Ijiji Nyipunieti Kö Troa Hane Cainöj e Heji Lapa?
1. Thenge la hna qaja hnene la ketre itus, eue la Paulo a cainöje ngöne ketre hnalapa koi ketre hnalapa?
1 Kola qeje pengö i Paulo hnene la ketre itus qene papale (Daily Life in Bible Times) ka hape, ame la nyidrëti a cainöje ngöne ketre hnalapa matre ketre hnalapa, tre qaane lo 4 h e hnaipajö, uti hë e hnenyipajidr.” Thatre pë hë së maine nyipici jë kö lai, ngo ame pe atre hi së laka, hetre aja i Paulo ekö troa “kuca la ewekë celë pine la maca ka loi.” (1 Kor. 9:19-23) Nge hetrenyi la itre ewekë hnei nyidrëti hna kuca matre hetre thangane jë la hnei nyidrëti hna cainöje ngöne ketre hnalapa koi ketre hnalapa.
2. Pine nemene matre ketre ka loi fe la troa cainöj e heji lapa?
2 Hnene la itre ka cainöje hë ngöne la wiik, hna pune majemine cainöje ngöne ketre hnalapa koi ketre hnalapa e hmakany. Ngo ame ngöne la götrane hnei nyipunieti hna melën, tre eu la ijine ka loi troa cainöje ngöne ketre hnalapa koi ketre hnalapa? Kola qaja hnene la ketre pionie göne la götrane hnei angeice hna cainöje ngön ka hape: “Ame la eahuni a traqa kowe la itre hnalapa ngöne la drai, tre pëkö atr. Ngo e heji lapa ha, tre bëeke hë la itre atr ngöne la itre hnalapa i angatr.” Nyine tro hi lai a amamane ka hape, ketre ka loi fe la troa tro fë la maca ka loi e heji lapa, matre hetre itre atr hne së hna iöhnyi memin. Ijine kola mano lai hnene la itre atrekë hnalapan, nge hetre aja i angatre fe troa porotrike me easë. Maine ka loi fe troa cainöje ngöne ketre hnalapa koi ketre hnalapa e hej, ngöne la götrane hnei nyipunieti hna cainöje ngön, tre qa ne la itre qatre thup troa kuca matre troa hetre icasikeu göi cainöje e heji lapa.
3. Tro sa huliwane tune kaa la wange atrehmekune së ngöne la easa cainöj e heji lapa?
3 Huliwane Jë La Wange Atrehmekune i Nyipunie: Nyipi ewekë tro sa huliwane la wange atrehmekune së ngöne la easa cainöje trootro e heji lapa. Maine easa mekune troa wange hmaca la itre xa atr, nge easa traqa ijije la angatre ha troa xeni hej, tre loi e tro sa sipone tro hmaca së a bëeke e ketre ijin. Nge maine mitimiti hë, cile jë ngöne la götrane gaa lai, matre troa öhnyi nyipunie hnene lai atr hnei nyipunieti hna troa ithanata memin, nge qaja jë ka hape, drei e nyipunie, memine fe la aliene la tronge i nyipunie. Ka loi fe la tro pala hi a tro ala lue maine ala nyimu pena, me lapa ngöne la itre götrane hna thinaane hnyawan, nge tha tro kö a tro kowe la itre götrane tha hna trongëne lapane kö hnei itre atr. The tro kö a wange hmaca la itre atr e ijine tro hë angatr a meköl. (2 Kor. 6:3) Maine atre hi nyipunieti laka, tha loi kö troa cainöje ngöne la ketre götrane e miti hë, canga traqa pi ngöne la götrane cili e lai petre kö.—Ite edomë 22:3.
4. Nemene la itre emanathithine la troa cainöj e heji lapa?
4 Itre Emanathithin: Tru la madrine së la easa bëeke hmaca qa hna cainöje nge hetre atr hne së hna porotrike memin. Nge ame la easa porotrike memine la itre atr, easë hi lai a xatua angatre troa “mele me wangate hmekune la nyipici.” (1 Tim. 2:3, 4) Qa ngöne lai, hapeu, ijiji nyipunieti fe kö troa hane ami ijin, matre tro fe nyipunieti a hane cainöj e heji lapa?