Maine Nekönatr La Ka Fe La Qëhnelö

Maine ketre nekönatr la ka fe la qëhnelö, loi e tro sa upi nyëne troa thenge la kem me thine i nyën. Easë hi lai a amamane la metrötre së kowe la hene la hnepe lapa. (Ite Edomë 6:20) Maine kola alö easë e hnine la uma hnene la nekönatr, tha tro kö sa kapa. Maine ka hetre jole i kem me thin, loi e tro sa bëeke hmaca ngöne la ketre ijin.

Maine ketre nekönatr ka tru hë, maine jë kola ha traqa ngöne la macatre ne thöth, ngo loi e tro pala hi sa sipone troa ithanata memine la kem me thin. Maine ka hetre jole i nyidro, nyipiewekë tro sa sipo nyidro troa amë pe la itre itus maine zonal hna iëne hnene la nekönatr. Maine hna nue së hnei nyidro troa hamë itus, ijije hi tro sa upi angeice fe troa tro kowe la sit së, jw.org.

Ame ngöne la easa troa wange hmaca la nekönatr ka hetre aja, loi e tro sa sipone matre troa iöhnyi memine la kem me thine i nyën. Celë hi lai ka troa aijijë së troa qejepengöne hnyawa la kepin, me amamane koi nyidro la itre eamo ka lolo qa hnine la Tusi Hmitrötr nge ka nyipiewekë kowe la mele ne la hnepe lapa. (Salamo 119:86, 138) Maine tro sa amamane kowe la kem me thin, la metrötre së memine la aja së troa ixatua, haawe, aqane tro hi së lai a thiina ka loi. Ketre kolo fe hi lai a aijijë së troa tro fë la itre maca ka lolo kowe la hnepe lapa.—1 Peteru 2:12.