselaia.—1 Tim. 4:16.