Loi e Tro Sa Thele La Itre Atr Ka Hetre Hni Ne Ajan
1 Kola mama ngöne la itre hna amekötine hnei Iesu göi huliwa ne cainöj, laka, thaa ketre hnëqa ka hmaloi kö. Hnei nyidrëti hna qaja ka hape: “Ame la nöjei lapa memine la nöjei hnalapa hnei nyipunie hna troa xulu kow, te, hnyingënejë, ka hape, Dei la ate loi thina e cili.” (Mat. 10:11) Ame enehila tre, thaa lapa hnalapa hë la itre atr, matre tune kaa la aqane tro së a thele hnyawa la itre atr ka hetre hni ne ajan?
2 Loi e Troa Waipengöne Hnyawa La Teritoare Së: Ame la ewekë hnapan, tre ene la troa waipengöne hnyawa la götran hne së hna troa cainöje ngön. Eue la easë a öhne la itre atr ngöne la itre hnalapa i angatr? Eu la easë a traqa öhnyi angatr ngöne la drai? Hapeu, ngöne la ketre ijin ngöne la wiik, maine ngöne la ketre traeme ne la drai angatr a kepe easë hnyawa? Maine tro së a thele troa cainöj thenge la aqane mele ne la itre atr ngöne la götran hne së hna cainöje ngön, eje hi lai laka tro ha hetre thangane ka loi la huliwa së.—1 Kor. 9:23, 26.
3 Nyimutre la itre trejine ka öhne la eloin troa cainöj e heji lapa. Ame la itre xaa atr tre canga hmala hi angatr troa drei së ngöne la ijine cili. Maine ijij troa telefon e jidr, maine jë troa hetre thangane ka loi mina fe la aqane cainöje cili. Ka loi mina fe troa cainöje ngöne la itre teritoar gaa tru hna salem, me ngöne la itre gaa tru atr, celë hi itre xaa aqane tro lai a thele me ketr la itre atr jëne la maca ka loi.
4 Ame ngöne lo kola cainöj ngöne la ketre treu ka ketrepengöne kö, hnene la ketre ekalesia hna amekötin la itre drai ne troa cainöj, ene la itre mecixeni me itre sabath e hnaipajö hej, me ngöne la heji lapa ne la lue drai ne la wiik. Hnei angatre mina fe hna thele troa cainöj jëne telefon, me ce tro fë la maca ka loi ngöne la itre götran gaa salem. Itre aqane amekötine lai ka amadrinën la itre trejin ngöne la hna cainöj, celë hi matre hna catre xome pala pë hë itre eje hnene la ekalesia.
5 Catre Pi Së Troa Iwai Hmaca: Maine ketre jole ka tru koi epun troa öhne la itre atr ngöne la epuni a tro troa wai angatre hmaca, thele jë troa isa pui hnyawa ngöne la nöjei kola tro trije la atr, a tune mina fe ngöne lo kola xötrei ithanata. Thupene lai, nyipi ewekë troa eatrën la hna isa pui. (Mat. 5:37) Maine ijije hi tre, pane sipone jë fe kowe lai atr la numero ne telefone i angeic. Ewekë lai ka aijijë epuni troa hë angeice hmaca.
6 Maine tro sa catre thele hnyawa la itre atr ka hetre hni ne ajan me canga wai angatre pala hi matre troa akökötrene la aja ka eje thei angatr, eje hi lai laka, tro hë së a kapa la itre manathithi ka tru qaathei Iehova.—Ite edomë 21:5.