Catre Pi Së Troa Cainöj!
1 Aja i Akötresie tro “la nöjei ate asëjëihë a mele me wangate hmekune la nyipici.” (1 Tim. 2:4) Drei lai kepine matre, hna hamëne koi së la hnëqa, ene la troa cainöjëne la maca ka loi. (Mat. 24:14) Maine tro së a kapa madrine la kepine matre nyipi ewekë tro sa catre cainöj, thaa tro jë kö la itre hnepe kucakuca maine itre nyine madrine pena, a ajojezine la mele së.
2 Pine Nemene Matre Troa Catre Cainöj? Nyimutre la itre nyine madrine ngöne la fen, ka hetre ethane thene la itre atr, qa ngöne laka, angatre a thëthëhmine maine wangahmalohmaloeëne la itre hne së hna qaja. Qa ngöne lai, loi e tro pala hi së a amekunë angatre la maca ne iamele i Akötresie. (Mat. 24:38, 39) Ketre, nyimutre mina fe la itre ewekë ka traqa ngöne la mele ne la itre atr. Kolo pala hi a ngazo catre me nyimenyime saze la fen. (1 Kor. 7:31) Ame elany, maine e wiike hnapin, maine treu hnapine pena, troa qëmeke hnene la itre atr hne së hna cainöje kow, kowe la itre jole ka hnyipixe, maine itre aja ka troa upi angatre troa wangatrune hnyawa la maca ka loi hne së hna traqa fë koi angatr. Hapeu, thaa atraqatre jë fe kö la ole i nyipunie kowe lo lai Temoë ka catre tro fë pala hi koi epuni ekö la maca ka loi?
3 Loi e Troa Tune La Aqane Ihnimi Ipitö i Akötresie: Thaa hnei Iehova kö hna canga amekötine me apaatrene la itre atr ka ngazo, ngo hnei Nyidrëti hna treqene me nue ijine koi angatr. Jëne la itre hlue i Nyidrë, hnei Nyidrëti pala hi hna catre hëne la itre atr ka meköti matre troa ujë koi nyidrë matre troa hetrenyi la mel. (2 Pet. 3:9) Troa zö së elanyi la meci ne la itre atr, e thaa hne së kö hna catre tro fë la maca ne ihnimi Akötresie, me thuemacane la itre atr laka, easenyi hë tro Akötresieti a apaatrene la nöjei atr asë ka thaa ujë kö qa ngöne la itre jë i angatre ka ngazo. (Ezek. 33:1-11) Ngacama thaa hna kepe së hnyawa kö hnene la itre atr, ngo thaa tro pi kö së a hunyinyi troa xatua angatre matre hane jë fe angatre madrine la ihnimi ipitö i Akötresie.—Ite Huliwa 20:26, 27; Rom. 12:11.
4 Loi e Tro Sa Amamane La Ihnimi Së: Iehova la ka upi së, jëne Iesu Keriso, troa cainöjëne la maca ka loi e cailo fene hnengödrai. (Mat. 28:19, 20) Maine kola xele hnene la itre atr troa drei së, ngo easë hi lai a amamane la ihnimi së, me aja së troa nyihlue i Akötresie, ngöne laka, easë a catre troa kuca la loi.—1 Ioane 5:3.
5 The cile kö së troa cainöjëne la maca ka loi! Catre pi së troa thuemacane la itre atr, e ijine melëne petre kö së la “drai ne mel” hna nue hnei Iehova.—2 Kor. 6:2.